ରାଇରଙ୍ଗପୁର ବନଖଣ୍ଡରେ ବାଘ! ବଳଦକୁ ମାରି ଖାଇଲା, ନାଳ ନିକଟରେ ପାଦଚିହ୍ନ ଠାବ, କଣାପାଟ ଅଞ୍ଚଳରେ କୋକୁଆ ଭୟ
ରାଇରଙ୍ଗପୁର/ସରଗଡ଼ା : ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ବନଖଣ୍ଡ ଅନ୍ତର୍ଗତ ବିଶୋଇ କଣାପାଟ ସଂରକ୍ଷିତ ଜଙ୍ଗଲରେ ମାତିଛି ବାଘ। ଯାହାକୁ ନେଇ ଆଖପାଖ ଅଞ୍ଚଳରେ କୋକୁଆଭୟ ଖେଳିଯାଇଛି। ଗତ ମଙ୍ଗଳବାର ଦିନ ଜଙ୍ଗଲକୁ ଚରିବା ପାଇଁ ଯାଇଥିବା ଏକ ବଳଦକୁ ବାଘ ମାରି ଖାଇଯାଇଛି। ଗତକାଲି ଗାଁ ଲୋକଙ୍କଠାରୁ ଖବର ପାଇବା ପରେ ଆଜି ସକାଳେ ବିଶୋଇ ରେଞ୍ଜର କର୍ମଚାରୀମାନେ ଘଟଣାସ୍ଥଳରୁ ବଳଦର ମୃତଦେହ ଉଦ୍ଧାର କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବଣପାହାଡ଼ ଘେରା ବିଜାତଳା ବ୍ଲକ ସରଗଡ଼ା ପଞ୍ଚାୟତ ଅନ୍ତର୍ଗତ ଦଳେଇଡିହି ଗ୍ରାମର ବୁବେଲ ସର୍ଦ୍ଦାରଙ୍କର ବଳଦପଲ ଗତ ମଙ୍ଗଳବାର ଦିନ ଚରିବା ପାଇଁ କଣାପାଟ ଜଙ୍ଗଲକୁ ଯାଇଥିଲେ। ସେଥିମଧ୍ୟରୁ ଗୋଟିଏ ବଳଦ ଘରକୁ ନଫେରିବାରୁ ଘର ଲୋକ ଖୋଜାଖୋଜି କରିଥିଲେ। ପରେ ସରଗଡ଼ାରୁ ୨ କିମି ଦୂର ଚଢ଼େଇପାହାଡ଼ି ରାସ୍ତାକଡ଼ରେ ବଳଦର ମୃତଦେହ ପଡ଼ିଥିବା ଦେଖିବାକୁ ମିଳିଥିଲା। ବଳଦକୁ ମାରି ବାଘ ମାଂସ ଖାଇ ଯାଇଥିବା ବେଳେ ପାଖରେ ଥିବା ଏକ ନାଳରୁ ପାଣି ପିଇଥିବା ଜଣାପଡ଼ିଛି। ବାଘ ପାଦଚିହ୍ନରୁ ଏହା ଏକ କଲରାପତରିଆ ବାଘ ଓ ଏହା ଶିମିଳିପାଳରୁ ପଳାଇ ଆସିଥିବା ବନ ବିଭାଗ ସୂଚନା ଦେଇଛି। ଆଜି ବିଶୋଇ ରେଞ୍ଜର ପ୍ରଦୀପ କୁମାର ପୃଷ୍ଟିଙ୍କ ସହ ଫରେଷ୍ଟର ଅଜିତ କୁମାର ମହାନ୍ତି ଓ ଫରେଷ୍ଟଗାର୍ଡମାନେ ଘଟଣାସ୍ଥଳରେ ପହଞ୍ଚି ବାଘର ପାଦଚିହ୍ନ ଅନୁଧ୍ୟାନ କରିଛନ୍ତି। ବର୍ତ୍ତମାନ ଜଙ୍ଗଲ ଭିତରକୁ ଗୃହପାଳିତ ପଶୁମାନଙ୍କୁ ନ ଛାଡ଼ିବା ଲାଗି ବନ ବିଭାଗ ସତର୍କ କରାଇଦେଇଛି। ଅନ୍ୟପକ୍ଷରେ ବଳଦ ମାଲିକ ବୁବେଲ ସର୍ଦ୍ଦାରଙ୍କୁ କ୍ଷତିପୂରଣ ପ୍ରଦାନ କରାଯିବ ବୋଲି ରାଇରଙ୍ଗପୁର ଡିଏଫ୍ଓ ପ୍ରକାଶ କରିଛନ୍ତି।