ବିମାନ ଟିକେଟ୍ ବାତିଲ ଦେୟ ୩୦୦୦ ଟଙ୍କାରୁ କମ୍ କରିବାକୁ ଏୟାର ଲାଇନ୍ସଙ୍କୁ କହିଲେ ସରକାର
ନୂଆଦିଲ୍ଲୀ : ବିମାନ ଯାତ୍ରୀଙ୍କଠାରୁ ଚଢାଦରର ଟିକେଟ ବାତିଲ ଦେୟ ନ ନେବାକୁ କେନ୍ଦ୍ର ସରକାର ବିମାନ ପରିବହନକାରୀ ସଂସ୍ଥାଙ୍କୁ କହିଛନ୍ତି। କେତେକ ଏୟାରଲାଇନ୍ସ ଟିକେଟ୍ ବାତିଲ୍ କରୁଥିବା ଯାତ୍ରୀଙ୍କଠାରୁ ୩୦୦୦ ଟଙ୍କାର ଦେୟ ନେଉଥିବା ଜଣାପଡ଼ିବା ପରେ କେନ୍ଦ୍ର ସରକାର ଏଭଳି ପଦକ୍ଷେପ ନେଇଛନ୍ତି । ଏହା ମାତ୍ରାଧିକ ବୋଲି ସରକାର ଅନୁଭବ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗୁରୁତ୍ୱପୂର୍ଣ୍ଣ କଥା ହେଲା, ବିମାନ ଟିକେଟ୍ ବାତିଲ୍ ଲାଗି ଯେଉଁ ଫି ଏୟାର ଲାଇନ୍ସମାନେ ଆଦାୟ କରୁଛନ୍ତି ତାହା ବେଳେ ବେଳେ ମୂଳ ଟିକେଟ୍ ଠାରୁ ବି ଅଧିକ ହୋଇଯାଉଛି । ‘ଉଡାନ୍’ ଯୋଜନାରେ ଏକ ଘଣ୍ଟାର ଘରୋଇ ଉଡାଣ ଲାଗି ୨୫୦୦ ଟଙ୍କା ଭଡା ସରକାର ଧାର୍ଯ୍ୟ କରିଛନ୍ତି । ଯେତେବେଳେ ଜଣେ ୨୫୦୦ ଟଙ୍କାର ଟିକେଟ୍ ବାତିଲ କରିବା ପରେ ୩୦୦୦ ଟଙ୍କା ଦେୟ ବାବତକୁ ଦେଉଛି, ତାହା ଅନୁଚିତ ମନେହେଉଛି ବୋଲି ବେସାମରିକ ବିମାନ ଚଳାଚଳ ମନ୍ତ୍ରୀ ଜୟନ୍ତ ସିହ୍ନା କହିଛନ୍ତି ।
ନିକଟରେ କେତେକ ଏୟାର ଲାଇନ୍ସ ଟିକଟ ବାତିଲ୍ ଦେୟ ବୃଦ୍ଧି କରିଛନ୍ତି । ଏହାର ସମୀକ୍ଷା ଲାଗି ମନ୍ତ୍ରାଳୟକୁ ନିର୍ଦ୍ଦେଶ ଦେଇଛନ୍ତି ମନ୍ତ୍ରୀ ଜୟନ୍ତ ସିହ୍ନା । ଅନ୍ୟପକ୍ଷରେ ଯଦି ଟିକେଟ୍ ବାତିଲ୍ ଦେୟର ଏହି ଦର ଜାରି ରହେ ତେବେ ବିମାନ ଟିକେଟ କ୍ରୟ ହ୍ରାସ ପାଇବ । ଯେଉଁ ଯାତ୍ରୀମାନେ ଶସ୍ତାରେ ଟିକେଟ ପାଇବା ଲାଗି ମାସ ମାସ ଆଗରୁ ଟିକେଟ ଖର୍ଦ୍ଦି କରୁଛନ୍ତି ସେମାନେ ଯେତେବେଳେ କୌଣସି କାରଣରୁ ଟିକେଟ୍ ବାତିଲ୍ କରୁଛନ୍ତି, ସେମାନଙ୍କୁ ଅଧିକ ଦେୟ ଦେବାକୁ ପଡୁଛି ।