ଅନ୍ଲାଇନ୍ରେ ହେବ ଜିଏସ୍ଟି ମାମଲାର ସମାଧାନ
ଭୁବନେଶ୍ବର: କରୋନା ମହାମାରୀ ପରିପ୍ରେକ୍ଷୀରେ ସରକାରୀ କାର୍ଯ୍ୟାଳୟ ଗୁଡ଼ିକରେ ଲୋକଙ୍କ ଯା’ଆସ ଉପରେ କଟକଣା ଲଗାଯାଇଛି। ତେଣୁ ଟିକସଦାତାମାନଙ୍କୁ ଅନଲାଇନ ମାଧ୍ୟମରେ ସେମାନଙ୍କ ମାମଲାର ସମାଧାନ ପାଇଁ ବାଣିଜ୍ୟ କର ଓ ଜିଏସଟି କମିସନରଙ୍କ କାର୍ଯ୍ୟାଳୟ ପକ୍ଷରୁ ବ୍ୟବସ୍ଥା କରାଯାଇଛି। ଭାଟ୍, ସିଏସଟି, ଇଟି ଆଇନ ଆଦି କ୍ଷେତ୍ରରେ ଟିକସଦାତା ଓ ଟିକସ ପରାମର୍ଶଦାତାମାନେ ଇମେଲ୍ ମାଧ୍ୟମରେ ସେମାନଙ୍କ ଦସ୍ତଖତର ସ୍କାନ କପି, ଫଟୋ ପରିଚୟପତ୍ର ଓ ଅନ୍ୟାନ୍ୟ ଆବଶ୍ୟକ ଦସ୍ତାବିଜ ଆଦିକୁ କର୍ତ୍ତୃପକ୍ଷଙ୍କ ନିକଟକୁ ପଠାଇବେ। ଜିଏସଟି ମାମଲାରେ ଟିକସଦାତାମାନେ ଜିଏସ୍ଟି କମନ ପୋର୍ଟାଲରେ ତଥ୍ୟ ଆଦି ଦାଖଲ କରିବେ।
Sambad is now on WhatsApp
Join and get latest news updates delivered to you via WhatsApp
ଏସବୁ ଇ-ମେଲ୍ ପାଇବା ପରେ ସଂପୃକ୍ତ ଟିକସ କର୍ତ୍ତୃପକ୍ଷ ଜେଆଇଟିଏସଆଇ ମିଟ୍ ବା ଗୁଗୁଲ୍ ମିଟ୍ ବା ଜୁମ୍ ଆଦିରେ ଭିଡିଓ କନଫରେନ୍ସିଂ ବ୍ୟବସ୍ଥା କରିବେ। ଭିଡିଓକନଫରେନ୍ସିଂ ମାଧ୍ୟମରେ କେବେ ମାମଲା ଗୁଡ଼ିକର ଶୁଣାଣି ହେବ ସେ ସମ୍ପର୍କରେ ଆଗୁଆ ଟିକସଦାତାମାନଙ୍କୁ ଇମେଲ୍ ଓ ଏସଏମଏସ ମାଧ୍ୟମରେ ଜଣାଇ ଦିଆଯିବ। ସଂପୃକ୍ତ ଟିକସ ଅଧିକାରୀଙ୍କ ଅଫିସିଆଲ୍ ଇମେଲ୍ ଆଇଡି ଖୁବଶୀଘ୍ର ବାଣିଜ୍ୟ କର ଓ ଜିଏସଟି ସଂଗଠନର ୱେବ ଡାଇରେକ୍ଟୋରିରେ ପ୍ରକାଶ ପାଇବ। କ୍ଷେତ୍ରୀୟ କାର୍ଯ୍ୟାଳୟଗୁଡ଼ିକରେ ମଧ୍ୟ ଏହା ଉପଲବ୍ଧ ହେବ। ଲକଡାଉନ୍ ଅବଧିରେ ଟିକସଦାତାଙ୍କ ମାମଲାର ତୁରନ୍ତ ସମାଧାନ ପାଇଁ ଏଭଳି ପଦକ୍ଷେପ ନିଆଯାଇଛି। ଟିକସଦାତା ଓ ଟିକସ ପରାମର୍ଶଦାତାମାନେ ସେମାନଙ୍କ ଘରୁ ଓ କାର୍ଯ୍ୟାଳୟରେ ରହି ମାମଲାର ସମାଧାନ କରିପାରିବେ ବୋଲି ବାଣିଜ୍ୟକର ଓ ଜିଏସଟି କମିସନରଙ୍କ କାର୍ଯ୍ୟାଳୟ ସୂତ୍ରରୁ ଜଣାଯାଇଛି।