ନୂଆଦିଲ୍ଲୀ : ବିଏସଏନଏଲରେ କାମ କରୁଥିବା ଭାରତୀୟ ଦୂରସଂଚାର ସେବା ଅଧିକାରୀଙ୍କ ବକେୟା ଦରମା ତୁରନ୍ତ ପ୍ରଦାନ ପାଇଁ କେନ୍ଦ୍ର ସରକାରଙ୍କ ଦୂରସଂଚାର ବିଭାଗ ପକ୍ଷରୁ କୁହାଯାଇଛି । ବିଭାଗ ପକ୍ଷରୁ ବିଏସଏନଏଲ ସିଏମଡିଙ୍କୁ ଏକ ପତ୍ର ଲେଖି ଏହି ନିର୍ଦ୍ଦେଶ ଦିଆଯାଇଛି । ସୂଚନାଯୋଗ୍ୟ ଯେ ବିଏସଏନଏଲରେ କାର୍ଯ୍ୟ କରୁଥିବା ଭାରତୀୟ ଦୂରସଂଚାର ସେବା ଅଧିକାରୀମାନେ ହେଉଛନ୍ତି କେନ୍ଦ୍ର ସରକାରଙ୍କ କର୍ମଚାରୀ ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ବିଏସଏନଏଲ ପକ୍ଷରୁ ସ୍ୱେଚ୍ଛାକୃତ ଅବସର ଯୋଜନା(ଭିଆରଏସ) ଘୋଷଣା ହେବାର ଏକ ସପ୍ତାହ ମଧ୍ୟରେ ଏପର୍ଯ୍ୟନ୍ତ ପ୍ରାୟ ୭୦ ହଜାର କର୍ମଚାରୀ ଏଥିଲାଗି ଆବେଦନ କରିସାରିଲେଣି ବୋଲି ବିଏସଏନଏଲ ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ପି.କେ. ପୁରଓ୍ଵାର କହିଛନ୍ତି ।
ସାରା ଦେଶରେ ବିଏସଏନଏଲରେ ମୋଟ ପ୍ରାୟ ଦେଢ ଲକ୍ଷ କର୍ମଚାରୀ ଅଛନ୍ତି । ୭୦ ହଜାର କର୍ମଚାରୀ ଅର୍ଥାତ ପ୍ରାୟ ଅଧା କର୍ମଚାରୀ ଭିଆରଏସ ନେବାପରେ କମ୍ପାନି ପ୍ରାୟ ୭ ହଜାର କୋଟି ଟଙ୍କା ସଂଚୟ କରିପାରିବ । ତେବେ ଭିଆରଏସ ପାଇଁ ଆବେଦନ କରିବାର ଶେଷ ତାରିଖ ଡିସେମ୍ବର ୩ ଥିବାରୁ ଆହୁରି ଅଧିକ କର୍ମଚାରୀ ଭିଆରଏସ ନେଇପାରନ୍ତି ବୋଲି କମ୍ପାନି ଆଶା କରୁଛି ।
ସୂଚନାଯୋଗ୍ୟ ଯେ, ଗତ ଅକ୍ଟୋବର ୨୩ ତାରିଖରେ ସରକାର ବିଏସଏନଏଲର ପୁନରୁଦ୍ଧାର ଯୋଜନାକୁ ମଂଜୁରୀ ଦେଇଥିଲେ । ଏହା ସହିତ ବିଏସଏନଏଲ-ଏମଟିଏନଏଲ ମିଶ୍ରଣକୁ ମଂଜୁରୀ ଦେଇଥିଲେ । ଏହା ସହିତ ସରକାର ଏହି କମ୍ପାନିରେ ପ୍ରାୟ ୨୯,୯୩୭ କୋଟି ଟଙ୍କାର ପୁଞ୍ଜି ଭର୍ତ୍ତି କରିବେ ବୋଲି ଘୋଷଣା କରିଥିଲେ । ଏଥିପାଇଁ ସୋଭେରିନ ବଣ୍ଡ ଜାରି କରି ବଜାରରୁ ୧୫ ହଜାର କୋଟି ଟଙ୍କା ସଂଗ୍ରହ କରାଯିବ । ଏହାଛଡା ଆସନ୍ତା ୪ ବର୍ଷରେ ୩୮ ହଜାର କୋଟି ଟଙ୍କାର ସଂପତ୍ତିକୁ ବିକ୍ରି କରାଯିବ ବୋଲି ସରକାର ଘୋଷଣା କରିଥିଲେ ।