ନୂଆଦିଲ୍ଲୀ : ୨୦୧୬ରେ ହୋଇଥିବା ବିମୁଦ୍ରିକରଣକୁ ଇତି ମଧ୍ୟରେ ୬ ବର୍ଷ ପୂରଣ ହୋଇଛି । ଏହି ପ୍ରସଙ୍ଗରେ ଆଜି ବିରୋଧୀ ଦଳମାନେ ସରକାରଙ୍କୁ ଟାର୍ଗେଟ୍ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କଂଗ୍ରେସ ନେତା ରାହୁଲ ଗାନ୍ଧି କହିଛନ୍ତି ଯେ ବିମୁଦ୍ରିକରଣକୁ ପେପିଏମ୍ (ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ) ଜାଣିଶୁଣି କରିଥିଲେ ଯଦ୍ବାରା କି ତାଙ୍କର ୨-୩ ଜଣ କୋଟିପତି ବନ୍ଧୁ ଅର୍ଥନୀତିକୁ ନିଜ ହାତମୁଠାରେ ରଖିପାରିବେ ।
କଂଗ୍ରେସ ପକ୍ଷରୁ ଏକ ଟୁଇଟ କରି କୁହାଯାଇଛି ଯେ, ୬ ବର୍ଷ ପୂର୍ବେ ନରେନ୍ଦ୍ର ମୋଦୀ ମନଇଚ୍ଛା କରିଥିବା ବିମୁଦ୍ରିକରଣ ଭାରତକୁ ଏକ ଡିଜିଟାଲ ଇକୋନୋମି କରିବାରେ ବିଫଳ ହୋଇଥିଲା । ଏବେ ଦେଶରେ ୩୦.୮୮ ଲକ୍ଷ କୋଟିର ନଗଦ ଟଙ୍କା ରହିଛି ।
ସେହିପରି ତୃଣମୂଳ କଂଗ୍ରେସ ପକ୍ଷରୁ କୁହାଯାଇଛି ଯେ ବିନା ଯୋଜନାରେ କରାଯାଇଥିବା ଏହି ନୀତି ସଂପୂର୍ଣ୍ଣଭାବେ ବିଫଳ ହୋଇଯାଇଥିଲା । ମାର୍କେଟ୍ କ୍ରାସ କରିଗଲା, ଅର୍ଥନୀତି ମାନ୍ଦା ହୋଇଗଲା, କିନ୍ତୁ କଳାଧନ ଏବେ ବି ଅଛି ।
ଟିଏମସି ନେତା ଡେରେକ ଓବ୍ରାଏନ କହିଛନ୍ତି ଯେ ୬ ବର୍ଷ ତଳେ କରାଯାଇଥିବା ଏକ କିମିଆ ସଂପୂର୍ଣ୍ଣ ବିଫଳ ପ୍ରମାଣିତ ହୋଇଥିଲା ଓ ଦେଶ ପାଇଁ ଏକ ଅର୍ଥନୈତିକ ଗଣହତ୍ୟାରେ ପରିଣତ ହୋଇଥିଲା ।
କେନ୍ଦ୍ର ସରକାର ଗତ ୨୦୧୬, ନଭେମ୍ବର ୮ ରେ ବିମୁଦ୍ରିକରଣ ଘୋଷଣା କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟିଭିରେ ଏ ନେଇ ଘୋଷଣା କରିବା ପରେ ଦେଶରେ ଚହଳ ପଡ଼ିଯାଇଥିଲା । ସରକାରଙ୍କ ଅନୁସାରେ ଏହାର ଏକ ମୁଖ୍ୟ ଲକ୍ଷ୍ୟ ଥିଲା ଦେଶରୁ ଜାଲ ନୋଟ କାରବାରକୁ ସମାପ୍ତ କରିବା । କିନ୍ତୁ ଏହାର ୬ ବର୍ଷ ପରେ ବି ଦେଶରେ ଜାଲ ନୋଟ କାରବାର ବଢିଚାଲିଛି ।