ଆସନ୍ତା ମାସରୁ ବଢିପାରେ ଟିଭି, ଏସି, ଫ୍ରିଜ ଓ ଲାପଟପର ମୂଲ୍ୟ

ନୂଆଦିଲ୍ଲୀ: ଯଦି ଆପଣ ଟିଭି, ଫ୍ରିଜ୍, ଏସି କିମ୍ବା ଲାପଟପ୍ କିଣିବାକୁ ଚିନ୍ତା କରୁଛନ୍ତି, ତେବେ ଏହି ମାସ କିଣନ୍ତୁ କାରଣ ଆସନ୍ତା ମାସରୁ ଏଗୁଡ଼ିକର ମୂଲ୍ୟ ବୃଦ୍ଧି ହେବାକୁ ଯାଉଛି | କମ୍ପାନୀଗୁଡିକ କହିଛନ୍ତି ଯେ କ୍ରମାଗତ ଭାବେ ଦ୍ରବ୍ୟ ମୂଲ୍ୟ ବଢିବା ସହ ଏବଂ ଅତ୍ୟାବଶ୍ୟକ ଉପାଦାନର ଅଭାବ ହେତୁ ସେମାନଙ୍କ ଉପରେ ବୋଝ ପଡୁଛି | ଆଉ ଏହି ବୋଝକୁ ହାଲୁକା କରିବା ପାଇଁ ମୂଲ୍ୟ ବୃଦ୍ଧି କରାଯିବ | ଅନ୍ୟପଟେ ୱାର୍କ ଫ୍ରମ ହୋମ ସହ ଅନଲାଇନ କ୍ଲାସ ଯୋଗୁଁ ଲାପଟପ୍ ର ମୂଲ୍ୟ ମଧ୍ୟ ବୃଦ୍ଧି ପାଇଛି |

୨ ମାସର ଲକଡାଉନ ପରେ ବ୍ୟବସାୟୀମାନେ ପୁଣି ଥରେ ଦୋକାନ ଖୋଲିଛନ୍ତି, ତେଣୁ ଗ୍ରାହକଙ୍କୁ ବଡ଼ ରିହାତିର କମ୍ ବିକଳ୍ପ ମିଳିବ | ଚଳିତ ବର୍ଷ ଜାନୁୟାରୀ ଆରମ୍ଭରୁ ଟିଭି, ଫ୍ରିଜ୍, ଏସି ଏବଂ ଲାପଟପ୍ ପରି ସାମଗ୍ରୀର ମୂଲ୍ୟ ବୃଦ୍ଧି ପାଇଛି। ଆଉ ଆସନ୍ତା ମାସରୁ କମ୍ପାନୀଗୁଡିକ ପୁଣି ୧୦ ପ୍ରତିଶତ ମୂଲ୍ୟ ବୃଦ୍ଧି କରିବାକୁ ଯୋଜନା କରୁଛନ୍ତି | ମୂଲ୍ୟ ବୃଦ୍ଧି ପଛରେ କମ୍ପାନୀଗୁଡିକ ଅନେକ କାରଣ କହିଛନ୍ତି |

ଉଦାହରଣ ସ୍ୱରୂପ, ମାଇକ୍ରୋପ୍ରୋସେସର ଏବଂ ପ୍ୟାନେଲ ପରି ଅତ୍ୟାବଶ୍ୟକ ଉପାଦାନଗୁଡ଼ିକର ଅଭାବ, କଞ୍ଚାମାଲ ଏବଂ ତମ୍ବାର ମୂଲ୍ୟରେ ବୃଦ୍ଧି ହେବା ସାଙ୍ଗକୁ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବା ପାଇଁ କଷ୍ଟମ୍ ଡ୍ୟୁଟିର ବୃଦ୍ଧି ହେତୁ ମୂଲ୍ୟ ମଧ୍ୟ ବୃଦ୍ଧି ପାଇଛି।