ଗୃହକାର୍ଯ୍ୟ ଚାଲିବା ବେଳେ ଉପସ୍ଥିତ ରହୁନାହାନ୍ତି ମନ୍ତ୍ରୀ : ବିରୋଧୀଙ୍କ ପ୍ରତିବାଦ ପରେ ମନ୍ତ୍ରୀ ଓ ବିଧାୟକଙ୍କୁ ଉପସ୍ଥିତ ରହିବାକୁ ବାଚସ୍ପତିଙ୍କ ନିର୍ଦ୍ଦେଶ
ଭୁବନେଶ୍ବର: ବିଧାନସଭାରେ ଗୁରୁତ୍ବପୂର୍ଣ୍ଣ ପ୍ରସଙ୍ଗର ଆଲୋଚନା ଚାଲୁଥିବା ସମୟରେ ଉପସ୍ଥିତ ରହୁନାହାନ୍ତି ମନ୍ତ୍ରୀ । ଏହି ପ୍ରସଙ୍ଗ ଉଠାଇ ଗୃହର ମଧ୍ୟଭାଗରେ ନାରାବାଜି କରିଛନ୍ତି ବିରୋଧୀ । ଆଜି ଶୂନ୍ୟକାଳରେ ଗୃହରେ କୌଣସି ମନ୍ତ୍ରୀ ଉପସ୍ଥିତ ନ ଥିବା ପ୍ରସଙ୍ଗ ଉଠାଇଥିଲେ ବିଜେପି ଓ କଂଗ୍ରେସ ବିଧାୟକ । ଏହାପରେ ବାଚସ୍ପତି ଗୁରୁତ୍ୱପୂର୍ଣ୍ଣ ରୁଲିଂ ଦେଇଥିଲେ । ବାଚସ୍ପତି କହିଥିଲେ, ଗୃହ ଚାଲୁଥିବା ସମୟରେ ଜଣେ ମନ୍ତ୍ରୀ ଉପସ୍ଥିତ ରହିବା ଦରକାର । ସରକାରୀ ଦଳ ମୁଖ୍ୟ ସଚେତକ ଏ ଦାୟିତ୍ୱ ନିଅନ୍ତୁ । ଏହି ରୁଲିଂ ପରେ ଲବିରୁ ଗୃହକୁ ଆସିଥିଲେ ୪ ମନ୍ତ୍ରୀ ଓ ଶାସକ ଦଳର ଅନେକ ବିଧାୟକ ।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖ ଥାଉ କି, ଧାନ କିଣା ଉପରେ ଗତକାଲି ମୁଲତବୀ ଆଲୋଚନା ଚାଲିଥିଲା ସମୟରେ ଶାସକ ଦଳ ସଭ୍ୟଙ୍କ ଉପସ୍ଥିତି ଖୁବ୍ ନଗଣ୍ୟ ଥିଲା। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହୁଥିଲା ବେଳେ ଏହି ପ୍ରସଙ୍ଗ ଉଠାଇଥିଲେ। ସେ କହିଥିଲେ, ଧାନ କିଣା ପରି ଗୁରୁତ୍ବପୂର୍ଣ୍ଣ ପ୍ରସଙ୍ଗ ଆଲୋଚନା ହେଉଥିଲା ବେଳେ ଶାସକ ଦଳର ୧୬ ଜଣ ସଭ୍ୟ ଅଛନ୍ତି। ଯୋଗାଣ ମନ୍ତ୍ରୀଙ୍କ ସମେତ ମାତ୍ର ୩ ଜଣ ମନ୍ତ୍ରୀ ଉପସ୍ଥିତ ଅଛନ୍ତି। ଶାସକ ଦଳ ପଟୁ କୁହାଯାଇଥିଲା କି, ବିଧାୟକମାନେ ବିଧାନସଭା ଭିତରେ ଅଛନ୍ତି ଓ ଟିଭିରେ ଆପଣଙ୍କ କଥା ଶୁଣୁଛନ୍ତି।
ଏହାପରେ ଶ୍ରୀ ମିଶ୍ର କହିଥିଲେ, ମୁଖ୍ୟମନ୍ତ୍ରୀ ଆପଣମାନଙ୍କୁ କୁଆଡ଼େ ଉପଦେଶ ଦେଇଥିଲେ ଗୃହରେ ରହିବା ପାଇଁ। ଆଉ ତାଙ୍କ ଉପଦେଶ ବି ଆପଣମାନେ ଶୁଣୁ ନାହାନ୍ତି। ଯଦି ଗୃହକୁ ନ ଆସି ଆପଣମାନେ ଶୁଣିପାରିବେ, ତେବେ ସେହି କଥା ମୁଖ୍ୟମନ୍ତ୍ରୀ ଉପଦେଶ ଦେଉ ନାହାନ୍ତି କାହିଁକି ? ଶ୍ରୀ ମିଶ୍ର ଏତିକି କହୁ କହୁ ଆଉ ୫ ଜଣ ବିଧାୟକଙ୍କ ସମେତ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଗୃହକୁ ପ୍ରବେଶ କରିଥିଲେ।