ମାଗଣାରେ ବାଣ୍ଟିବାକୁ ଅନୁମତି ନ ମିଳିବାରୁ ପୋଡିଦିଆଗଲା ୨ କୋଟି ଟଙ୍କାର ୨୬ ଟନ ଆଇସକ୍ରିମ
ମୁମ୍ବାଇ: ମାଗଣାରେ ବାଣ୍ଟିବାକୁ ଅନୁମତି ନ ମିଳିବାରୁ ଶେଷରେ ପୋଡିଦିଆଗଲା ୨୬ ଟନ ଆଇସକ୍ରିମ | ଲକଡାଉନ୍ ମଧ୍ୟରେ ମୁମ୍ବାଇରୁ ଏଭଳି ଏକ ଖବର ଆସିଛି | ମିଳିଥିବା ସୂଚନା ମୁତାବକ ମୁମ୍ବାଇର ନାଚୂରାଲ୍ସ ଆଇସ୍କ୍ରିମ୍ ପକ୍ଷରୁ ଖରାଦିନକୁ ଦେଖି ମାର୍ଚ୍ଚ ମାସରେ ୪୫୦୦୦ ଛୋଟ ବାକ୍ସରେ ୨୬ ଟନ ଆଇସକ୍ରିମ ପ୍ରସ୍ତୁତ କରାଯାଇଥିଲା | କିନ୍ତୁ ମହାରାଷ୍ଟ୍ର ସରକାର ମାର୍ଚ୍ଚ ୨୦ ରୁ ରାଜ୍ୟରେ ଲକଡାଉନ ଘୋଷଣା କରିଥିଲେ | ସେହିପରି କରୋନା ସଂକ୍ରମଣ ହେତୁ ଆଇସକ୍ରିମର ବ୍ୟବହାର ବହୁ ମାତ୍ରାରେ ହ୍ରାସ ପାଇଥିଲା। ନାଚୂରାଲ୍ସ ଆଇସ୍କ୍ରିମର ଉପାଧ୍ୟକ୍ଷ ହେମନ୍ତ ନାଇକ କହିଛନ୍ତି ଏହା ଏକ କ୍ଷୀର ଉତ୍ପାଦ ହୋଇଥିବାରୁ ଆଇସକ୍ରିମର କିଛି ନିର୍ଦ୍ଦିଷ୍ଟ ସମୟସୀମା ଥାଏ | ଯେତେବେଳେ ଉଭୟ ରାଜ୍ୟ ସରକାର ଓ କେନ୍ଦ୍ର ସରକାର ଲକଡାଉନ ଘୋଷଣା କରିଥିଲେ ଆମେ ଆଉ ବଜାରକୁ ଛାଡିପାରିନଥିଲୁ |
Sambad is now on WhatsApp
Join and get latest news updates delivered to you via WhatsApp
ଏହା ପରେ କମ୍ପାନୀ ଚେଷ୍ଟା କରିଥିଲା ଯେ ଏହି ଆଇସ୍କ୍ରିମ୍ ନଷ୍ଟ ହେବା ପୂର୍ବରୁ ଗରିବ ଲୋକଙ୍କ ମଧ୍ୟରେ ବଣ୍ଟନ କରାଯିବା ଉଚିତ୍ | କମ୍ପାନୀ ଏଥିପାଇଁ ବ୍ରିହାନମୁମ୍ବାଇ ମ୍ୟୁନିସିପାଲିଟି କର୍ପୋରେସନ୍ (ବିଏମସି) ଏବଂ ପୁଲିସର ଅନୁମତି ମାଗିଥିଲା | କିନ୍ତୁ ପ୍ରଶାସନ କେବଳ ଜରୁରୀ ଦ୍ରବ୍ୟ ବଣ୍ଟନ ପାଇଁ ଅନୁମତି ଦେଉଥିଲା | ଯେହେତୁ ଆଇସ୍କ୍ରିମ୍ ଏକ ଜରୁରୀ ବସ୍ତୁ ଭାବରେ ବିବେଚନା କରାଯାଉ ନଥିଲା ଏହା ନଷ୍ଟ ହୋଇଯାଇଥିଲା | ତେବେ ଏତେ ମାତ୍ରାରେ ଆଇସକ୍ରିମ ନଷ୍ଟ ହୋଇଯାଇଥିବାରୁ ଏହାକୁ କେଉଁଠି ଫିଙ୍ଗାଯିବ ତାହାକୁ ନେଇ ସମସ୍ୟା ସୃଷ୍ଟି ହୋଇଥିଲା |
ତେଣୁ କମ୍ପାନୀ ସଞ୍ଜୀବନୀ ଏସ୩ ନାମକ ଏକ ବାୟୋଗ୍ୟାସ କମ୍ପାନୀ ସହ ଯୋଗାଯୋଗ କରିଥିଲା | ସଞ୍ଜୀବନୀ ଏସ୩ ଏହି ୨୬ ଟନ ଆଇସକ୍ରିମକୁ ନେଇ ବାୟୋଗ୍ୟାସ ପ୍ରସ୍ତୁତ କରିଥିଲା | ତେବେ ଲକଡାଉନ୍ ହେତୁ ଏହି ଗ୍ୟାସ୍ ମଧ୍ୟ କୌଣସି ସ୍ଥାନରେ ବ୍ୟବହୃତ ହୋଇପାରିଲା ନାହିଁ ଏବଂ ସେହିଭଳି ପୋଡି ଦିଆଯାଇଥିଲା | ନାଚୂରାଲ୍ସ ଆଇସ୍କ୍ରିମର ଉପାଧ୍ୟକ୍ଷ ହେମନ୍ତ ନାଇକ କହିଛନ୍ତି ଯେ ଏହି ଆଇସକ୍ରିମ୍ ନଷ୍ଟ ହେବା ଦ୍ୱାରା କମ୍ପାନୀ ପ୍ରାୟ ୨ କୋଟି ଟଙ୍କା କ୍ଷତି ସହିଛି।