ଶେଷ ହେଲା ୫ଜି ନିଲାମ, ସରକାର ପାଇବେ ଦେଢ ଲକ୍ଷ କୋଟି
ନୂଆଦିଲ୍ଲୀ : ଗତ ମଙ୍ଗଳବାରଠାରୁ ଆରମ୍ଭ ହୋଇଥିବା ୫ଜି ସ୍ପେକ୍ଟ୍ରମ ଶୁକ୍ରବାରଦିନ ଶେଷ ହୋଇଛି । ଏହି ୪ଦିନରେ ମୋଟ ୨୩ ରାଉଣ୍ଡ ବିଡିଂ ହୋଇଥିଲା । ଶୁକ୍ରବାର ଅର୍ଥାତ ଚୁଡ଼ାନ୍ତ ଦିନରେ ପ୍ରାୟ ୭ ରାଉଣ୍ଡ ବିଡିଂ ହୋଇଥିଲା । ଏହି ନିଲାମରୁ ସରକାର ମୋଟ ୧ ଲକ୍ଷ ୪୯ ହଜାର ୮୫୫ କୋଟି ଟଙ୍କା ପାଇଛନ୍ତି ବୋଲି କେନ୍ଦ୍ର ଟେଲିକମ ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ମଙ୍ଗଳବାରଠାରୁ ଆରମ୍ଭ ହୋଇଥିବା ୫ଜି ଟେଲିକମ ନିଲାମ ୨ୟ ଦିନ ହିଁ ଶେଷ ବୋଲି ପୂର୍ବରୁ ଆଶା କରାଯାଉଥିବାବେଳେ ତାହା ୪ ଦିନ ପର୍ଯ୍ୟନ୍ତ ଚାଲିଥିଲା । ଗତ ବର୍ଷ ହୋଇଥିବା ୪ଜି ସ୍ପେକ୍ଟ୍ରମ ନିଲାମ ୨ ଦିନରେ ଶେଷ ହୋଇଯାଇଥିଲା ।
୫-ଜି ନିଲାମରେ ଦେଶର ପ୍ରମୁଖ ଟେଲିକମ କମ୍ପାନି ଜିଓ, ଏୟାରଟେଲ, ଭୋଡାଫୋନ ଆଇଡିଆ ଆଦି ଅଂଶଗ୍ରହଣ କରୁଛନ୍ତି । ସେହିପରି ପ୍ରଥମ ଥର ପାଇଁ ଅଦାନୀ ଗ୍ରୁପ ବି ଏହି ନିଲାମରେ ଅଂଶଗ୍ରହଣ କରୁଛି । ଅଦାନୀ ଗ୍ରୁପ ଅଧିନସ୍ଥ ନବଗଠିତ ଅଦାନୀ ଡାଟା ନେଟଓ୍ବାର୍କ୍ସ ଏଥିରେ ଅଂଶଗ୍ରହଣ କରୁଛି । ଶୁକ୍ରବାର ଶେଷ ହୋଇଥିବା ୫-ଜି ସ୍ପେକ୍ଟ୍ରମ ନିଲାମରେ ମୋଟ ୭୨ ଗିଗାହଜ୍ ସ୍ପେକ୍ଟ୍ରମ ନିଲାମ ହୋଇଥିଲା ।
ଭାରତରେ ଚଳିତ ବର୍ଷ ଶେଷସୁଦ୍ଧା କେତେକ ନିର୍ଦ୍ଦିଷ୍ଟ ସହରରେ ୫ଜି ସେବା ଆରମ୍ଭ ହେବ ।