ଛୋଟମୋଟ କାମ ପାଇଁ ବରିଷ୍ଠ ନାଗରିକଙ୍କୁ ଯିବାକୁ ପଡ଼ିବନି ବ୍ୟାଙ୍କ! କେନ୍ଦ୍ର ସରକାର ଆଣିବାକୁ ଯାଉଛନ୍ତି ଏହି ନୂଆ ସୁବିଧା
ନୂଆଦିଲ୍ଲୀ: ପେନସନ ଆଣିବା ପାଇଁ ଆପଣଙ୍କ ଘରର ବରିଷ୍ଠ ସଦସ୍ୟମାନଙ୍କୁ ପ୍ରତି ମାସରେ ବ୍ୟାଙ୍କ ଯିବାକୁ ପଡୁଛି କି ? ଯଦି ହଁ ତେବେ କେନ୍ଦ୍ର ସରକାର ଏଥର ଏଭଳି ଅସୁବିଧାରୁ ମୁକ୍ତି ଦେବାକୁ ଯୋଜନା ପ୍ରସ୍ତୁତ କରିଛନ୍ତି | ମିଳିଥିବା ସୂଚନା ମୁତାବକ ୭୦ ବର୍ଷରୁ ଉର୍ଦ୍ଧ୍ବ ବରିଷ୍ଠ ନାଗରିକଙ୍କୁ ସରକାର ଏକ ବଡ ଉପହାର ଦେଇପାରନ୍ତି | ବରିଷ୍ଠ ନାଗରିକମାନଙ୍କୁ ସେମାନଙ୍କ ଘରେ ମୌଳିକ ବ୍ୟାଙ୍କିଙ୍ଗ ସେବା ଯୋଗାଇବାକୁ ସରକାର ଖୁବ୍ ଶୀଘ୍ର ଏକ ଯୋଜନା ଆରମ୍ଭ କରିପାରନ୍ତି | ଅର୍ଥ ମନ୍ତ୍ରଣାଳୟ ଅଧୀନରେ ଥିବା ଆର୍ଥିକ ସେବା ବିଭାଗ (ଡିଏଫ୍ଏସ୍) ବ୍ୟାଙ୍କମାନଙ୍କ ପାଇଁ ନୂତନ ନିୟମ ଆଣିବାକୁ ଯାଉଛି, ଯେଉଁଥିରେ କେତେକ ବ୍ୟାଙ୍କ ଶାଖା ବରିଷ୍ଠ ନାଗରିକମାନଙ୍କୁ ସେମାନଙ୍କ ଘରେ ବ୍ୟାଙ୍କିଙ୍ଗ୍ ସେବା ଯୋଗାଇବେ |
Sambad is now on WhatsApp
Join and get latest news updates delivered to you via WhatsApp
ତେବେ ଡୋରଷ୍ଟେପ୍ ବ୍ୟାଙ୍କିଙ୍ଗ୍ ସେବା କେବଳ ବରିଷ୍ଠ ନାଗରିକଙ୍କ ପାଇଁ ନୁହେଁ ବରଂ ଦିବ୍ୟାଙ୍ଗଙ୍କ ପାଇଁ ମଧ୍ୟ ଉପଲବ୍ଧ ହେବ | ଏହି ସେବା ପାଇଁ ବହୁତ କମ୍ ଉପଭୋକ୍ତା ଦେୟ ସ୍ଥିର କରାଯିବ | ଡୋରଷ୍ଟେପ୍ ବ୍ୟାଙ୍କିଙ୍ଗ୍ ସେବା ପାଇଁ ଏକ ସର୍ବଭାରତୀୟ ଫୋନ୍ ନମ୍ବର ମଧ୍ୟ ଲଞ୍ଚ କରାଯିବ | ସୂଚନା ଥାଉ କି ଆରବିଆଇ(ରିଜର୍ଭ ବ୍ୟାଙ୍କ ଅଫ ଇଣ୍ଡିଆ) ଡୋରଷ୍ଟେପ୍ ବ୍ୟାଙ୍କିଙ୍ଗ୍ ସେବା ପାଇଁ ଦୁଇଥର ନିର୍ଦ୍ଦେଶ ଜାରି କରିଛି। ଯେଉଁଥିରେ ବ୍ୟାଙ୍କଗୁଡ଼ିକୁ ପ୍ରଥମ ସମୟସୀମା ୩୧ ଡିସେମ୍ବର ୨୦୧୭ ଏବଂ ଦ୍ୱିତୀୟ ସମୟସୀମା ୩୦ ଏପ୍ରିଲ ୨୦୨୦ ପର୍ଯ୍ୟନ୍ତ ଦିଆଯାଇଥିଲା | କିନ୍ତୁ ଏହି ସେବା ଏପର୍ଯ୍ୟନ୍ତ ଆରମ୍ଭ ହୋଇନାହିଁ। ଡୋରଷ୍ଟେପ୍ ବ୍ୟାଙ୍କିଙ୍ଗ୍ ସେବା ଅଧୀନରେ ଆକାଉଣ୍ଟ୍ ଖୋଲିବା, ପେନ୍ସନ୍ ସେବା, ବୀମା, ନିବେଶ ଏବଂ ଋଣ ନେବା ଭଳି ସୁବିଧା ପ୍ରଦାନ କରାଯିବ |