ରାଷ୍ଟ୍ରାୟତ୍ତ ଉଦ୍ୟୋଗରେ ସରକାରୀ ଅଂଶଧନ ୨୬%କୁ ଖସିବ
ପ୍ରସ୍ତୁତ ହେଉଛି କ୍ୟାବିନେଟ୍ ନୋଟ୍
ନୂଆଦିଲ୍ଲୀ: ରାଷ୍ଟ୍ରାୟତ୍ତ ଉଦ୍ୟୋଗ (ପିଏସ୍ୟୁ)ଗୁଡ଼ିକରେ ସରକାରୀ ଅଂଶଧନ ପରିମାଣ ୨୬% ପର୍ଯ୍ୟନ୍ତ ଖସାଇ ଦେବାକୁ କେନ୍ଦ୍ର ସରକାର ଲକ୍ଷ୍ୟ ରଖିଛନ୍ତି। ଏ ନେଇ ଏକ ଚିଠା ନୋଟ୍ ପ୍ରସ୍ତୁତ କରାଯାଉଛି। ଖୁବ୍ଶୀଘ୍ର ତାହାକୁ ଚୂଡ଼ାନ୍ତ ରୂପ ପ୍ରଦାନ କରାଯିବ। ଚଳିତ ମାସ ଶେଷ ସୁଦ୍ଧା ଏ ସମ୍ପର୍କିତ କ୍ୟାବିନେଟ୍ ନୋଟ୍ ପ୍ରସ୍ତୁତ କରିବାକୁ ଦୀପମ୍ ବିଭାଗକୁ କୁହାଯାଇଛି। ଏହି ଯୋଜନା କାର୍ଯ୍ୟକାରୀ ହେଲେ ଚଳିତ ବର୍ଷର ୧.୦୫ ଲକ୍ଷ କୋଟି ଟଙ୍କାର ପୁଞ୍ଜିପ୍ରତ୍ୟାହାର ଲକ୍ଷ୍ୟ ସହଜରେ ହାସଲ ହୋଇପାରିବ ବୋଲି କୁହାଯାଉଛି।
Sambad is now on WhatsApp
Join and get latest news updates delivered to you via WhatsApp
କଂପାନି ନିୟମ ଅନୁସାରେ ୨୫%ରୁ ଅଧିକ ଅଂଶଧନ ଥିବା ଅଂଶଧନକାରୀ କଂପାନିର ଯେକୌଣସି ପ୍ରସ୍ତାବ ଉପରେ ଆପତ୍ତି ଉଠାଇପାରିବେ। ସେହି ଅଧିକାରକୁ ନିଜ ପାଖରେ ରଖିବା ପାଇଁ ପିଏସ୍ୟୁଗୁଡ଼ିକର ଅଂଶଧନକୁ ୨୬%ରେ ରଖିବାକୁ ସରକାର ଚାହୁଛନ୍ତି। ଅର୍ଥମନ୍ତ୍ରୀ ନିର୍ମଳା ସୀତାରମଣ ନିଜ ବଜେଟ୍ ଅଭିଭାଷଣରେ କହିଥିଲେ ଯେ ସରକାରୀ କଂପାନିଗୁଡ଼ିକରେ ୫୧% ଅଂଶଧନ ରଖିବା ପାଇଁ ଯେଉଁ ନିୟମ ରହିଛି ତାହା ବଦଳିବା ଦରକାର। ଏହା ବ୍ୟତୀତ େଯଉଁ କଂପାନିରେ ଏଲ୍ଆଇସି ଭଳି ସରକାରୀ କଂପାନିର ଅଂଶଧନ ରହିଛି, ସେହି କଂପାନିରେ ସରକାର ନିଜ ଅଂଶଧନକୁ ୫୧%ରୁ ତଳକୁ ଖସାଇପାରିବେ।
କିଛି ଦିନ ତଳେ ଦୀପମ୍ ବିଭାଗର ସଚିବ ଅତନୁ ଚକ୍ରବର୍ତୀ କହିଥିଲେ ଯେ, ପ୍ରଥମ ଥର ପାଇଁ ୫୧% ଅଂଶଧନ ଓ ନିୟନ୍ତ୍ରଣ ଉଭୟକୁ ସରକାର ଅଲଗା କରିବାକୁ ଯାଉଛନ୍ତି। ସରକାର ନିଜ ଅଂଶଧନକୁ ୫୧%ରୁ କମ୍ କରିବେ। ଏହା ଦ୍ବାରା ଅଧିକରୁ ଅଧିକ ନିବେଶକଙ୍କ ପାଣ୍ଠି ଉକ୍ତ କଂପାନିରେ ଲାଗିପାରିବ। ଏଭଳିକି ଆନ୍ତର୍ଜାତିକ ପାଣ୍ଠି ମଧ୍ୟ କଂପାନିରେ ନିବେଶ ହୋଇପାରିବ। ଅନେକ ସଫଳ କଂପାନିରେ ପ୍ରତିଷ୍ଠାତାଙ୍କ ଅଂଶଧନ ପରିମାଣ ୨-୩% ଭଳି ସ୍ତରରେ ରହିଥିବା ସେ କହିଛନ୍ତି। ସେନ୍ସେକ୍ସରେ ଗୁରୁତ୍ବ ରଖୁଥିବା ୧୮ଟି କଂପାନିରେ ପ୍ରତିଷ୍ଠାତାଙ୍କ ଅଂଶଧନ ୪୦%ରୁ କମ୍ ଥିବା ସେ କହିଛନ୍ତି। କଂପାନିରେ ସରକାରଙ୍କ ଅଂଶଧନ ଯେତେ କମ୍ ରହିବ ତାହାକୁ ସେତେ ସହଜରେ ବିକ୍ରି କରାଯାଇପାରିବ। ଅଧିକ ଅଂଶଧନ ରହିଲେ ଏୟାର ଇଣ୍ଡିଆ ଭଳି ସ୍ଥିତି ଉପୁଜିବ। ଗତବର୍ଷ ଏୟାର ଇଣ୍ଡିଆର ୭୪% ଅଂଶଧନକୁ ସରକାର ବିକିବାକୁ ଚାହିଥିଲେ, ମାତ୍ର ତାହାକୁ କିଣିବା ପାଇଁ କୌଣସି ସଂସ୍ଥା ଆଗ୍ରହ ଦେଖାଇନଥିଲେ।