୧୦ ବିମାନବନ୍ଦର ଘରୋଇକରଣ ହେବ: ତାଲିକାରେ ଭୁବନେଶ୍ବର ବିମାନବନ୍ଦର

ନୂଆଦିଲ୍ଲୀ: କେନ୍ଦ୍ର ସରକାର ଆଉ ୧୦ଟି ବିମାନବନ୍ଦରକୁ ଘରୋଇ ସଂସ୍ଥା ହାତକୁ ଟେକି ଦେବା ଲାଗି‌ ଯୋଜନା କରିଛନ୍ତି। ଘରୋଇ-ସରକାରୀ ସହଭାଗିତା (ପିପିପି) ମୋଡ୍‌ରେ ଏହି ବିମାନବନ୍ଦରଗୁଡ଼ିକୁ ଲିଜ୍‌ରେ ଦେବା ଲାଗି ଆଲୋଚନା ପ୍ରକ୍ରିୟା ଆରମ୍ଭ ହୋଇଛି। ଜାତୀୟ ମନେଟାଇଜେସନ୍ ପାଇପ୍‌ଲାଇନ୍‌ ଅଧୀନରେ ୨୦୨୨ରୁ ୨୦୨୫ ମଧ୍ୟରେ ୨୫ଟି ବିମାନବନ୍ଦରର ଘରୋଇକରଣ କରିବାକୁ ଲକ୍ଷ୍ୟ ରହିଛି। ଭୁବନେଶ୍ବର, ବାରାଣସୀ, ଅମୃତସର ଓ କୋଏମ୍ବାଟୁର ବିମାନବନ୍ଦରର ଘରୋଇକରଣ ଲାଗି ପ୍ରକ୍ରିୟା ଆରମ୍ଭ ହୋଇଛି। ଗତବର୍ଷ ବିଭିନ୍ନ ରାଜ୍ୟରେ ନିର୍ବାଚନ ଓ ଲୋକସଭା ନିର୍ବାଚନ ରହିବାରୁ ବିମାନବନ୍ଦର ଘରୋଇକରଣ ପ୍ରତି ଧ୍ୟାନ ଦିଆଯାଇନଥିଲା। ୨୦୨୫-୨୬ ବଜେଟ୍‌ରେ ଏ ସମ୍ପର୍କରେ ଘୋଷଣା ଆଶା କରାଯାଉଥିଲା। କିନ୍ତୁ ନିର୍ଦ୍ଦିଷ୍ଟ ଭାବେ କିଛି ଘୋଷଣା ହୋଇନଥିଲା।

ପୂର୍ବରୁ ହୋଇଥିବା ଘରୋଇକରଣଗୁଡ଼ିକରେ ଅଧିକାଂଶ ବିମାନବନ୍ଦର ଆଦାନୀ ଗ୍ରୁପ୍‌କୁ ମିଳିଥିଲା। ବର୍ତ୍ତମାନ ଏହା ଥିରୁବନନ୍ତପୂରମ, ମାଙ୍ଗା‌ଲୁରୁ, ଅହମ୍ମଦାବାଦ, ଜୟପୁର, ଲକ୍ଷ୍ନୌ ଓ ଗୌହାଟୀ ବିମାନବନ୍ଦରର ପରିଚାଳନା କରୁଛି। ୨୦୧୯ରେ କମ୍ପାନି ଏହି ବିମାନବନ୍ଦରଗୁଡ଼ିକୁ ହାସଲ କରିଥିଲା। ଆଗାମୀ ଦିନରେ ହେବାକୁ ଥିବା ଘରୋଇକରଣରେ ଭାଗ ନେବାକୁ ମଧ୍ୟ କମ୍ପାନି ଆଗ୍ରହୀ ରହିଛି। ଭୁବନେଶ୍ବର ବିମାନବନ୍ଦର ଲାଗି ଏହା ବିଡ୍ ଦାଖଲ କରିବା ଆଶା କରାଯାଉଛି। ଭୁବନେଶ୍ବର ବିମାନବନ୍ଦର ଘରୋଇକରଣକୁ ବିଜୁ ଜନତା ଦଳ (ବିଜେଡି) ବିରୋଧ କରୁଛି। ଗତବର୍ଷ ବିଜେଡ଼ି ନେତା ଦିବ୍ୟ ଶଙ୍କର ମିଶ୍ର କହିଥିଲେ ଯେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ଘରୋଇକରଣର ଯେକୌଣସି ପ୍ରସ୍ତାବକୁ ଓଡ଼ିଶାବାସୀ ବି‌ରୋଧ କରିବେ। ସଂସଦ ଓ ବିଧାନସଭା ସାମ୍ନାରେ ବିଜେଡି ସାଂସଦ ଓ ବିଧାୟକମାନେ ପ୍ରତିବାଦ କରିବେ ବୋଲି ସେ କହିଥିଲେ।