ଭୁବନେଶ୍ୱର: ଭୁବନେଶ୍ୱର ଏବଂ ଭଦ୍ରକ ସହରରେ ରାଜ୍ୟ ସରକାର ଘୋଷଣା କରିଥିବା ସମ୍ପୂର୍ଣ୍ଣ ‘ସଟଡାଉନ୍’କୁ ନ ମାନି ବାହାରକୁ ବାହାରିଲେ ୧୪ ଦିନିଆ ସରକାରୀ କ୍ୱାରେଣ୍ଟିନରେ ରହିବାକୂ ପଡ଼ି। ଶୁକ୍ରବାର ରାତି ୮ଟାରୁ ରବିବାର ରାତି ୮ଟା ଅର୍ଥାତ୍ ୪୮ ଘଣ୍ଟାଯାଏଁ ରାଜଧାନୀ ଭୁବନେଶ୍ୱର ଏବଂ ଭଦ୍ରକ ସହରକୁ ସମ୍ପୂର୍ଣ୍ଣ ‘ସଟଡାଉନ୍’ କରିବାକୁ ନିଷ୍ପତ୍ତି କରିଛନ୍ତି ରାଜ୍ୟ ସରକାର । ଆଜି ଏ ସଂକ୍ରାନ୍ତରେ ଏକ ଜରୁରୀ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି ମୁଖ୍ୟ ଶାସନ ସଚିବ ଅସିତ ତ୍ରୀପାଠି ଓ ପୁଲିସ ମହାନିର୍ଦେଶକ ଅଭୟ ।
Sambad is now on WhatsApp
Join and get latest news updates delivered to you via WhatsApp
ଏହି ୪୮ ଘଣ୍ଟା ମଧ୍ୟରେ ଭୁବନେଶ୍ୱର ଏବଂ ଭଦ୍ରକ ସହରର ସମସ୍ତ ପ୍ରକାରର ଅତ୍ୟାବଶ୍ୟକ ସାମଗ୍ରୀ ବିକ୍ରୟ କରୁଥିବ ବ୍ୟାବସାୟିକ ପ୍ରତିଷ୍ଠାନ ବନ୍ଦ ରହିବ । ଏହି ଆଦେଶ ଅମାନ୍ୟ କରି କୌଣସି ବ୍ୟକ୍ତିବିଶେଷ ବାହାରେ ବୁଲାବୁଲି କରୁଥିବା ଦେଖିଲେ ତାଙ୍କୁ ଧରି ନେଇ ୧୪ ଦିନ ପାଇଁ ସରକାରୀ କ୍ୱାରେଣ୍ଟିନରେ ରଖାଯିବ ।
ମୁଖ୍ୟ ଶାସନ ସଚିବ କହିଲେ ଯେ କରୋନାଭାଇରସ୍ ସଂକ୍ରମଣ ରୋକିବା ଲାଗି ଓଡ଼ିଶା ସରକାର ଅନେକ ଆଗୁଆ ପଦକ୍ଷେପ ଗ୍ରହଣ କରିଛନ୍ତି । ଓଡ଼ିଶା ଲାଗୁ କରିଥିବା ବିଦେଶ ଫେରନ୍ତା ବ୍ୟକ୍ତିବିଶେଷଙ୍କ ପଞ୍ଜିକରଣ ବ୍ୟବସ୍ଥାକୁ ଅନ୍ୟ ରାଜ୍ୟମାନେ ଅନୁସରଣ କରିଛନ୍ତି । ମାର୍ଚ ୩୧ ଯାଏଁ ରାଜ୍ୟରେ କରୋନାଭାଇରସ୍ ସଂକ୍ରମଣଙ୍କୁ ଏକ ଅଙ୍କରେ ସୀମିତ ରଖିବାକୁ ରାଜ୍ୟ ସରକାର ଉଦ୍ୟମ କରିଥିଲେ । ତାହା ସଫଳ ହୋଇଛି । ସମଗ୍ର ଭାରତରେ ସଂକ୍ରମିତଙ୍କ ସଂଖ୍ୟା କ୍ରମାଗତ ବୃଦ୍ଧି ପାଉଥିବା ବେଳେ ରାଜ୍ୟରେ ସମୁଦାୟ କରୋନାଭାଇରସ୍ ଆକ୍ରାନ୍ତଙ୍କ ସଂଖ୍ୟା ୫ରେ ସୀମିତ ଅଛି।
ରାଜ୍ୟରେ ସଂକ୍ରମିତ ୫ମ ବ୍ୟକ୍ତିଜଣକ ବିଦେଶ ଯାତ୍ରା କରି ନ ଥିଲେ । ତେଣୁ ସେ କେମିତି କରୋନାଭାଇରସ୍ ଆକ୍ରାନ୍ତ ହେଲେ ତାହା ଚିନ୍ତାର କାରଣ । କରୋନାଭାଇରସ୍ ପ୍ରତିହତ କରିବାକୁ ଏ ସପ୍ତାହଟି ହେଉଛି ଗୁରତ୍ୱପୂର୍ଣ୍ଣ।
ସେ ଆହୁରି କହିଲେ କି, ସମ୍ପ୍ରତି ରାଜଧାନୀ ଭୁବନେଶ୍ୱରରେ କରୋନାଭାଇରସ୍ ସଂକ୍ରମଣ ୮୦%ରେ ଥିବା ବେଳେ ଭଦ୍ରକ ସହର ୨୦%ରେ ରହିଛି ।
ଭାରତ ସରକାର ଘୋଷଣା କରିଥିବା ୨୧ ଦିନିଆ ଲକଡାଉନରେ କେତେକ ତ୍ରୁଟିବିଚୁ୍ୟତି ରହିଛି । ତେଣୁ ରାଜ୍ୟ ଏହି ଦୁଇଟି ସହରରେ ସମ୍ପୂର୍ଣ୍ଣ ସଟଡାଉନ୍ ସମୟରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ନିୟମ ଆଧାରରେ ସାଇଣ୍ଟିଫିକ୍ ଟ୍ରାକିଙ୍ଗ୍ ଏବଂ ଟ୍ରେସିଙ୍ଗ୍ କରାଯିବ ।
ପୁଲିସ ମହାନିର୍ଦେଶକ ଅଭୟ କହିଲେ କି, ଏହି ସଟଡାଉନ୍ କର୍ଫ୍ୟୁ ସହ ସମାନ । ୨୧ ଦିନିଆ ଲକଡାଉନ୍ ପାଇଁ ଜାରି ହୋଇଥିବା ସମସ୍ତ ଜରୁରୀକାଳୀନ ପାସ୍ ଏହି ୪୮ ଘଣ୍ଟା ପାଇଁ ପ୍ରତ୍ୟାହାର କରିନିଆଯିବ । ମାତ୍ର ଅଳ୍ପ କେତୋଟି ଔଷଧ ଦୋକାନ ଖୋଲା ରହିବା ସହ ତେଜରାତି, ପନିପରିବା, କ୍ଷୀର ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ବିକ୍ରୟ କରୁଥିବା ସମସ୍ତ ପ୍ରତିଷ୍ଠାନ ବନ୍ଦ ରହିବ । ଭୁବନେଶ୍ୱରରେ କେତୋଟି ଔଷଧ ଦୋକାନ ଖୋଲା ରହିବ ତାହା ଭୁବନେଶ୍ୱର ମହାନଗର ନିଗମ କହିବ ଏବଂ ଭଦ୍ରକ ସହର ପାଇଁ ଏହା ଜିଲ୍ଲାପାଳ ସ୍ଥିର କରିବେ ।
ଜରୁରୀ ସେବାରେ ନିୟୋଜିତ ଡାକ୍ତର, ଟେଲିଯୋଗାଯୋଗ କର୍ମଚାରୀମାନେ ଏହି ୪୮ ଘଣ୍ଟିଆ ସଟଡାଉନରେ ଯାତାୟାତ କରିବାକୁ ୧୦୦କୁ ଡାଏଲ୍ କରି ନୂଆ ପାସ୍ ପାଇ ପାରିବେ ।ଏହି ସମୟ ମଧ୍ୟରେ କୌଣସି ବ୍ୟକ୍ତି ସାମାନ୍ୟ ଅସୁସ୍ଥ ହେଲେ ଡାକ୍ତରଖାନା ନ ଯିବା ଉଚିତ ବୋଲି ପୁଲିସ ମହାନିର୍ଦେଶକ ପରାମର୍ଶ ଦେଇଛନ୍ତି । ଏହା ସେ କହିଛନ୍ତି ଯେ ବହୁସଂଖ୍ୟକ ସରକାରୀ ଓ ଘରୋଇ ଆମ୍ବୁଲାନସ୍ ସେବା ବ୍ୟବସ୍ଥା କରାଯାଉଛି । ତେଣୁ କେହି ଅଧିକ ଅସୁସ୍ଥ ଅନୁଭବ କଲେ ଆମ୍ବୁଲନସ୍ ଡକାଇ ଡାକ୍ତରଖାନା ଯାଇ ପାରିବେ ।
ସେ ସ୍ପଷ୍ଟ କରାଇ କହିଛନ୍ତି ଯେ ଜାତୀୟ ରାଜପଥରେ ମାଲ ପରିବହନ କରୁଥିବା ଯାନବାହନ ଉପରେ ଏହି ୪୮ଘଣ୍ଟାରେ କୌଣସି କଟକଣା ରହିବ ନାହିଁ ।