ନୂଆଦିଲ୍ଲୀ : ଦେଶରେ ହରଡ଼ ଡାଲି ଦର ଗତ କିଛି ସପ୍ତାହ ହେଲା ବଢିଚାଲିଥିବାରୁ କେନ୍ଦ୍ର ସରକାର ଚିନ୍ତିତ ହୋଇପଡ଼ିଛନ୍ତି । ବିଶେଷକରି କେତେକ ଜମାଖୋର ବ୍ୟବସାୟୀ ହରଡର କୃତ୍ରିମ ଅଭାବ ସୃଷ୍ଟି କରି ଦର ବଢାଇବାକୁ ଯୋଜନା କରୁଥିବା ସୂଚନା ମିଳିବା ପରେ ସରକାର ଚିନ୍ତିତ ହୋଇଯାଇଛନ୍ତି । ଏହାକୁ ଦୃଷ୍ଟିରେ ରଖି ଷ୍ଟକ ଯାଞ୍ଚ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର ।
Sambad is now on WhatsApp
Join and get latest news updates delivered to you via WhatsApp
ଅତ୍ୟାବଶ୍ୟକ ସାମଗ୍ରୀ ଆଇନ ଅଧିନରେ ବ୍ୟବସାୟୀମାନେ ନିଜ ନିଜର ଷ୍ଟକ ଦର୍ଶାଇବାକୁ ବ୍ୟବସାୟୀମାନଙ୍କୁ ନିର୍ଦ୍ଦେଶ ଦେବାକୁ ରାଜ୍ୟମାନଙ୍କୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି । ସେହିପରି ନିଜ ନିଜ ଷ୍ଟକ ସଂପର୍କିତ ତଥ୍ୟ ଅନଲାଇନ ମନିଟରିଂ ପୋର୍ଟାଲରେ ଅପଲୋଡ କରିବାକୁ କୁହାଯାଇଛି । ଏହା ଫଳରେ ବିଭିନ୍ନ ରାଜ୍ୟରେ ଗଚ୍ଛିତ ଥିବା ହରଡ଼ ଡାଲି ପରିମାଣ ସମ୍ପର୍କରେ ଜଣାପ଼ଡ଼ିବ ।
ଏବର୍ଷ ପ୍ରବଳ ବର୍ଷା ଯୋଗୁଁ ଦେଶର ପ୍ରମୁଖ ହରଡ଼ ଉତ୍ପାଦନକାରୀ ରାଜ୍ୟ କର୍ଣ୍ଣାଟକ, ମହାରାଷ୍ଟ୍ର ଓ ମଧ୍ୟପ୍ରଦେଶରେ ଖରିଫ ହରଡ଼ ଚାଷ ପ୍ରଭାବିତ ହୋଇଛି । ଏଥିପାଇଁ ଉତ୍ପାଦନ ହ୍ରାସ ପାଇବାର ଆଶଙ୍କା ଦେଖାଦେଇଛି । ଫଳରେ ଗତ ଜୁଲାଇ ମଧ୍ୟ ଭାଗରୁ ଏପର୍ଯ୍ୟନ୍ତ ଦେଶରେ ହରଡ଼ ଡାଲି ମୂଲ୍ୟ ୧୫ ପ୍ରତିଶତ ବୃଦ୍ଧି ପାଇଛି । ଦେଶରେ ମୁଦ୍ରାସ୍ବୀତି ସମସ୍ୟାକୁ ନେଇ ସାଧାରଣ ଲୋକେ ହନ୍ତସନ୍ତ ହେଉଥିବାବେଳେ ହରଡ଼ ଡାଲିର ମୂଲ୍ୟବୃଦ୍ଧି ସ୍ଥିତିକୁ ଜଟିଳ କରିବାର ଆଶଙ୍କା ରହିଛି ।