ଜାନୁଆରି ତୁଳନାରେ ଫେବ୍ରୁଆରିରେ ଜିଏସଟି ଆଦାୟ ୫.୫% ହ୍ରାସ
ନୂଆଦିଲ୍ଲୀ : ଜାନୁଆରି ମାସରେ ରେକର୍ଡ ୧ ଲକ୍ଷ ୨୦ ହଜାର କୋଟିର ଜିଏସଟି ଆଦାୟ ପରେ ଫେବ୍ରୁଆରି ମାସରେ ଦେଶର ଜିଏସଟି ରାଜସ୍ବ ୧ ଲକ୍ଷ ୧୩ ହଜାର କୋଟିକୁ ଖସିଆସିଛି । ଫଳରେ ଜାନୁଆରି ତୁଳନାରେ ଫେବ୍ରୁଆରି ଜିଏସଟି ସଂଗ୍ରହ ୫.୫ ପ୍ରତିଶତ କମିଛି । ତେବେ ଫେବ୍ରୁଆରି ୨୦୨୧ର ଜିଏସଟି ଆଦାୟ ଫେବ୍ରୁଆରି ୨୦୨୦ ତୁଳନାରେ ୭ ପ୍ରତିଶତ ଅଧିକ ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଫେବ୍ରୁଆରି ମାସରେ ସଂଗ୍ରହ ହୋଇଥିବା ଟ.୧,୧୩,୧୪୩ କୋଟି ମଧ୍ୟରୁ କେନ୍ଦ୍ରୀୟ ଜିଏସଟି ଟ. ୨୧୦୯୨ କୋଟି, ରାଜ୍ୟ ଜିଏସଟି ଟ.୨୭,୨୭୩ କୋଟି, ଇଣ୍ଟିଗ୍ରେଟେଡ ଜିଏସଟି ୫୫,୨୫୩ କୋଟି ଟଙ୍କା ଓ ସେସ ୯୫୨୫ କୋଟି ଟଙ୍କା ଅନ୍ତର୍ଭୁକ୍ତ ବୋଲି ଅର୍ଥ ମନ୍ତ୍ରାଳୟ ତଥ୍ୟରୁ ଜଣାପଡ଼ିଛି ।
ଓଡ଼ିଶାରେ ଜିଏସଟି ଆଦାୟ ୨୦ ପ୍ରତିଶତ ବୃଦ୍ଧି ପାଇ ୩୩୪୦ କୋଟିରେ ପହଞ୍ଚିଛି ।
ଫେବ୍ରୁଆରି ମାସକୁ ମିଶାଇ କ୍ରମାଗତ ୫ମ ମାସ ପାଇଁ ଦେଶର ଜିଏସଟି ୧ ଲକ୍ଷ କୋଟି ଉପରେ ରହିଛି । ସେହିପରି କ୍ରମାଗତ ୩ୟ ମାସ ପାଇଁ ଜିଏସଟି ଆଦାୟ ୧ ଲକ୍ଷ ୧୦ ହଜାର କୋଟି ଉପରେ ରହିଛି ।
ଗତ ବର୍ଷ ଏପ୍ରିଲ ମାସରେ ଦେଶରେ ଲକଡାଉନ ଚାଲିଥିବାରୁ ସରକାରଙ୍କ ଜିଏସଟି ରାଜସ୍ୱ ହ୍ରାସ ପାଇ ୩୨୧୭୨ କୋଟିକୁ ହ୍ରାସ ପାଇଥିଲା । ସେହିପରି ମେ ମାସରେ ଏହା ୬୨,୧୫୧ କୋଟିକୁ ବୃଦ୍ଧି ପାଇଥିଲା । ଜୁନ ମାସରେ ସରକାର ୯୦,୯୧୭ କୋଟି ଟଙ୍କାର ଜିଏସଟି ରାଜସ୍ୱ ସଂଗ୍ରହ କରିଥିଲେ ।