ଅର୍ଥମନ୍ତ୍ରୀ କିଣିଲେ ପନିପରିବା

ଚେନ୍ନାଇ : କୌଣସି ଜଣାଶୁଣା ବ୍ୟକ୍ତିଙ୍କୁ ଜନଗହଳିପୂର୍ଣ୍ଣ ବଜାରରେ ପନିପରିବା କିଣିବା କ୍ବଚିତ ଦେଖିବାକୁ ମିଳେ। କିନ୍ତୁ ଏଭଳି ବିରଳ ଘଟଣା ଚେନ୍ନାଇରେ‌ ଦେଖିବାକୁ ମିଳିଛି। ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ପନିପରିବା କିଣୁଥିବା ଭିଡିଓ ଭାଇରାଲ୍‌ ହୋଇଛି। ଗତ ଶନିବାର ରାତିରେ ମାୟଲାପୁର ବଜାରରୁ ସେ ପନିପରିବା କିଣିଥିଲେ। ଏଥି ସହିତ ବେପାରି ଓ ସ୍ଥାନୀୟ ଲୋକମାନଙ୍କ ସହ ମଧ୍ୟ ସେ କଥାବାର୍ତା ହୋଇଥିଲେ। ତେବେ ନିର୍ମଳାଙ୍କ ସହ ତାଙ୍କ ସୁରକ୍ଷାକର୍ମୀ ମଧ୍ୟ ସେଠାରେ ଉପସ୍ଥିତ ଥିଲେ।

ସୋସିଆଲ ମିଡିଆରେ ନିର୍ମଳାଙ୍କ ସେହି ଭିଡିଓ ଭାଇରାଲ୍ ହେବା ପରେ ଲୋକମାନେ ମଜାଳିଆ ମନ୍ତବ୍ୟ ସବୁ ଦେଇଥିଲେ। ଦେଶରେ ଦରଦାମ୍‌ ସ୍ଥିତି ବେଲଗାମ ହୋଇପଡ଼ିଥିବାରୁ କିଛି ଲୋକ ପ୍ରଶ୍ନ କରିଥିଲେ ଯେ ଦରଦାମ୍ କେତେ ବଢ଼ିଛି ତାହା ଜାଣିବା ଲାଗି ଅର୍ଥମନ୍ତ୍ରୀ ବଜାର ଯାଇଛନ୍ତି କି? ଆଉ କାହା କାହା ଉପରେ ଜିଏସ୍‌ଟି ଲଗାଇବେ ତାହା ସେ ଭାବୁଛନ୍ତି ବୋଲି ଆଉ ଜଣେ ବ୍ୟକ୍ତି ମନ୍ତବ୍ୟ ଦେଇଛନ୍ତି।