ଭୁବନେଶ୍ବର : ଭୁବନେଶ୍ବରରେ ଆଜି ଡିଜେଲ ଦର ୮୦ ଟଙ୍କା ଟପିଛି। ଜୁନ ମାସରେ ଲଗାତାର ୨୩ ଦିନ ଏବଂ ଜୁଲାଇ ମାସରେ ୧୦ ଥର ଦର ବଢ଼ିବା ପରେ ଏଭଳି ସ୍ଥିତି ଦେଖାଦେଇଛି। ଗୋଟିଏ ପ‌ଟେ ପେଟ୍ରୋଲ ଦର ଗତମାସ ୨୯ ତାରିଖରୁ ସ୍ଥିର ଥିବାବେଳେ ଡିଜେଲ ଦର ବଢ଼ିବାରେ ଲାଗିଛି। ଏଥିଯୋଗୁ ସାରା ଦେଶରେ ଡିଜେଲ ଦର ବଢ଼ିଚାଲିଛି। ପୂର୍ବରୁ ଭୁବନେଶ୍ବରରେ ୨୦୧୮ ସେପ୍ଟେମ୍ବର ମାସରେ ଡିଜେଲ ଦର ୮୦ ଟଙ୍କା ଟପିଥିବାବେଳେ ଏବେ ଦୀର୍ଘ ପ୍ରାୟ ୨୨ ମାସ ପରେ ଡିଜେଲ ପୁଣି ଏହି ସ୍ତର ଟପିଛି। କେବଳ ସେତିକି ନୁହେଁ ପେଟ୍ରୋଲ ଦର ସ୍ଥିର ଥାଇ ଡିଜେଲ ଦର ବଢ଼ୁଥିବାରୁ ଏହି ଦୁଇ ଇନ୍ଧନ ମଧ୍ୟରେ ପାର୍ଥକ୍ୟ ହ୍ରାସ ପାଇବାରେ ଲାଗିଛି। ଏପରିକି ଅବସ୍ଥା ଏଭଳି ସୃଷ୍ଟି ହୋଇଛି ଯେ ଖୁବଶୀଘ୍ର ଭୁବନେଶ୍ବରରେ ପେଟ୍ରୋଲ ଦରକୁ ଡିଜେଲ ଦର ଟପିଯିବା ଆଶଙ୍କା ସୃଷ୍ଟି ହୋଇଛି।

Advertisment

ଭୁବନେଶ୍ବରରେ ଆଜି ପେଟ୍ରୋଲ ଦର ୮୧ ଟଙ୍କା ୮୧ ପଇସା ଥିବାବେଳେ ଡିଜେଲ ଦର ତାହାଠାରୁ ମାତ୍ର ୯୯ ପଇସା କମ୍ ଅର୍ଥାତ୍ ୮୦ ଟଙ୍କା ୦୨ ପଇସା ରିହଛି। ଗତକାଲି ତୁଳନାରେ ଦର ୧୪ ପଇସା ବଢ଼ିଛି। ତେଣୁ ବର୍ତ୍ତମାନ ହାରରେ ଯଦି ଡିଜେଲ ଦର ବଢ଼େ ତାହେଲେ ଆଉ ଅଳ୍ପ ଦିନ ମଧ୍ୟରେ ଗ୍ରାହକଙ୍କୁ ଡିଜେଲ କିଣିବା ପାଇଁ ପେଟ୍ରୋଲ ଠାରୁ ଅଧିକ ଦର ଦେବାକୁ ପଡ଼ିବ। ଆଜିକୁ ମିଶାଇଲେ ଚଳିତମାସରେ ଭୁବନେଶ୍ବରରେ ଡିଜେଲ ଦର ୧ ଟଙ୍କା ୩୩ ପଇସା ମହଙ୍ଗା ହୋଇଗଲାଣି। ପେଟ୍ରୋଲ ଦର ସ୍ଥିର ଥିବାବେଳେ ଡିଜେଲ ଦର ବଢ଼ୁଥିବାରୁ ଗ୍ରାହକଙ୍କ ଅସନ୍ତୋଷ ଦେଖାଦେଇଛି।

ଦିଲ୍ଲୀରେ ମଧ୍ୟ ଆଜି ଡିଜେଲ ଦର ୮୨ ଟଙ୍କା ନିକଟତର ହୋଇଛି। ଗତକାଲି ତୁଳନାରେ ଡିଜେଲ ଦର ଲିଟର ପିଛା ୧୫ ପଇସା ବଢ଼ିବା ସହିତ ୮୧ ଟଙ୍କା ୯୪ ପଇସାରେ ପହଞ୍ଚିଛି। ବିଭିନ୍ନ ରାଜ୍ୟରେ ଟିକସ ଦର ଭିନ୍ନ ଭିନ୍ନ ରହୁଥିବାରୁ ପେଟ୍ରୋଲ ଓ ଡିଜେଲ ଦରରେ ଭିନ୍ନତା ରହୁଛି। ଅନ୍ୟପକ୍ଷରେ ଗତମାସରୁ ପେଟ୍ରୋଲ ଦର ଲିଟର ପିଛା ୮୦ ଟଙ୍କା ୪୩ ପଇସାରେ ସ୍ଥିର ରହିଛି। ଅନ୍ୟପକ୍ଷରେ ଦେଶର ଆର୍ଥିକ ରାଜଧାନୀ ମୁମ୍ବାଇରେ ପେଟ୍ରୋଲ ଦର ଲିଟର ପିଛା ୮୭ ଟଙ୍କା ୧୯ ପଇସା ଥିବାବେଳେ ଡିଜେଲ ଦର ୮୦ ଟଙ୍କା ୧୧ ପଇସା ରହିଛି। କଳ କାରଖାନାଠାରୁ ଆରମ୍ଭ କରି କୃଷି କ୍ଷେତ୍ରରେ ମଧ୍ୟ ଡିଜେଲର ବହୁଳ ବ୍ୟବହାର ଦେଖାଯାଇଥାଏ। ସେହିଭଳି ମାଲ ପରିବହନ କରୁଥିବା ଗାଡ଼ିଗୁଡ଼ିକ ମଧ୍ୟ ଡିଜେଲରେ ଚାଲିଥାଏ। ଏଥିଯୋଗୁଁ ମାଲ ପରିବହନ ମହଙ୍ଗା ହେବ।