ଶିମିଳିପାଳରୁ ମିଳିଲା କଲରାପତରିଆର ମୃତଦେହ
ବରିଷ୍ଠ ଅଧିକାରୀଙ୍କ କ୍ଷେତ୍ର ପରିଦର୍ଶନ, ବ୍ୟବଚ୍ଛେଦ ପରେ ପୋଡ଼ାଗଲା, ବାଘ ଚମଡ଼ା ତସ୍କରଙ୍କ ସଂପୃକ୍ତି ସନ୍ଦେହ
ବାରିପଦା : ଶିମିଳିପାଳ କୋର୍ ଏରିଆରୁ ମିଳିଲା ପୁଣି ଏକ କଲରାପତରିଆ ବାଘର ଗଳିତ ମୃତଦେହ। ଜେନାବିଲ୍ ରେଞ୍ଜ ଅନ୍ତର୍ଗତ ସାରୁଆ ବିଟ୍ର ଟିକ୍ତାଳି ସେକ୍ସନ୍ର ଏକ ନାଳ ନିକଟରୁ ପ୍ରାୟ ୮ ମାସର ଏକ କଲରାପତରିଆ ବାଘର ମୃତଦେହ ଉଦ୍ଧାର କରାଯାଇଛି। ୨ ଦିନ ତଳେ ଉଦ୍ଧାର ହୋଇଥିବା ଏହି କଲରାପତରିଆ ବାଘଟି ପ୍ରାୟ ୭-୮ ଦିନ ତଳେ ପ୍ରାଣ ହରାଇଥିବା ସୂଚନା ମିଳିଛି। ଆଜି ଏ ନେଇ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଅମିତାଭ ବ୍ରହ୍ମା (ଆଇଏଫଏସ), ଉପନିର୍ଦ୍ଦେଶକ(ଡିଡି) ଯଜ୍ଞଦତ୍ତ ପତିଙ୍କ ସହିତ ଏସ୍ଟିଆର୍ର ଡ. ପିୟୁଷ ସୋରେନ୍, ଡବ୍ଲ୍ୟଟିଆଇର ଡ. ଫନିନ୍ ଚେଙ୍ଗ୍ମାଇ, ଯଶୀପୁର ଭିଏସ୍ ପ୍ରମୁଖ ଘଟଣାସ୍ଥଳକୁ ଯାଇ ମୃତଦେହ ଜବତ କରିଥିଲେ। ପରେ ଶବ ବ୍ୟବଚ୍ଛେଦ କରାଯାଇ ମୃତଦେହକୁ ପୋଡ଼ି ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଦୁର୍ବଳତା କାରଣରୁ ସ୍ବାଭାବିକ ମୃତ୍ୟୁ ଘଟିଥିବା ଡିଡି ଶ୍ରୀ ପତି ସୂଚନା ଦେଇଛନ୍ତି। ମାତ୍ର କେଉଁ ଅବସ୍ଥାରେ ଏକ କଲରାପତରିଆ ବାଘର ଏପରି ମୃତ୍ୟୁ ଘଟିଲା ତାହା ତଦନ୍ତସାପେକ୍ଷ ବୋଲି ବନ୍ୟଜନ୍ତୁ ସଂରକ୍ଷକମାନେ ଦାବି କରିଛନ୍ତି। କାରଣ ବିଗତ ୬ ମାସ ମଧ୍ୟରେ ବନବିଭାଗ, ଏସ୍ଟିଏଫ ପକ୍ଷରୁ ଶିମିଳିପାଳରୁ ୪ରୁ ଅଧିକ କଲରାପତରିଆ ବାଘ ଚମଡ଼ା ଜବତ୍ ସରିଛି। ତେବେ ଏହି କଲରାପତରିଆ ବାଘର ମୃତ୍ୟୁରେ ବାଘ ଚମଡ଼ା ତସ୍କରଙ୍କ ହାତ ଥିବା ସନ୍ଦେହ କରାଯାଉଛି। ଏହାର ସଠିକ ତଦନ୍ତ କରିବାକୁ ଦାବି ହୋଇଛି।