ବିଜୟୱାଡ଼ା: ଆନ୍ଧ୍ର ପ୍ରଦେଶସ୍ଥିତ ଗୋଟାଏ ରେସ୍ତୋରାଁ ଗୁରୁବାର ଦିନ ଆଶ୍ଚର୍ଯ୍ୟଜନକ ‘ଫୁଡ୍‌ ଅଫର୍‌’ ଘୋଷଣା କରି ୪୨୦ ଟଙ୍କାର ଥାଳିକୁ ମାତ୍ର ୫ ପଇସା ବିନିମୟରେ ଗ୍ରାହକମାନଙ୍କୁ ପରିବେଷଣ କରିଛି।

Advertisment

ପ୍ରାପ୍ତ ସୂଚନା ଅନୁସାରେ, ଗ୍ରାହକମାନଙ୍କ ପାଇଁ ୩୫ ପ୍ରକାରର ବ୍ୟଞ୍ଜନ ଥିବା ଏହି ‘ଅନ୍‌ ଲିମିଟେଡ୍‌ ଫୁଡ୍‌ ଅଫର୍‌’ ଘୋଷଣା କରିଥିବା ରେସ୍ତୋରାଁଟି ହେଉଛି ବିଜୟୱାଡ଼ାର ‘ରାଜଭୋଗ ରେସ୍ତୋରାଁ’।

publive-image Image Courtesy of The Better India

ରେସ୍ତୋରାଁର ମାଲିକ ମୋହିତ ଗଣମାଧ୍ୟମକୁ କହିଛନ୍ତି, ଗତକାଲିର ‘ଅଫର୍‌’ ଅତ୍ୟନ୍ତ ସଫଳ ହୋଇଥିଲା। ଏତେ ସଂଖ୍ୟକ ଗ୍ରାହକ ଆସିବେ ବୋଲି ଆମେ ଆଶା କରି ନ ଥିଲୁ। ୩୦୦ରୁ ୪୦୦ ଗ୍ରାହକ ଆସିବେ ବୋଲି ଆମର ଧାରଣା ହୋଇଥିଲା, କିନ୍ତୁ ଆମ ‘ଅଫର୍‌’ ପୋଷ୍ଟ୍‌ ଭାଇରାଲ୍‌ ହୋଇ ମାତ୍ର ୩ ଦିନରେ ଚହଳ ପକାଇ ଦେଲା। ପ୍ରଚାର ପାଇଁ ଏହା ଗୋଟାଏ ଅଭିନବ ଉପାୟ। ତେଣୁ, ୫ ପଇସିଆ ‘ଅଫର୍‌‘ ଦେଇ ଆମେ ପ୍ରଚାର ଚଳାଇଲୁ। ୫ ପଇସି ଆଣିଥିବା ବ୍ୟକ୍ତିମାନଙ୍କୁ ଆମେ ପ୍ରଥମ ୫୦ ଥାଳି ମାଗଣାରେ ଦେଲୁ। ତା’ପରେ ବାକି ୧୦୦୦ ଗ୍ରାହକଙ୍କୁ ୫୦% ରିହାତିରେ ଥାଳି ପରିବେଷଣ କଲୁ। ବଡ଼ ସଫଳତା ମିଳିଲା। ଗୁଜରାଟୀ, ରାଜସ୍ଥାନୀ ଓ ଉତ୍ତର ଭାରତୀୟ ବ୍ୟଞ୍ଜନ ସମେତ ୩୫ କିସମର ବ୍ୟଞ୍ଜନ ଥିବା ଏହି ଥାଳିର ‘ଅଫର୍‌’ ଥିଲା ଅନ୍‌ଲିମିଟେଡ୍‌ ବା ଅସୀମିତ।

publive-image Image Courtesy of India Posts English

ଉଲ୍ଲେଖଯୋଗ୍ୟ, ଏହି ‘ଅଫର୍‌’ କେବଳ ଦିନକ ପାଇଁ ଚାଲିଥିଲା। ‘ରାଜଭୋଗ ରେସ୍ତୋରାଁ’ର ଅନ୍ୟତମ ମାଲିକ ଦୀପ୍ତି କହିଛନ୍ତି, ଆମେ ଯେ, ରାଜସ୍ଥାନୀ, ଗୁଜରାଟୀ ଓ ଉତ୍ତର ଭାରତୀୟ ଭୋଜନ ପରିବେଷଣ କରୁ, ତାହା ଜଣାଇବା ଥିଲା ଏହି ‘ଅଫର୍‌’ର ମୁଖ୍ୟ ଉଦ୍ଦେଶ୍ୟ। ବିଜୟୱାଡ଼ାରେ ଅନେକ ଦକ୍ଷିଣ ଭାରତୀୟ ଅଛନ୍ତି। ସେମାନଙ୍କୁ ଉପରୋକ୍ତ ଖାଦ୍ୟ ବିଷୟରେ ଅବଗତ କରାଇବାକୁ ୫ ପଇସିଆ ‘ଅଫର୍‌’ ଘୋଷଣା କରିଥିଲୁ।