ବିପଦରେ ମୁକେଶ ଅମ୍ବାନିଙ୍କ ୧ନଂ ଧନୀ ଆସନ, ଟପିଗଲେ ଗୌତମ ଅଦାନି
ମୁମ୍ବାଇ : ବିଗତ ପ୍ରାୟ କିଛି ବର୍ଷ ହେବ ଭାରତ ତଥା ଏସିଆର ୧ ନମ୍ବର ଧନୀ ମାନ୍ୟତା ପାଇଥିବା ଭାରତୀୟ ଶିଳ୍ପପତି ତଥା ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନିଙ୍କ ଆସନ ଟଳମଳ ହୋଇଯାଇଛି । ଅନ୍ୟତମ ଭାରତୀୟ ଶିଳ୍ପପତି ତଥା ଅଦାନି ଗ୍ରୁପ ଅଧ୍ୟକ୍ଷ ଗୌତମ ଅଦାନି ତାଙ୍କୁ ୧ ନମ୍ବର ଆସନରୁ କିଛି ସମୟ ପାଇଁ ହଟାଇବାରେ ସଫଳ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବୁଧବାର ଦିନ ଷ୍ଟକ ବଜାରରେ ରିଲାଏନ୍ସ ଇଣ୍ଡଷ୍ଟ୍ରିଜର ସେୟାର ମୂଲ୍ୟ ହ୍ରାସ ପାଇଥିବା ବେଳେ ଅଦାନୀ ଗ୍ରୁପର ସେୟାର ମୂଲ୍ୟ ବୃଦ୍ଧି ପାଇଥିଲା । ଏହା ଫଳରେ ରିଲାଏନ୍ସ ଇଣ୍ଡଷ୍ଟ୍ରିଜର ମାର୍କେଟ କ୍ୟାପିଟାଲାଇଜେସନ (ବଜାର ପୁଞ୍ଜି) ହ୍ରାସ ପାଇଥିଲା ଓ ମୁକେଶଙ୍କ ସଂପତ୍ତି ମଧ୍ୟ କମିଥିଲା । ଏହା ଫଳରେ ଗୌତମ ଅଦାନି କିଛି ସମୟ ପାଇଁ କେବଳ ଭାରତ ନୁହେଁ ସମଗ୍ର ଏସିଆର ୧ନମ୍ବର ଧନୀରେ ପରିଣତ ହୋଇଯାଇଥିଲେ । ପରେ ପୁଣି ମୁକେଶ ନିଜର ୧୧ନମ୍ବର ଆସନ ଫେରି ପାଇଥିଲେ ।
ବ୍ଲୁମ୍ବର୍ଗ ବିଲିୟନେର ଇଣ୍ଡେକ୍ସ ଅନୁସାରେ ଏବେ ମୁକେଶଙ୍କ ମୋଟ ସଂପତ୍ତିର ପରିମାଣ ୯୧ ବିଲିୟନ ଡଲାର ଥିବାବେଳେ ଗୌତମଙ୍କ ସଂପତ୍ତିର ପରିମାଣ ପ୍ରାୟ ୮୯ ବିଲିୟନ ଡଲାର ରହିଛି ।
ସାଉଦି ଆରାମକୋ ସହ ରିଲାଏନ୍ସ ଇଣ୍ଡଷ୍ଟ୍ରିଜ କରିଥିବା ଚୁକ୍ତି ରଦ୍ଦ ହେବା ପରେ ବିଗତ କିଛି ଦିନ ହେବ ରିଲାଏନ୍ସର ସେୟାର ମୂଲ୍ୟ ହ୍ରାସ ପାଇଚାଲିଛି । ଅନ୍ୟପକ୍ଷରେ ଗତ ପ୍ରାୟ ୧ ବର୍ଷ ହେବ ଅଦାନି ଗ୍ରୁପ କମ୍ପାନିଗୁଡ଼ିକର ସେୟାର ମୂଲ୍ୟ ଦ୍ରୁତ ଗତିରେ ବଢିଚାଲିଛି ।