ଟାଟା ପୁଞ୍ଚକୁ ଟକ୍କର ଦେବାକୁ ହୁଣ୍ଡାଇ ଆଣିବ 'ଏକ୍ସଟର'

ନୂଆଦିଲ୍ଲୀ: ଅଟୋମୋବାଇଲ କାର ନିର୍ମାତା ହୁଣ୍ଡାଇ ଶୁକ୍ରବାର ଦିନ ଏହାର ନୂତନ ଏସୟୁଭିର ନାମ ଘୋଷଣା କରିଛି। ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି କମ୍ପାନୀ କହିଛି ଯେ ଏହି ନୂତନ ଏସୟୁଭିର ନାମ ଏକ୍ସଟର ହେବ। କାର ବିଶେଷଜ୍ଞଙ୍କ କହିବା ଅନୁଯାୟୀ ଏହି କାର ବଜାରରେ ଟାଟା ପୁଞ୍ଚ ସହିତ ପ୍ରତିଦ୍ୱନ୍ଦ୍ୱିତା କରିବ। ହୁଣ୍ଡାଇର ଭେନ୍ୟୁ ପରେ ଏହା ସବୁଠାରୁ ଶସ୍ତା ଏସୟୁଭି ହେବ ବୋଲି ଆଶା କରାଯାଉଛି। ଭାରତୀୟ ବଜାରରେ ଏସୟୁଭି କାର ପାଇଁ ଅଧିକ ଚାହିଦା ଅଛି |

ଆଉ ଏଥିପାଇଁ କମ୍ପାନୀ ଚଳିତ ବର୍ଷ ଶେଷ ସୁଦ୍ଧା ଆଉ ଦୁଇଟି ଏସୟୁଭି କାର ଆଣିବାକୁ ଯାଉଛି। ବର୍ତ୍ତମାନ ସୁଦ୍ଧା କମ୍ପାନୀ ହୁଣ୍ଡାଇ ଏକ୍ସଟରର ମୂଲ୍ୟ, ଲୁକ୍ ନେଇ କୌଣସି ସୂଚନା ପ୍ରକାଶ କରି ନାହିଁ। ହୁଣ୍ଡାଇ ମୋଟର ଇଣ୍ଡିଆ ଲିମିଟେଡର ସିଇଓ ତରୁଣ ଗର୍ଗ କହିଛନ୍ତି, “ଆମର ନୂତନ ଏସୟୁଭି ହୁଣ୍ଡାଇ ଏକ୍ସଟରର ନାମ ଘୋଷଣା କରି ଆମେ ଗର୍ବିତ। ଏହା ସ୍ମାର୍ଟ ମୋବିଲିଟି ସହିତ ନୂତନ ପିଢ଼ିର କ୍ରେତାମାନଙ୍କର ଆବଶ୍ୟକତାକୁ ପୂରଣ କରିବ | ମିଡିଆ ରିପୋର୍ଟ ଅନୁଯାୟୀ, ହୁଣ୍ଡାଇ ଏକ୍ସଟର ଏକ ପାଞ୍ଚ ସିଟ୍ ବିଶିଷ୍ଟ କାର ହେବ | ଏଥିରେ ୧.୨-ଲିଟର ଇଞ୍ଜିନ୍ ଦିଆଯାଇପାରେ | ଏଥିରେ ୫-ସ୍ପିଡ୍ ମାନୁଆଲ୍ ଏବଂ ସ୍ୱୟଂଚାଳିତ ଟ୍ରାନ୍ସମିସନ୍ ଗିଅରବକ୍ସ ରହିବ ଓ ଏହି କାର ୧୦ ଲକ୍ଷରୁ କମ୍ ମୂଲ୍ୟରେ ଉପଲବ୍ଧ ହେବ ବୋଲି ଆକଳନ କରାଯାଉଛି |