ଭୁବନେଶ୍ୱର: ରାଜ୍ୟପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଚିଠି । କ୍ଷେତ୍ରୀୟ ବ୍ୟାପକ ଆଥିର୍କ ବୁଝାମଣା ବା (ଆରସିଇପି)ରେ ହସ୍ତାକ୍ଷର ନକରିବା ପାଇଁ ରାଜ୍ୟପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଦାବି ଜଣାଇଲା ସ୍ୱଦେଶୀ ଜାଗରଣ ମଞ୍ଚ ଓଡ଼ିଶା । ଭାରତ ସମେତ ଅନ୍ୟ ୧୫ଟି ଦେଶମାନେ ମିଶି ଆଗକୁ (ଆରସିଇପି) ନାମକ ଏକ ବୁଝାମଣା ପାଇଁ ଯୋଜନା କରିଛନ୍ତି ଯେଉଁଥିରେ ଆମଦାନି ହେଉଥିବା ୮୦ରୁ ୯୦ ପ୍ରତିଶତ ବସ୍ତୁମାନଙ୍କ ଉପରେ ଆମଦାନି ଶୁଳ୍କ ଶୂନ କରିବାକୁ ବ୍ୟବସ୍ଥା କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଆଉ ଯଦି ଏହା ସ୍ୱାକ୍ଷରିତ ହୁଏ ତାହେଲେ ଭାରତ ଉପରେ ଏହାର ଅଧିକ ପ୍ରଭାବ ପଡ଼ିବ ବୋଲି ସତର୍କ କରାଇଛି ମଞ୍ଚ ।ସବୁଠାରୁ ବଡ଼ କଥା ହେଲା, ଏହି (ଆରସିଇପି)ର ବୁଝାମଣା ହେଲେ, ଦେଶର ଶିଳ୍ପ, କୃଷି ଓ ଗୋପାଳନ ଅତି ପ୍ରଭାବିତ ହେବ । ଆଉ ଚୀନରୁ ଆସୁଥିବା ଶସ୍ତା ମାଲ କାରଣରୁ ଆମ ଦେଶର ଅଧିକାଂଶ ଉଦ୍ୟୋଗ ବନ୍ଦ ହୋଇଯିବା ସହ ‘ମେକ୍ ଇନ୍ ଇଣ୍ଡିଆ’ ସ୍ୱପ୍ନ ସ୍ୱପ୍ନରେ ରହିଯିବ । ଏପରିକି କେବଳ ଶିଳ୍ପ ଉଦ୍ୟୋଗ ନୁହେଁ ବରଂ ଶ୍ରମିକମାନଙ୍କ ରୋଜଗାର ଉପରେ ପ୍ରଭାବ ପଡ଼ିବ ବୋଲି ଦାବି କରିଛି ସ୍ୱଦେଶୀ ଜାଗରଣ ମଞ୍ଚ ଓଡ଼ିଶା ।
ଅନ୍ୟପଟେ ଏହି ବୁଝାମଣା ପୂର୍ବରୁ ଦେଶର ପ୍ରାୟ ସବୁ ଶିଳ୍ପ, ଦୁଗ୍ଧ ଚାଷୀମାନେ କ୍ଷତିର ଆଶଙ୍କା କରି ଭୟଭୀତ ହୋଇପଡିଛନ୍ତି । ଦେଶର ଛୋଟ ଓ ମଧ୍ୟମ ଶିଳ୍ପ, ଶ୍ରମିକ କ୍ଷେତ୍ର ସହ ଜଡ଼ିତ ସମସ୍ତଙ୍କ ତରଫରୁ ସ୍ୱଦେଶୀ ଜାଗରଣ ମଞ୍ଚ ସରକାରଙ୍କ ନିକଟରେ ଦାବି ଜଣାଉଛି । ଦେଶବାସୀଙ୍କ ହିତ ଏବଂ ମେକ୍ ଇନ୍ ଇଣ୍ଡିଆର ସ୍ୱପ୍ନକୁ ସାକାର କରିବାକୁ ହେଲେ, ଏହି (ଆରସିଇପି) ବୁଝାମଣା ଉପରେ ପୂର୍ଣ୍ଣ ବିରାମ ଦିଅନ୍ତୁ ପ୍ରଧାନମନ୍ତ୍ରୀ । ଯଦି ଏହାପରେ ବି କେନ୍ଦ୍ରସରକାର ଏହି ବୁଝାମଣା କରିବାକୁ ଯୋଜନା କରନ୍ତି ତେବେ ଏହା ବିରୁଦ୍ଧରେ ତୀବ୍ର ଜନ ଆନ୍ଦୋଳନ କରିବ ବୋଲି ସ୍ୱଦେଶୀ ଜାଗରଣ ମଞ୍ଚ ଚେତାବନୀ ଦେଇଛି ।