ଅର୍ଥନୀତିକୁ ସଜାଡ଼ିବା ଲାଗି ନିର୍ମଳାଙ୍କ ବଡ଼ ପଦକ୍ଷେପ, ଆଉ ଡରେଇବେନି ଆୟକର ଅଧିକାରୀ, ଏଫପିଆଇରୁ ସରଚାର୍ଜ ପ୍ରତ୍ୟାହୃତ
ନୂଆଦିଲ୍ଲୀ : ଭାରତୀୟ ଅର୍ଥନୀତି ଏବେ ମାନ୍ଦାବସ୍ଥା ଆଡକୁ ଗତି କରୁଥିବାରୁ ଆଜି ସରକାର କେତେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ଏ ସଂପର୍କରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଛନ୍ତି । ବିଦେଶୀ ପୁଞ୍ଜିନିବେଶକଙ୍କୁ ଆକୃଷ୍ଟ କରିବାକୁ ଏଫପିଆଇ ବା ବିଦେଶୀ ପୋର୍ଟଫୋଲିଓ ନିବେଶକମାନଙ୍କଠାରୁ ସଂଗ୍ରହ କରାଯାଉଥିବା ସରଚାର୍ଜକୁ ପ୍ରତ୍ୟାହାର କରାଯାଇଛି । ସେହିପରି ଷ୍ଟାର୍ଟ-ଅପ ମାନଙ୍କ ଉପରୁ ଓ ଡିଆଇପିପିରେ ପଂଜୀକୃତ ନିବେଶକମାନଙ୍କଠାରୁ କୌଣସି ଆଞ୍ଜେଲ ଟାକ୍ସ ସଂଗ୍ରହ କରାଯିବ ନାହିଁ । ସେହିପରି ବିଦେଶୀ ନିବେଶକଙ୍କଠାରୁ ବଜେଟରେ ଘୋଷିତ ସୁପର ରିଚ ଟାକ୍ସ ସଂଗ୍ରହ କରାଯିବ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେଲା, ଏଣିକି କେବଳ ଏକ କେନ୍ଦ୍ରୀୟ କମ୍ପ୍ୟୁଟର ସିଷ୍ଟମରୁ ହିଁ ଆୟକରଦାତାମାନଙ୍କ ପାଖକୁ ନୋଟିସ ଯିବ । ୩ ମାସ ମଧ୍ୟରେ ନୋଟିସ ପଠାଯାଇଥିବା ମାମଲାଗୁଡ଼ିକର ଫଇସଲା କରାଯିବ । ଅନ୍ୟପକ୍ଷରେ ବ୍ୟାଙ୍କଗୁଡ଼ିକରେ ଅତିରିକ୍ତ ୭୦ ହଜାର କୋଟିର ପୁଞ୍ଜି ଭର୍ତ୍ତି କରାଯିବ । ସେହିପରି ରେପୋରେଟ ସହିତ ବ୍ୟାଙ୍କଋଣକୁ ଲିଙ୍କ୍ କରାଯାଇଛି । ଅର୍ଥାତ ରିଜର୍ଭ ବ୍ୟାଙ୍କ ରେପୋହାର କମାଇଲେ ତାହା ଆପେ ଆପେ ବ୍ୟାଙ୍କମାନଙ୍କ ସୁଧହାର ରେ ପ୍ରତିଫଳିତ ହେବ ।
ଅନ୍ୟପକ୍ଷରେ ସିଏସଆର ବା କର୍ପୋରେଟ ସାମାଜିକ ଦାୟିତ୍ୱବଦ୍ଧତା ନିୟମର ଉଲ୍ଲଙ୍ଘନକୁ ସିଭିଲ (ଦେଓ୍ଵାନୀ) ଅପରାଧ ଭାବରେ ବିବେଚନା କରାଯିବ । ଏଗୁଡ଼ିକୁ କ୍ରିମିନାଲ ବା ଫୌଜଦାରୀ ମାମଲା ହିସାବରେ ଧରାଯିବ ନାହିଁ ।