ଭୁବନେଶ୍ୱର : ଭାରତରେ ଅବସ୍ଥାପିତ ଅଷ୍ଟ୍ରେଲିଆ ଉଚ୍ଚାୟୁକ୍ତ ବାରୀ ଓ’ଫେରେଲଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳ ଆଜି କେନ୍ଦ୍ରୀୟ ନବରତ୍ନ ଉଦ୍ୟୋଗ ନାଲକୋର ଭୁବନେଶ୍ୱରସ୍ଥିତ ମୁଖ୍ୟ କାର୍ଯ୍ୟାଳୟ ପରିଦର୍ଶନ କରି ନାଲକୋର ଅଧ୍ୟକ୍ଷ ଶ୍ରୀଧର ପାତ୍ର ଏବଂ ବରିଷ୍ଠ ଅଧିକାରୀମାନଙ୍କ ସହିତ ଆଲୋଚନା କରିଥିଲେ। କେନ୍ଦ୍ର ଖଣି ମନ୍ତ୍ରଣାଳୟ ଅଧୀନରେ ଥିବା ଅଗ୍ରଣୀ ଆଲୁମିନା ଏବଂ ଆଲୁମିନିୟମ ଉତ୍ପାଦନ ତଥା ରପ୍ତାନିକାରୀ ଉଦ୍ୟୋଗ ନାଲକୋ ଏହି ଉଚ୍ଚସ୍ତରୀୟ ପ୍ରତିନିଧିଙ୍କୁ ବକ୍ସାଇଟ୍ ଖଣିଠାରୁ ଆରମ୍ଭ କରି ବିଶ୍ୱସ୍ତରୀୟ ଆଲୁମିନିୟମ୍ ଉତ୍ପାଦନ ପର୍ଯ୍ୟନ୍ତ ସମ୍ପୂର୍ଣ୍ଣ ଶୃଙ୍ଖଳା ତଥା କମ୍ପାନୀର ବିଭିନ୍ନ ବ୍ୟବସାୟିକ କାର୍ଯ୍ୟକଳାପ ବିଷୟରେ ଅବଗତ କରାଇଥିଲେ । ସେମାନେ ନାଲକୋର ବିଭିନ୍ନ ବ୍ୟବସାୟିକ କାର୍ଯ୍ୟଶୈଳୀର ଉଚ୍ଚ ପ୍ରଶଂସା କରିବା ସହିତ ଖଣି ଏବଂ ଶକ୍ତି କ୍ଷେତ୍ର ସହିତ ଆଲୁମିନିୟମ ବ୍ୟବସାୟ ଉପରେ ମଧ୍ୟ ବିଶେଷ ଗୁରୁତ୍ୱ ପ୍ରଦାନ କରିଥିଲେ ଯାହା ଇଣ୍ଡୋ-ଅଷ୍ଟ୍ରେଲିଆ ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବାରେ ସହାୟକ ହେବ ବୋଲି ଆଶାପ୍ରକାଶ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅଷ୍ଟ୍ରେଲିଆ ପ୍ରତିନିଧି ଦଳର ଅନ୍ୟ ସଦସ୍ୟମାନେ ଯଥା କନସଲ୍ ଜେନେରାଲ୍ ରୋୱାନ୍ ଆଇନ୍ସୱର୍ଥ, ଅଷ୍ଟ୍ରେଲିଆ ଉଚ୍ଚ ଆୟୋଗର ପ୍ରଥମ ସଚିବ ଆମି କେଓ, କୋଲକାତାସ୍ଥିତ ଅଷ୍ଟ୍ରେଲିଆ ବାଣିଜ୍ୟ ଏବଂ ନିବେଶ ଆୟୋଗର ବ୍ୟବସାୟ ବିକାଶ ପରିଚାଳକ ପାର୍ଥ ସେନ୍ ଏହି ଆଲୋଚନାରେ ଯୋଗ ଦେଇଥିଲେ । ସେହିପରି ନାଲକୋର ନିର୍ଦ୍ଦେଶକ (ମାନବ ସମ୍ୱଳ) ରାଧାଶ୍ୟାମ ମହାପାତ୍ର, ନିର୍ଦ୍ଦେଶକ (ପ୍ରକଳ୍ପ ଓ ବୈଷୟିକ) ମନସା ପ୍ରସାଦ ମିଶ୍ର ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।