ଭାରତ ଫେରିଲା ଦକ୍ଷିଣ କୋରିଆ କଂପାନି ‘ଦେଉ’, ଆଣିବ ଇ-ବାଇକ୍

ନୂଆଦିଲ୍ଲୀ: ନବେ ଦଶକରେ ଭାରତରେ ବେଶ୍ ଲୋକପ୍ରିୟ ଥିବା ଦକ୍ଷିଣ କୋରିଆ କଂପାନି ଦେଉ ପୁଣି ଥରେ ଭାରତୀୟ ବଜାରକୁ ପ୍ରତ୍ୟାବର୍ତ୍ତନ କରିଛି। କଂପାନି ଇଲେକ୍ଟ୍ରିକ୍ ଗାଡ଼ି ବିକ୍ରି କରିବ। ସିଏଲୋ ଓ ମଟିଜ୍ ଭଳି କାର୍‌ ଜରିଆରେ ଲୋକପ୍ରିୟତା ହାସଲ କରିଥିବା ଦେବୁ ଭାରତ ଆସିବା ପାଇଁ କେଲ୍‌ୱନ୍ ଇଲେକ୍ଟ୍ରୋନିକ୍ସ ଆଣ୍ଡ୍ ଆପ୍ଲାଏନ୍‌ସେସ୍‌ ସହ ଲାଇସେନ୍ସ ବୁଝାମଣା ସ୍ବାକ୍ଷର କରିଛି।

‌ପୋସ୍କୋ ଗ୍ରୁପ୍ ଅଧୀନରେ ପରିଚାଳିତ ହେଉଥିବା ଦେଉ ଆମେରିକା, ୟୁରୋପ, ଚୀନ୍, ମଧ୍ୟପ୍ରାଚ୍ୟ ଓ ୟୁଏଇରେ ବେଶ ପରିଚିତ। ଭାରତୀୟ ବଜାର ଦ୍ରୁତ ଗତିରେ ଆଗକୁ ବଢ଼ୁଥିବାରୁ କଂପାନି ପୁଣି ଥରେ ଏଠାକୁ ଆସିବାକୁ ନିଷ୍ପତ୍ତି ନେଇଛି ବୋଲି ଦେଉ ଇଣ୍ଡିଆର ନିର୍ଦ୍ଦେଶକ ଚାନ୍ ରିୟୁ କହିଛନ୍ତି। ପ୍ରାରମ୍ଭିକ ପର୍ଯ୍ୟାୟରେ କଂପାନି ଦୁଇ ଚକିଆ ଓ ଚାରି ଚକିଆ ଗାଡ଼ି ପାଇଁ ବ୍ୟାଟେରି ଓ ସୋଲାର ବ୍ୟାଟେରି ଓ ଇନଭର୍ଟର ଭଳି ଅନ୍ୟାନ୍ୟ ଶକ୍ତି ଉତ୍ପାଦ ବିକ୍ରି କରିବ।

ଏହା ବ୍ୟତୀତ କଂପାନି ଏୟାର ପ୍ୟୁରିଫାୟର, ଏଲ୍‌ଇଡି ଟିଭି, ଅଡିଓ ସ୍ପିକର, ୱାଟର ପ୍ୟୁରିଫାୟର, ସ୍ମାର୍ଟ ଫ୍ୟାନ୍, ଏୟାର କୁଲର ଓ ହୋମ୍ ଅଟୋମେସନ ସିଷ୍ଟମ୍ ଆଣିବ। ତିନି ବର୍ଷ ମଧ୍ୟରେ କଂପାନି ଇ-ବାଇକ୍ ଓ ଇ-ସାଇକଲ୍ ମଧ୍ୟ ଆଣିବ। ୧୯୯୫ରେ ଦେଉ ଭାରତ ଆସିବା ସହ ସିଏଲୋ ସେଡାନର ବଜାର ପ୍ରବେଶ କରିଥିଲା। ୨୦୦୧ରେ ଜେନେରାଲ ମୋଟର୍ସ ଏହାର ଭାରତୀୟ ସହାୟକ କଂପାନିକୁ ବା‌ଦ ‌ଦେଇ ଅନ୍ୟ ସମ୍ପତ୍ତିଗୁଡ଼ିକୁ କିଣିଥିଲା। ତେଣୁ ୨୦୦୩-୦୪ରେ ଦେଉକୁ ବନ୍ଦ କରିଦିଆଯାଇଥିଲା। କିଛି ବର୍ଷ ପରେ ପୋସ୍କୋ ତାହାକୁ କିଣିଥିଲା।