ଅର୍ଥନୀତି ଉପରେ କରୋନା ମାଡ଼, ଭାରତର ଅଭିବୃଦ୍ଧି ୧.୬%କୁ କମିବ : ଗୋଲ୍ଡମ୍ୟାନ ସ୍ୟାକସ
ନୂଆଦିଲ୍ଲୀ : କରୋନା ଭାଇରସ ମହାମାରୀ ଯୋଗୁଁ ଭାରତର ଅର୍ଥନୀତି ଗୁରୁତର ଭାବେ କ୍ଷତିଗ୍ରସ୍ତ ହେବ । ଚଳିତ ଆର୍ଥକ ବର୍ଷରେ ଭାରତର ଆଥିର୍କ ଅଭିବୃଦ୍ଧି ୧.୬ ପ୍ରତିଶତକୁ ହ୍ରାସ ପାଇବ ବୋଲି ଅଟକଳ କରିଛି ଆମେରିକୀୟ ଇନଭେଷ୍ଟମେଣ୍ଟ ବ୍ୟାଙ୍କ ଗୋଲ୍ଡମ୍ୟାନ ସ୍ୟାକସ ।
Sambad is now on WhatsApp
Join and get latest news updates delivered to you via WhatsApp
ଗୋଲ୍ଡମ୍ୟାନ ସ୍ୟାକସ ପକ୍ଷରୁ କୁହାଯାଇଛି ଯେ କରୋନା ଭାଇରସ ମହାମାରୀ ପାଇଁ ଭାରତ ସରକାର ସାରା ଦେଶରେ ଲକଡାଉନ ଘୋଷଣା କରିଛନ୍ତି । ଏହା ଦ୍ୱାରା ଦେଶର ଅର୍ଥନୀତି ଗୁରୁତରଭାବେ କ୍ଷତିଗ୍ରସ୍ତ ହୋଇଚାଲିଛି । ଏହି ସଂକଟର ମୁକାବିଲା କରିବା ପାଇଁ ଭାରତର ସରକାର ଏପର୍ଯ୍ୟନ୍ତ କୌଣସି ଆଖିଦୃଷ୍ଟିଆ ପଦକ୍ଷେପ ଗ୍ରହଣ କରିନାହାନ୍ତି । ଯଥାଶୀଘ୍ର କୌଣସି ବଡ଼ ପଦକ୍ଷେପ ଗ୍ରହଣ ନ କରାଗଲେ ଦେଶର ଅର୍ଥନୀତି ଧୀମା ହୋଇଯିବ ।
କରୋନା ଭାଇରସ ଆସିବା ପୂର୍ବରୁ ବିଭିନ୍ନ ସଂସ୍ଥା ଭାରତର ଅଭିବୃଦ୍ଧି ଚଳିତ ଆଥିର୍କ ବର୍ଷରେ ୫ ପ୍ରତିଶତ ରହିବ ବୋଲି ପୂର୍ବାନୁମାନ କରିଥିଲେ ।
ଗତ ମାସ ଶେଷ ସପ୍ତାହରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ୧ ଲକ୍ଷ ୭୦ ହଜାର କୋଟିର ସହାୟତା ପ୍ୟାକେଜ ଘୋଷଣା କରିଥିଲେ । ଏହା ସହିତ ରିଜର୍ଭ ବ୍ୟାଙ୍କ ସୁଧହାର ହ୍ରାସ କରିଥିଲା । ଏହା ସହିତ ୩ ମାସିଆ ସୁଧ କିସ୍ତି ସ୍ଥଗିତ ରହିବା ସଂପର୍କରେ ଘୋଷଣା କରାଯାଇଥିଲା । ସରକାର ଆଉ ଏକ ବଡ଼ଧରଣର ପ୍ୟାକେଜ ଘୋଷଣା କରିବାକୁ ପ୍ରସ୍ତୁତି କରୁଛନ୍ତି ବୋଲି ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି ।