କେରଳ ମୃତକଙ୍କୁ ତୁରନ୍ତ ବୀମା ରାଶି ଦିଅ: କେନ୍ଦ୍ର ସରକାର

ନୂଆଦିଲ୍ଲୀ: ପ୍ରବଳ ବର୍ଷା ହେତୁ କେରଳରେ ହୋଇଥିବା ଭୂସ୍ଖଳନ ଦୁର୍ଘଟଣାର ଶିକାର ହୋଇଥିବା ଲୋକଙ୍କୁ ତୁରନ୍ତ ବୀମା ରାଶି ଯୋଗାଇବା ପାଇଁ ଭାରତ ସରକାର ବୀମା କମ୍ପାନୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ପୀଡିତମାନଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ କେନ୍ଦ୍ର ସରକାର ସମସ୍ତ ସରକାରୀ କ୍ଷେତ୍ର ବୀମା କମ୍ପାନୀ(ଲାଇଫ୍ ଇନସୁରାନ୍ସ କର୍ପୋରେସନ୍ ଅଫ୍ ଇଣ୍ଡିଆ (ଏଲଆଇସି), ୟୁନାଇଟେଡ୍ ଇଣ୍ଡିଆ ଇନସୁରାନ୍ସ, ନ୍ୟୁ ଇଣ୍ଡିଆ ଆସୁରାନ୍ସ, ନ୍ୟାସନାଲ ଇନସୁରାନ୍ସ ଏବଂ ଓରିଏଣ୍ଟାଲ ଇନସୁରାନ୍ସ)ମାନଙ୍କୁ ନିର୍ଦ୍ଦେଶ ଦେଇଛନ୍ତି। ସମସ୍ତ ସାର୍ବଜନୀନ କ୍ଷେତ୍ର ବୀମା କମ୍ପାନୀ ସେମାନଙ୍କ ତରଫରୁ ପଲିସିଧାରୀଙ୍କ ସହ ଯୋଗାଯୋଗ ଆରମ୍ଭ କରିଛନ୍ତି। ଏଥିପାଇଁ ସ୍ଥାନୀୟ ଖବରକାଗଜ, ସୋସିଆଲ ମିଡିଆ, କମ୍ପାନୀ ୱେବସାଇଟ୍ ଏବଂ ଏସଏମଏସର ସହାୟତା ମଧ୍ୟ ନିଆଯାଉଛି। ଲୋକଙ୍କ ଯୋଗାଯୋଗ ପାଇଁ ମୋବାଇଲ୍ ନମ୍ବର ମଧ୍ୟ ଉପଲବ୍ଧ କରାଯାଉଛି |

ମିଳିଥିବା ସୂଚନା ମୁତାବକ କେରଳର ୱାୟାନାଡ, ପଲକ୍କଡ, କୋଝିକୋଡ, ମାଲାପୁରାମ ଏବଂ ଥ୍ରୀସୁର ଅଞ୍ଚଳରେ ସର୍ବାଧିକ କ୍ଷତି ହୋଇଛି। ଏହି କ୍ଷେତ୍ରଗୁଡିକରୁ ସର୍ବାଧିକ ଦାବି ଆସିପାରେ | ବୀମା କମ୍ପାନୀଗୁଡିକ ସେମାନଙ୍କର ଦାବିକୁ ଶୀଘ୍ର ସମାଧାନ କରିବାକୁ ଚେଷ୍ଟା କରିବେ ଏବଂ ଯଥାଶୀଘ୍ର ସେମାନଙ୍କୁ ବୀମା ରାଶି ଯୋଗାଇଦେବାକୁ ସରକାର ସ୍ୱତନ୍ତ୍ର ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ଶୀଘ୍ର ଦାବି ସମାଧାନ ପାଇଁ ସର୍ବନିମ୍ନ ସଂଖ୍ୟକ ଡକ୍ୟୁମେଣ୍ଟ୍ ନେବାକୁ କମ୍ପାନୀଗୁଡିକୁ ନିର୍ଦ୍ଦେଶ ଦିଆଯାଇଛି।

ଏହା ବ୍ୟତୀତ ପ୍ରତିଦିନ ସମସ୍ତ କମ୍ପାନୀର ଦାବି ସ୍ଥିତି ଯାଞ୍ଚ କରିବା ପାଇଁ ଏକ ପୋର୍ଟାଲ୍ ମଧ୍ୟ ସୃଷ୍ଟି କରାଯିବ | କେନ୍ଦ୍ର ସରକାର ଏବଂ ଅର୍ଥ ମନ୍ତ୍ରଣାଳୟ ଏହି ବିପର୍ଯ୍ୟୟର ଶିକାର ହୋଇଥିବା ଲୋକଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ ଚେଷ୍ଟା କରୁଛନ୍ତି। ଏହି ଦୁର୍ଘଟଣାରେ ମୃତ୍ୟୁସଂଖ୍ୟା ୩୫୦ ସଂଖ୍ୟା ଅତିକ୍ରମ କରିଛି। ନିଖୋଜ ଲୋକଙ୍କୁ ଖୋଜିବା ପାଇଁ ଭାରତୀୟ ସେନା, କେରଳ ପୁଲିସ ଏବଂ ଜରୁରୀକାଳୀନ ସେବା ମିଳିତ ଭାବେ କାର୍ଯ୍ୟ କରୁଛନ୍ତି। ଘରୋଇ କ୍ଷେତ୍ର କମ୍ପାନୀଗୁଡିକ ମଧ୍ୟ ସେମାନଙ୍କର ସାହାଯ୍ୟର ହାତ ବଢ଼ାଇଛନ୍ତି।