ମେ ୧ ତାରିଖରୁ ଏହି ବ୍ୟାଙ୍କରେ ଆକାଉଣ୍ଟ ଥିଲେ ଦେବାକୁ ପଡିବ ଅତିରିକ୍ତ ଚାର୍ଜ
ନୂଆଦିଲ୍ଲୀ: ଦେଶର ଜଣାଶୁଣା ବ୍ୟାଙ୍କ ଆକ୍ସିସ୍ ବ୍ୟାଙ୍କରେ ଆପଣଙ୍କର ଆକାଉଣ୍ଟ ଅଛି କି? ଯଦି ହଁ, ତେବେ ମେ ୧ ତାରିଖରୁ ଆପଣଙ୍କୁ ଅତିରିକ୍ତ ଚାର୍ଜ ଦେବାକୁ ପଡିପାରେ | ଆକ୍ସିସ୍ ବ୍ୟାଙ୍କ ଏହାର ଅନେକ ସେବାକୁ ମେ ୧ ରୁ ମହଙ୍ଗା କରିବାକୁ ଘୋଷଣା କରିଛି। ଆକ୍ସିସ ବ୍ୟାଙ୍କ ପକ୍ଷରୁ ମିଳିଥିବା ସୂଚନା ମୁତାବକ ଆପଣ ଏଟିଏମରୁ ମାସରେ ଚାରିଥର ପର୍ଯ୍ୟନ୍ତ ଟଙ୍କା ଉଠାଇଲେ ଆପଣଙ୍କୁ କୌଣସି ଦେୟ ଦେବାକୁ ପଡିବ ନାହିଁ | ତେବେ ଆପଣ ଏଟିଏମ ମାଧ୍ୟମରେ ମାସକୁ ୨ ଲକ୍ଷରୁ ଅଧିକ ଟଙ୍କା ଉଠାଇପାରିବେ ନାହିଁ | ତେବେ ବର୍ତ୍ତମାନ ୪ଟି କାରବାର ପରେ, ବ୍ୟାଙ୍କ ଆପଣଙ୍କୁ ୧୦୦୦ ଟଙ୍କାର ପ୍ରତ୍ୟେକ ଟଙ୍କା ଉଠାଣ ପାଇଁ ୫ ଟଙ୍କା ଚାର୍ଜ କରିଥାଏ | ତେବେ ମେ ୧ ରୁ ବର୍ତ୍ତମାନ ଥିବା ୫ ଟଙ୍କା ବଦଳରେ ୧୦ ଟଙ୍କା ଆଦାୟ କରାଯିବ |
Sambad is now on WhatsApp
Join and get latest news updates delivered to you via WhatsApp
ସେହିପରି ସହଜ ସଞ୍ଚୟ ଯୋଜନା ପାଇଁ ହାରାହାରି ବାଲାନ୍ସ ମେଟ୍ରୋ ସହରଗୁଡିକରେ ୧୦,୦୦୦ ରୁ ୧୫,୦୦୦ ଟଙ୍କାକୁ ବୃଦ୍ଧି କରାଯାଇଛି | ପ୍ରାଇମ ଏବଂ ଲିବର୍ଟି ସେଭିଂ ଆକାଉଣ୍ଟ ପାଇଁ ମାସିକ ହାରାହାରି ବାଲାନ୍ସ ସୀମା ୧୫,୦୦୦ ରୁ ୨୫,୦୦୦ ଟଙ୍କାକୁ ବୃଦ୍ଧି କରାଯାଇଛି | ମେ ୧ ପରେ ଯଦି ଏହି ବାଲାନ୍ସ ନ ରହେ ତେବେ, ୧୦୦ ଟଙ୍କା କମିବା ମାତ୍ରେ ୧୦ ଟଙ୍କା ଲେଖାଏଁ ଚାର୍ଜ କରାଯିବ | ତେବେ ବ୍ୟାଙ୍କ ଏଥିପାଇଁ ସର୍ବନିମ୍ନ ଚାର୍ଜକୁ ୧୫୦ ରୁ ୫୦ ଟଙ୍କାକୁ ହ୍ରାସ କରିଛି। କିନ୍ତୁ ସର୍ବାଧିକ ଚାର୍ଜ ୬୦୦ ରୁ ୮୦୦ ଟଙ୍କାକୁ ବୃଦ୍ଧି କରାଯାଇଛି। ସେହିପରି ଆକ୍ସିସ୍ ବ୍ୟାଙ୍କ ମଧ୍ୟ ବେତନ ଆକାଉଣ୍ଟ ପାଇଁ ନିୟମ ପରିବର୍ତ୍ତନ କରିଛି |
ଯଦି ଆପଣଙ୍କର ବେତନ ଆକାଉଣ୍ଟ ୬ ମାସରୁ ଅଧିକ ପୁରୁଣା ହୋଇଥାଏ ଓ ୬ ମାସ ମଧ୍ୟରେ କୌଣସି ଦରମା ଆସିନଥାଏ, ତେବେ ପ୍ରତି ମାସରେ ୧୦୦ ଟଙ୍କା ଚାର୍ଜ କରାଯିବ | ସେହିପରି ଯଦି ଆପଣଙ୍କର ଆକାଉଣ୍ଟରେ ୧୭ ମାସ ପାଇଁ କୌଣସି କାରବାର ହୋଇନଥାଏ, ତେବେ ୧୮ ମାସରେ, ଏକାସାଙ୍ଗରେ ୧୦୦ ଟଙ୍କାରେ ଚାର୍ଜ ଆଦାୟ ହେବ | ଏହା ବ୍ୟତୀତ, ପାନ୍ / ଫର୍ମ ୬୦ ବିବରଣୀ, ଠିକଣା ପରିବର୍ତ୍ତନ, ଇମେଲ ଆଇଡି ପରିବର୍ତ୍ତନ ପାଇଁ ୧୦୦ ଟଙ୍କା ଦେବାକୁ ପଡିବ |