୬୦୦ଟି ଶାଖା ବନ୍ଦ କରିବ ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ !
ନୂଆଦିଲ୍ଲୀ : ରାଷ୍ଟ୍ରାୟତ୍ତ ବ୍ୟାଙ୍କ ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆର ଆର୍ଥିକ ସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି । ବ୍ୟାଙ୍କର କ୍ଷତି ବଢିଚାଲିଛି । ଆର୍ଥିକ ସ୍ଥିତି ସୁଧାରିବାକୁ ବ୍ୟାଙ୍କ ନିଜର ପ୍ରାୟ ୬୦୦ଟି ଶାଖା ବନ୍ଦ କରିବାକୁ ଯୋଜନା କରୁଥିବା ବିଭିନ୍ନ ଜାତୀୟ ସ୍ତରର ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି ।
Sambad is now on WhatsApp
Join and get latest news updates delivered to you via WhatsApp
ଏସବୁ ରିପୋର୍ଟ ଅନୁସାରେ ଆସନ୍ତା ୨୦୨୩ ମାର୍ଚ୍ଚ ସୁଦ୍ଧା ବ୍ୟାଙ୍କ ନିଜର ପ୍ରାୟ ୬୦୦ଟି ଶାଖାକୁ ବନ୍ଦ କରିବ କିମ୍ବା ଅନ୍ୟ ଶାଖା ସହିତ ମିଶାଇଦେବ । ସାରା ଦେଶରେ ବ୍ୟାଙ୍କର ଏବେ ମୋଟ ୪୫୯୪ ଟି ଶାଖା ରହିଛି । ୬୦୦ଟି ଶାଖା ବନ୍ଦ ହେବା ପରେ ବ୍ୟାଙ୍କର ମୋଟ ଶାଖା ସଂଖ୍ୟା ୪୦୦୦ ତଳକୁ ଖସିଆସିବ । କେବଳ ଏତିକି ନୁହେଁ, ବ୍ୟାଙ୍କ ନିଜର କେତେକ ରିଅଲ ଇଷ୍ଟେଟ୍ ସଂପତ୍ତି ବିକ୍ରି କରିବ । ଏସବୁ ପଦକ୍ଷେପ ମାଧ୍ୟମରେ ନିଜର ଆର୍ଥିକ ସ୍ଥିତି ସୁଧାରିବାକୁ ବ୍ୟାଙ୍କ ଲକ୍ଷ୍ୟ ରଖିଛି ।
ଖରାପ ଆର୍ଥିକ ସ୍ଥିତି ଓ ରେଗଲେଟରୀ କ୍ୟାପିଟାଲ ନିୟମର ଉଲ୍ଲଙ୍ଘନ ଯୋଗୁଁ ରିଜର୍ଭ ବ୍ୟାଙ୍କ ଗତ ୨୦୧୭ରେ ସେଣ୍ଟ୍ରାଲ ବ୍ୟାଙ୍କ ସମେତ ଆଉ କେତେକ ବ୍ୟାଙ୍କକୁ ପ୍ରମ୍ପଟ କରେକ୍ଟିଭ ଆକ୍ସନ (ପିସିଏ) ଅଧିନରେ ରଖିଥିଲା । ଏହି ପଦକ୍ଷେପ ମାଧ୍ୟମରେ ରିଜର୍ଭ ବ୍ୟାଙ୍କ ବ୍ୟାଙ୍କମାନଙ୍କ ଋଣ ପ୍ରଦାନ, ଜମା, ନୂଆ ନିଯୁକ୍ତି ଓ ସଂପ୍ରସାରଣ ଉପରେ କଟକଣା ଲଗାଇଥାଏ । ଏହା ସତ୍ତ୍ବେ ସେଣ୍ଟ୍ରାଲ ବ୍ୟାଙ୍କର ଆର୍ଥିକ ସ୍ଥିତିରେ ଉନ୍ନତି ଆସିପାରିନାହିଁ ।