ଭୁବନେଶ୍ବର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସରକାର ବୃହତ୍‌ ଶିଳ୍ପ କ୍ଷେତ୍ର ପାଇଁ ପୁଞ୍ଜିନିବେଶ ହାସଲ କରିବାରେ ବିଶେ‌ଷ ସଫଳତା ହାସଲ କରିଛନ୍ତି। ୨୦୨୪ ନଭେମ୍ବରରୁ ୨୦୨୫ ମେ’ (୭ ମାସ) ମଧ୍ୟରେ ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କର୍ତ୍ତୃପକ୍ଷ ଓ ଉଚ୍ଚସ୍ତରୀୟ ମଞ୍ଜୁରି କର୍ତ୍ତୃପକ୍ଷ ୩ ଲକ୍ଷ କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପ ମଞ୍ଜୁର କରିଛନ୍ତି। ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେଲେ ୧.୩ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ। ନେସ୍‌ଲେ ଇଣ୍ଡିଆ, ବରୁଣ ବେଭରେଜେସ୍, ଏପିକ୍ ଗ୍ରୁପ୍ ଭଳି ସଂସ୍ଥା ଓଡ଼ିଶାରେ ନିବେଶ ଘୋଷଣା କରିଛନ୍ତି। ସବୁଜ ଶକ୍ତି କ୍ଷେତ୍ରରେ ରାଜ୍ୟ ସରକାର ୧.୩୬ ଲକ୍ଷ କୋଟି ଟଙ୍କାର ୨୦ଟି ପ୍ରମୁଖ ପ୍ରକଳ୍ପକୁ ଅନୁମୋଦନ ଦେଇଛନ୍ତି। 
ସେହିପରି, ଆର୍ଥିକ ବର୍ଷ ୨୦୨୪-୨୫ରେ ରାଜ୍ୟ ସରକାର ୨୦୦୦ରୁ ଅଧିକ ଷ୍ଟାର୍ଟଅପ୍‌କୁ ମାନ୍ୟତା ପ୍ରଦାନ କରିଛନ୍ତି। ଇନ୍‌କ୍ୟୁବେସନ, ଉତ୍ପାଦ ବିକାଶ ଓ ବଜାରରେ ପହଞ୍ଚିବା ଲାଗି ଷ୍ଟାର୍ଟଅପ୍‌ଗୁଡ଼ିକୁ ୨୫.୪୮ କୋଟି ଟଙ୍କା ଆବଣ୍ଟନ କରିଛନ୍ତି। ସେମାନଙ୍କ ସହାୟତା ପାଇଁ ୨୫ କୋଟି ଟଙ୍କାର ଓଡ଼ିଶା ଷ୍ଟାର୍ଟଅପ୍ ଗ୍ରୋଥ୍‌ ଫଣ୍ଡ୍‌ ମଧ୍ୟ ରହିଛି। ରାଜ୍ୟରେ ଷ୍ଟାର୍ଟଅପ୍, ଏମ୍‌ଏସ୍‌ଏମ୍‌ଇ ଓ ବୃହତ୍‌ ଓ ଆନୁଷଙ୍ଗିକ ଶିଳ୍ପ ପ୍ରତି ଧ୍ୟାନ ଦିଆଯାଉଛି। 
ସୂଚନା ଅନୁସାରେ ରାଜ୍ୟ ସରକାର ୩୦ଟି ଏମ୍ଏସ୍‌ଏମ୍‌ଇ ପାର୍କ ବିକାଶ କରିବାକୁ ଯୋଜନା ରଖିଛନ୍ତି। ସେଥିରୁ ୧୪ଟି ପାର୍କ ପାଇଁ ଜମି ଚିହ୍ନଟ ପ୍ରକ୍ରିୟା ଶେଷ ହୋଇଛି। ରାଜ୍ୟରେ ଥିବା ପ୍ରମୁଖ ଶିଳ୍ପାଞ୍ଚଳ ଯଥା ମଞ୍ଚେଶ୍ବର, ଜଗତପୁର ଓ ଖୋର୍ଦ୍ଧା ଶିଳ୍ପାଞ୍ଚଳରେ ଭିତ୍ତିଭୂମିର ବିକାଶ କରାଯାଉଛି। ସେଥିରେ ୧୫୨.୩୦ କୋଟି ଟଙ୍କା ବିନିଯୋଗ କରାଯାଉଥିବା ଜଣାପଡ଼ିଛି। ୨୦୨୪-୨୫‌ରେ ଶିଳ୍ପ ବିଭାଗର ଯେଉଁ ୯୧୫ କୋଟି ଟଙ୍କାର ବଜେଟ୍‌ ଥିଲା, ତାହାର ୯୫ ପ୍ରତିଶତ ରାଶିକୁ ଲଜି‌ଷ୍ଟିକ୍ସ ପାର୍କ, ଶ୍ରମଶକ୍ତିଙ୍କ ପାଇଁ ଆବାସିକ ପ୍ରକଳ୍ପ, ବୟନ ପାର୍କ ଏବଂ ଏଫ୍ଲୁଏଣ୍ଟ୍‌ ଟ୍ରିଟ୍‌ମେଣ୍ଟ ପ୍ଲାଣ୍ଟ୍‌ ସ୍ଥାପନ କରିବାରେ ବ୍ୟବହାର କରାଯାଇଛି।