ଚୀନ୍କୁ ଲାଗିବ ୪୦ ହଜାର କୋଟିର ଧକ୍କା, ଉତ୍ସବ ଋତୁରେ ଚୀନ୍ ସାମଗ୍ରୀ ବିକିବେନି ବ୍ୟବସାୟୀ
ନୂଆଦିଲ୍ଲୀ: ଚଳିତ ବର୍ଷ ଉତ୍ସବ ଋତୁରେ ସ୍ବଦେଶୀ ସାମଗ୍ରୀକୁ ଅଧିକ ବ୍ୟବହାର କରିବା ଓ ଚୀନ୍ ସାମଗ୍ରୀ ବର୍ଜନ କରିବା ଲାଗି ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି) ଆହ୍ବାନ ଦେଇଛି। ଏହାର ପ୍ରଭାବରେ ଚୀନ୍କୁ ୪୦ ହଜାର କୋଟି ଟଙ୍କା ଧକ୍କା ଲାଗିବ ବୋଲି ଆକଳନ କରାଯାଇଛି। ଚୀନ୍ ସାମଗ୍ରୀ ବର୍ଜନ ପାଇଁ ମହାସଂଘ ପକ୍ଷରୁ ସର୍ବଭାରତୀୟ ଅଭିଯାନ ‘ଭାରତୀୟ ସାମଗ୍ରୀ-ଆମର ଅଭିଯାନ’ ଜାରି ରହିଛି।
Sambad is now on WhatsApp
Join and get latest news updates delivered to you via WhatsApp
ଚଳିତ ବର୍ଷର ଦୀପାବଳିକୁ ସମ୍ପୂର୍ଣ୍ଣ ରୂପେ ଭାରତର ଦୀପାବଳି ଭାବେ ପାଳନ କରିବାକୁ ମହାସଂଘ ଆହ୍ବାନ ଦେଇଛି। ଚୀନ୍ର କୌଣସି ସାମଗ୍ରୀ ଯେଭଳି ଲୋକମାନେ ବ୍ୟବହାର ନକରନ୍ତି ତାହା ନିଶ୍ଚିତ କରିବା ଲାଗି ଏହା ଜନସେଚତନତା ସୃଷ୍ଟି କରୁଛି। ଗଣେଶ ପୂଜାକୁ ମଧ୍ୟ ନିଆରା ଢଙ୍ଗରେ ପାଳନ କରିବାକୁ ମହାସଂଘ ଆହ୍ବାନ ଦେଇଛି। ମାଟିରେ ତିଆରି ଗଣେଶ ମୂର୍ତ୍ତି ପୂଜା କରିବା ଲାଗି ଏହା ଲୋକମାନଙ୍କୁ ପରାମର୍ଶ ଦେଉଛି। ମହାରାଷ୍ଟ୍ର, ମଧ୍ୟପ୍ରଦେଶ, ଗୁଜରାଟ, କର୍ଣ୍ଣାଟକ, ଗୋଆ, କେରଳ, ତେଲେଙ୍ଗାନା, ମଧ୍ୟପ୍ରଦେଶ, ଓଡ଼ିଶା, ପଶ୍ଚିମବଙ୍ଗ, ଦିଲ୍ଲୀ ଓ ଛତିଶଗଡ଼ରେ ଗଣେଶ ପୂଜାକୁ ଧୁମଧାମରେ ପାଳନ କରାଯାଏ। ଗଣେଶ ପୂଜାର ଆବଶ୍ୟକତା ପୂରଣ କରିବା ଲାଗି ଚଳିତ ବର୍ଷ ୬, ୯ ଓ ୧୨ ଇଞ୍ଚର ମାଟି ମୂର୍ତ୍ତି ତିଆରି କରାଯାଉଛି।
ସେଥିରେ ତୁଳସୀ ମଞ୍ଜି ଓ ଅନ୍ୟାନ୍ୟ ପନିପରିବାର ମଞ୍ଜି ମଧ୍ୟ ବ୍ୟବହାର କରାଯାଉଛି। ଫଳରେ ମୂର୍ତ୍ତି ବିସର୍ଜନ କରିବା ପରେ ସେହି ମଞ୍ଜିଗୁଡ଼ିକ ମାଟିରେ ମିଶି ଗଛରେ ପରିଣତ ହେବ। ମହାସଂଘର ଡାଇରେକ୍ଟର ଜେନେରାଲ ପ୍ରବୀଣ ଖଣ୍ଡେଲୱାଲ କହିଛନ୍ତି, ଗଣେଶ ପୂଜା ଠାରୁ ଦୀପାବଳି ପର୍ଯ୍ୟନ୍ତ ଦେଶରେ ଉତ୍ସବ ଋତୁ ରହିଥାଏ। ଏହି ସମୟରେ ଚୀନ୍ରୁ ୩୫-୪୦ ହଜାର କୋଟି ଟଙ୍କାର ସାମଗ୍ରୀ ଆମଦାନି ହୁଏ। ଯଦି ଲୋକମାନେ ସ୍ବଦେଶୀ ସାମଗ୍ରୀ ବ୍ୟବହାର କରିବେ ତେବେ ଚୀନ୍ ସାମଗ୍ରୀ ମଗାଇବାକୁ ପଡ଼ିବ ନାହିଁ। ଉତ୍ସବ ଋତୁରେ ଚୀନ୍ରୁ ମୂର୍ତ୍ତ, ଅଗରବତୀ, ଖେଳନା, ଇଲେକ୍ଟ୍ରୋନିକ୍ସ ସାମଗ୍ରୀ, ବିଦ୍ୟୁତ ବଲ୍ବ, ଲିଚୁ ବଲ୍ବ, ସାଜ୍ଜସଜା ସାମଗ୍ରୀ, ପିତଳ ଓ ଅନ୍ୟାନ୍ୟ ଧାତୁର ଦୀପ, ଫର୍ଣ୍ଣିସିଂ ଫ୍ୟାବ୍ରିକ୍, ରୋଷେଇ ଘର ସାମଗ୍ରୀ ବିପୁଳ ପରିମାଣର ଆମଦାନି ହୋଇଥାଏ।