ଭଦ୍ରକ: ସକାଳେ ରୋଷେଇ ଘରେ ଚା’ ତିଆରି କରୁଥିବା ବେଳେ ଅଗ୍ନିକାଣ୍ଡରେ ଜଣେ ନବବିବାହିତା ଜୀବନ୍ତ ଦଗ୍ଧ ହୋଇଥିବା ଘଟଣା ଭଦ୍ରକ ଜିଲ୍ଲାରେ ଚାଞ୍ଚଲ୍ୟ ଖେଳାଇ ଦେଇଛି। ତାଙ୍କୁ ରକ୍ଷା କରିବାକୁ ଯାଇ ଉକ୍ତ ମହିଳାଙ୍କ ସ୍ବାମୀ ବି ଗୁରୁତର ହୋଇଥିବା ଜଣାଯାଇଛି। ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଗ୍ରାମାଞ୍ଚଳ ଥାନା ଅନ୍ତର୍ଗତ ସେରପୁର ଗ୍ରାମରେ।
ପ୍ରାପ୍ତ ସୂଚନା ଅନୁଯାୟୀ, ସେରପୁର ଗ୍ରାମର ଅନ୍ତର୍ଯ୍ୟାମୀ ପରିଡ଼ାଙ୍କ ସ୍ତ୍ରୀ ସରୋଜିନୀ ପରିଡ଼ା (୩୦) ସକାଳେ ଇଣ୍ଡକସନ୍ ଚୁଲାରେ ଚା’ ତିଆରି କରୁଥିବା ବେଳେ ହଠାତ୍ ତାଙ୍କ ଦେହରେ ନିଆଁ ଲାଗିଯାଇଥିଲା। ଏହାପରେ ସେ ଚିତ୍କାର କରିଥିଲେ। ସ୍ତ୍ରୀଙ୍କ ପାଟି ଶୁଣି ଅନ୍ତର୍ଯ୍ୟାମୀ ପରିଡ଼ା ସ୍ତ୍ରୀଙ୍କୁ ରକ୍ଷା କରିବାକୁ ଧାଇଁ ଆସିଥିଲେ। ହେଲେ ସେତେବେଳକୁ ସରୋଜିନୀ ଜୀବନ୍ତ ଦଗ୍ଧ ହୋଇସାରିଥିଲେ।
Sambad is now on WhatsApp
Join and get latest news updates delivered to you via WhatsApp
ଖାଲି ସେତିକି ନୁହେଁ , ତାଙ୍କର ତିନି ବଖରା ଘର ବି ଜଳ ପୋଡ଼ି ପାଉଁଶ ହୋଇଯାଇଥିଲା। ଏଥିରେ ସ୍ୱାମୀ ଅନ୍ତର୍ଯ୍ୟାମୀ ପରିଡ଼ା ବି ପୋଡ଼ି ହୋଇଯାଇଥିଲେ। ଏହାପରେ ଉଭୟଙ୍କୁ ସ୍ଥାନୀୟ ତିହିଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ସରୋଜିନୀ ପରିଡ଼ାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଗୁରୁତର ଅବସ୍ଥାରେ ଏବେ ଅନ୍ତର୍ଯ୍ୟାମୀ ପରିଡ଼ା ଚିକିତ୍ସିତ ହେଉଛନ୍ତି।
ସର୍ଟସର୍କିଟ ଯୋଗୁ ଏହି ଅଗ୍ନିକାଣ୍ଡ ହୋଇଥିବାର ସୂଚନା ମିଳିଛି। ତିହିଡ଼ି ଥାନା ପୁଲିସ୍ ମୃତ ସରୋଜିନୀଙ୍କର ଶବ ବ୍ୟବଚ୍ଛେଦ ଲାଗି ପଠାଇଛି। ଅପରପକ୍ଷରେ ଭଦ୍ରକ ଗ୍ରାମାଞ୍ଚଳ ଥାନା ପୁଲିସ୍ ଘଟଣାର ତଦନ୍ତ କରୁଛି। ଏହି ଘଟଣା ଏବେ ଭଦ୍ରକ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି।