ମହଙ୍ଗା ହୋଇପାରେ ଦାମୀ ଘଡ଼ି ଓ ଜୋତା, ଜିଏସଟି ମନ୍ତ୍ରୀ ଗୋଷ୍ଠୀର ସୁପାରିଶ

ନୂଆଦିଲ୍ଲୀ: ଜିଏସଟି ହାରକୁ ନେଇ ଗଠିତ ମନ୍ତ୍ରୀ ଗୋଷ୍ଠୀ (ଜିଓଏମ୍) ଶନିବାର ୨୦ ଲିଟର ପାଣି ବୋତଲ, ସାଇକେଲ୍ ଏବଂ ଅଭ୍ୟାସ ନୋଟବୁକ୍ ଉପରେ ଟିକସ ହାର ୧୮%ରୁ ୫%କୁ ହ୍ରାସ କରିବାକୁ ନିଷ୍ପତ୍ତି ନେଇଛି।  ଏହାବ୍ୟତୀତ ସ୍ବାସ୍ଥ୍ୟବୀମା ଉପରେ ଜିଏସଟି କମାଇବାକୁ ସୁପାରିଶ କରାଯାଇଛି ।

ସେପଟେ ଜିଓଏମ୍ ଦାମୀ ଘଡ଼ି ଓ ଜୋତା ଉପରେ ଟିକସ ବଢ଼ାଇବାକୁ ପରାମର୍ଶ ଦେଇଛି ବୋଲି ଜଣେ ଅଧିକାରୀ କହିଛନ୍ତି। ବିହାର ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜିଏସଟି ହାର କୁ ନେଇ ଜିଓଏମର ନିଷ୍ପତ୍ତି ଦ୍ୱାରା ୨୨,୦୦୦ କୋଟି ଟଙ୍କାର ରାଜସ୍ୱ ଲାଭ ହେବ ବୋଲି ଆଶା କରାଯାଉଛି । ୨୦ ଲିଟର କିମ୍ବା ତା'ଠାରୁ ଅଧିକ ମୂଲ୍ୟର ପାଣି ବୋତଲ ଉପରେ ଜିଏସଟି ୧୮%ରୁ ୫%କୁ ହ୍ରାସ କରିବାକୁ ମନ୍ତ୍ରୀ ଗୋଷ୍ଠୀ ସୁପାରିସ କରିଛି।

ଏହାବ୍ୟତୀତ ଅଭ୍ୟାସ ନୋଟବୁକ୍ ଉପରେ ଜିଏସ୍ ଟି ୧୨%ରୁ ୫%କୁ ହ୍ରାସ କରିବାକୁ ସୁପାରିସ କରାଯାଇଥିଲା। ସେହିପରି ୧୦ ହଜାର ଟଙ୍କାରୁ କମ୍ ମୂଲ୍ୟର ସାଇକେଲ ଉପରେ ଜିଏସଟି ୧୨%ରୁ ୫%କୁ ହ୍ରାସ କରିବାକୁ ପରାମର୍ଶ ଦିଆଯାଇଛି। ଜିଏସଟି କାଉନସିଲ ଏହି ସୁପାରିସ ଉପରେ ଚୂଡ଼ାନ୍ତ ନିଷ୍ପତ୍ତି ନେବ। ଉତ୍ତରପ୍ରଦେଶ ଅର୍ଥମନ୍ତ୍ରୀ ସୁରେଶ କୁମାର ଖାନ୍ନା, ରାଜସ୍ଥାନ ସ୍ୱାସ୍ଥ୍ୟ ସେବା ମନ୍ତ୍ରୀ ଗଜେନ୍ଦ୍ର ସିଂହ, କର୍ଣ୍ଣାଟକ ରାଜସ୍ୱ ମନ୍ତ୍ରୀ କ୍ରିଷ୍ଣା ବାଇରେ ଗୌଡ଼ା ଏବଂ କେରଳ ଅର୍ଥମନ୍ତ୍ରୀ କେଏନ୍ ବାଳଗୋପାଳଙ୍କୁ ନେଇ ଗଠିତ ୬ ଜଣିଆ ଜିଏସଟି ପ୍ୟାନେଲ ୧୫,୦୦୦ ଟଙ୍କାରୁ ଅଧିକ ମୂଲ୍ୟର ଜୋତା ଏବଂ ୨୫,୦ ଟଙ୍କାରୁ ଅଧିକ ମୂଲ୍ୟର ହାତଘଡ଼ି ଉପରେ ଜିଏସଟି ୧୮%ରୁ ୨୮%କୁ ବୃଦ୍ଧି କରିବାକୁ ପରାମର୍ଶ ଦେଇଥିଲେ।