ବିଶ୍ୱ ଅର୍ଥନୀତିରେ ଅସ୍ଥିରତା, ବର୍ଷ ଶେଷସୁଦ୍ଧା ସୁନାଦର ୪୨ ହଜାର ଛୁଇଁବା ସମ୍ଭାବନା : ବିଶେଷଜ୍ଞ
ନୂଆଦିଲ୍ଲୀ : ଚଳିତ ବର୍ଷ ଶେଷସୁଦ୍ଧା ଭାରତରେ ସୁନାଦର ୧୦ ଗ୍ରାମ ପିଛା ୪୨ ହଜାରକୁ ଛୁଇଁବ ବୋଲି ବିଶେଷଜ୍ଞମାନେ ପୂର୍ବାନୁମାନ କରିଛନ୍ତି । ବିଶ୍ୱ ରାଜନୀତି ଓ ଅର୍ଥନୀତିରେ ଅସ୍ଥିରତା, ଡଲାର ତୁଳନାରେ ଟଙ୍କାର ମୂଲ୍ୟ ହ୍ରାସ ଓ ବିଭିନ୍ନ କେନ୍ଦ୍ରୀୟ ବ୍ୟାଙ୍କମାନଙ୍କ ଦ୍ୱାରା ସୁନା କ୍ରୟ ବୃଦ୍ଧି ଫଳରେ ଆସନ୍ତା କିଛି ମାସଧରି ସୁନାଚାହିଦା ବୃଦ୍ଧି ପାଇବ । ଏହା ଫଳରେ ସୁନାଦର ବଢିବ ।
Sambad is now on WhatsApp
Join and get latest news updates delivered to you via WhatsApp
କମଟ୍ରେଞ୍ଜ୍ ରିସର୍ଚ୍ଚର ସିଇଓ ଜ୍ଞାନଶେଖର ତ୍ୟାଗରାଜନ କହିଛନ୍ତି ଯେ ଅନ୍ତର୍ଜାତୀୟ ବଜାରରେ ସୁନା ଦର ବର୍ଷ ଶେଷସୁଦ୍ଧା ଆଉନ୍ସ ପିଛା ୧୬୫୦ ଡଲାର ଛୁଇଁବ । ଏହା ଫଳରେ ଭାରତରେ ସୁନାଦର ୪୨ ହଜାରକୁ ବୃଦ୍ଧି ପାଇବ । ସେହିପରି ମୋତିଲାଲ ଓସ୍ୱାଲର ଉପସଭାପତି-କମୋଡିଟି ରିସର୍ଚ୍ଚ ନବନୀତ ଦାମାନି କହିଛନ୍ତି ଯେ ଏବର୍ଷ ଭାରତରେ ସୁନାଦର ୧୫ ପ୍ରତିଶତ ବୃଦ୍ଧି ପାଇଛି । ଆଗାମୀ ଦିନରେ ସୁନା ଆହୁରି ବଢିବ ।
ମଧ୍ୟପୂର୍ବରେ ଯୁଦ୍ଧ ପରିସ୍ଥିତି ଯୋଗୁଁ ଅନ୍ତର୍ଜାତୀୟ ବଜାରରେ ଅସ୍ଥିରତା ଦେଖାଦେଇଛି । ସିରିଆ ଉପରେ ତୁର୍କୀର ଆକ୍ରମଣ, ଇରାନକୁ ନେଇ ବିବାଦ ଆଦି ଅସ୍ଥିରତା ବଢାଉଛି । ଅନ୍ୟପକ୍ଷରେ ଡଲାର ତୁଳନାରେ ଟଙ୍କା ଦୁର୍ବଳ ହେବା ଯୋଗୁଁ ଭାରତରେ ସୁନାଦର ବଢୁଛି । ତେବେ ଏଥର ଭାରତରେ ଧନତେରସ ଓ ଦୀପାବଳୀରେ ସୁନା ବିକ୍ରି ୪୦ ପ୍ରତିଶତ ହ୍ରାସ ପାଇଥିବା ଜଣାଯାଇଛି । ସୁନାଦର ଏବେ ୧୦ ଗ୍ରାମ ପିଛା ୩୯ ହଜାର ନିକଟବର୍ତ୍ତି ରହିଛି ।