ମାଡ଼ି ଆସୁଛି ତୈଳ ସଙ୍କଟ: ଅଶୋଧିତ ତୈଳ ଦାମ୍ ୧୧୯ ଡଲାର ଟପିଲା

ନୂଆଦିଲ୍ଲୀ: ୟୁକ୍ରେନ ଉପରେ ରୁଷିଆ କ୍ଷେପଣାସ୍ତ୍ର ମାଡ଼ ପରିବା ପରେ ବିଶ୍ବ ତୈଳ ବଜାରରେ ନିଆଁ ଲାଗିଯାଇଛି। ପ୍ରତିଦିନ ଅଶୋଧିତ ତୈଳ ଦର ହୁ ହୁ ହୋଇ ବଢ଼ିଚାଲିଛି। ନିଜ ଆବଶ୍ୟକତାର ୮୨ ପ୍ରତିଶତ ତେଲ ଆମଦାନି କରୁଥିବା ଭାରତ ଏହାକୁ ନେଇ ବେଶ ଚିନ୍ତିତ ହୋଇପଡ଼ିଛି। ଆଜି ଅଶୋଧିତ ତୈଳର ବ୍ୟାରେଲ ପିଛା ଦାମ୍ ୧୧୯ ଡଲାର ହୋଇଯାଇଛି। ୨୦୧୨ ମେ’ ପରେ ପ୍ରଥମ ଥର ଲାଗି ଏହି ଦର ଏଭଳି ଉଚ୍ଚ ସ୍ତରରେ ପହଞ୍ଚିଛି। ଗୋଟିଏ ପଟେ ଆମେରିକୀୟ ଡଲାର ତୁଳନାରେ ଟଙ୍କା ଦୁର୍ବଳ ହେଉଥିବା ବେଳେ ଅନ୍ୟପଟେ ଅଶୋଧିତ ତେଲ ଦରବୃଦ୍ଧି ଯୋଗୁଁ ଭାରତ ଆଡ଼କୁ ଏକ ବଡ଼ ତୈଳ ସଙ୍କଟ ମାଡ଼ି ଆସୁଛି। ସରକାର ତାହାର କିଭଳି ମୁକାବିଲା କରିବେ ତାହା ଆଗାମୀ ଦିନରେ ଜଣାପଡ଼ିବ। ଏବେ ଦେଶରେ ପେଟ୍ରୋଲ୍ ଦାମ୍ ୧୦୦ ଟଙ୍କାରୁ ଅଧିକ ରହିଛି। ସେଥିରୁ ସରକାରଙ୍କ ଟିକସର ଭାଗ ହେଉଛି ୬୦%। ଗତ ନଭେମ୍ବରରେ ଅଶୋଧିତ ତୈଳ ଦର ୮୨ ଡଲାର ଥିବା ବେଳେ ସରକାର ‌ପେଟ୍ରୋଲ୍ ଓ ଡିଜେଲ୍ ଦରବୃଦ୍ଧିରେ ରୋକ ଲଗାଇଥିଲେ। ଦୀର୍ଘ ୧୧୯ ଦିନ ଧରି ଦାମ୍‌ରେ କୌଣସି ପରିବର୍ତ୍ତନ ହୋଇନାହିଁ। ଇତି ମଧ୍ୟରେ ଅଶୋଧିତ ତୈଳ ଦାମ୍ ୩୬ ଡଲାର ମହଙ୍ଗା ହୋଇଗଲାଣି।

ଭାରତରେ ବିକ୍ରି ହେଉଥିବା ପେଟ୍ରୋଲ୍ ଓ ଡିଜେଲ୍‌ର ଖୁଚୁରା ଦାମ୍ ତିନିଟି ପ୍ରମୁଖ ବିଷୟ ଉପରେ ନିର୍ଭରଶୀଳ। ତାହା ହେଉଛି ଅଶୋଧିତ ତୈଳ ଦର, ଡଲାର ଓ ଟଙ୍କାର ବିନିମୟ ମୂଲ୍ୟ ଏବଂ ଉଭୟ କେନ୍ଦ୍ର ଓ ରାଜ୍ୟ ସରକାର ଲଗାଇଥିବା ଟିକସ। ଏଥିରୁ ପ୍ରଥମ ଦୁଇଟି ବିଷୟ ସରକାରଙ୍କ ନିୟନ୍ତ୍ରଣ ବାହାରେ ରହିଛି। ଯଦି ସରକାର କିଛି କରିପାରିବେ ତାହା ହେଉଛି ଟିକସ କମ୍ କରିବେ। କରୋନା ମହାମାରୀ ବ୍ୟାପିବା ପରେ ଅର୍ଥନୈତିକ କାର୍ଯ୍ୟକଳାପ ମନ୍ଥର ହୋଇଥିବାରୁ ଅନ୍ୟାନ୍ୟ ଉତ୍ସରୁ ଟିକସ ସଂଗ୍ରହ ବଢ଼ାଇବା କଷ୍ଟକର ହୋଇପଡ଼ିଛି। ସେଥିପାଇଁ ତେଲରୁ ସରକାର ଅଧିକ ଟିକସ ଆଦାୟ କରୁଛନ୍ତି। ଆଗାମୀ ଦିନରେ ତେଲ ଉପରୁ ଟିକସ କମ୍ କରାଯିବ ନା ନାହିଁ ତାହାକୁ ନେଇ ସରକାର ଏପର୍ଯ୍ୟନ୍ତ ମନ ସ୍ଥିର କରିପାରିନାହାନ୍ତି।