ଭୁବନେଶ୍ୱର: ବାହାର ରାଜ୍ୟକୁ ବିଭିନ୍ନ ସମୟରେ ବେଆଇନ ଭାବେ ଦଲାଲମାନେ ବିଭିନ୍ନ ଜିଲ୍ଲାରୁ ଶ୍ରମିକ ଚାଲାଣ କରିଥାଆନ୍ତି। ଏହି ଶ୍ରମିକମାନଙ୍କୁ ସେମାନେ ବିନା ପାରିଶ୍ରମିକରେ କାମରେ ନିୟୋଜିତ କରାଉଥିବା ଅନେକ ସମୟରେ ଅଭିଯୋଗ ଆସିଛି। ତେଣୁ ଶ୍ରମିକ ଚାଲାଣ କରୁଥିବା ଏହି ଦଲାଲ ଓ ଏଜେଣ୍ଟମାନଙ୍କ ଉପରେ ଓଡ଼ିଶା ପୁଲିସ କିଛିଦିନ ହେବ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି ବିଭିନ୍ନ ସ୍ଥାନରେ ଅତର୍କିତ ଚଢ଼ାଉ କରୁଛି। ପୁଲିସ ଏକ ସ୍ୱତନ୍ତ୍ର ଟିମ୍‌ ଗଠନ କରି ଶ୍ରମିକ ଚାଲାଣ କରୁଥିବା ଏଜେଣ୍ଟ ଓ ଦଲାଲଙ୍କୁ ଧରିବା ପାଇଁ ରାୟଗଡ଼ା, ନବରଙ୍ଗପୁର ଓ କଳହାଣ୍ଡି ଆଦି ଜିଲ୍ଲାରେ ବ୍ୟାପକ ଚଢ଼ାଉ କରିଥିଲା। ପୁଲିସର ଏହି ଚଢ଼ାଉ ସମୟରେ ୫୦ଜଣ ଦଲାଲ ଓ ଏଜେଣ୍ଟ ଗିରଫ ହୋଇଛନ୍ତି।

Advertisment

publive-image ସାଙ୍କେତିକ ଫଟୋ

ପୁଲିସ ଏହି ତିନିିଟି ଜିଲ୍ଲାରେ ଚଢ଼ାଉ କରି ରାୟଗଡ଼ାରୁ ୧୫, ନବରଙ୍ଗପୁରରୁ ୨୧ ଓ କଳାହାଣ୍ଡିରୁ ୧୪ଜଣ ଦଲାଲ ଓ ଏଜେଣ୍ଟଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଗିରଫ ଦଲାଲ ଓ ଏଜେଣ୍ଟଙ୍କ ବିରୋଧରେ ଭାରତୀୟ ଦଣ୍ଡବିଧାନ ଆଇନ ଅନୁଯାୟୀ ଧାରା ୧୨୦ (ବି)/୩୭୦ (୨) ଓ (୩)/୪୧୭/୩୪ରେ ମାମଲା ରୁଜୁ ହୋଇଛି। ସେହିପରି ପୁଲିସ ଗତ ସପ୍ତାହରେ ବଲାଙ୍ଗୀର ଓ ନୂଆପଡ଼ା ଜିଲ୍ଲାରୁ ୪୧ ଦଲାଲଙ୍କୁ ଗିରଫ କରିଥିଲା। ଏଯାବତ ଏହି ଚଢ଼ାଉରେ ପୁଲିସ ୯୧ଜଣଙ୍କୁ ଗିରଫ କରିଥିବା ପୁଲିସ ଡିଜି ବିଜୟ କୁମାର ଶର୍ମା ଗୁରୁବାର ସୂଚନା ଦେଇଛନ୍ତି।