ନୂଆଦିଲ୍ଲୀ : କରୋନା ମହାମାରୀର ୨ୟ ଲହର ଭାରତର ଅର୍ଥନୀତିକୁ ଗୁରୁତରଭାବେ ପ୍ରଭାବିତ କରିଛି । ଫଳରେ ଚଳିତ ଆର୍ଥିକ ବର୍ଷରେ ଦେଶର ଅର୍ଥନୈତିକ ଅଭିବୃଦ୍ଧି ୯.୫ ପ୍ରତିଶତକୁ କମି ଆସିବ ବୋଲି ଅନ୍ତର୍ଜାତୀୟ ମୁଦ୍ରାପାଣ୍ଠି କହିଛି ।
Sambad is now on WhatsApp
Join and get latest news updates delivered to you via WhatsApp
ଆଇଏମଏଫର ଜୁଲାଇ ବିଶ୍ବ ଅର୍ଥନୈତିକ ପ୍ରେକ୍ଷାପଟ୍ଟ ରିପୋର୍ଟରେ ଭାରତର ଅର୍ଥନୀତି ୯.୫ ପ୍ରତିଶତ ହାରରେ ଅଭିବୃଦ୍ଧି ହାସଲ କରିବ ବୋଲି କୁହାଯାଇଛି । ଏହା ଗତ ଏପ୍ରିଲରେ ଆଇଏମଏଫ କରିଥିବା ପୂର୍ବାନୁମାନଠାରୁ ୩୦୦ ବେସିସ ପଏଣ୍ଟ ବା ୩ ପ୍ରତିଶତ କମ । ରିପୋର୍ଟରେ କୁହାଯାଇଛି ଯେ କରୋନାର ୨ୟ ଲହର ଯୋଗୁଁ ଭାରତୀୟ ଅର୍ଥନୀତିର ସୁଧାର ପ୍ରକ୍ରିୟା ଗୁରୁତରଭାବେ ପ୍ରଭାବିତ ହୋଇଛି । ୨୦୨୦-୨୧ରେ ଭାରତୀୟ ଅର୍ଥନୀତିର ଅଭିବୃଦ୍ଧି ୭.୩ ପ୍ରତିଶତ ହ୍ରାସ ପାଇଥିଲା ।
ଅନ୍ୟପକ୍ଷରେ ଆଇଏମଏଫ ବିଶ୍ବ ଅର୍ଥନୈତିକ ଅଭିବୃଦ୍ଧିର ପୂର୍ବାନୁମାନକୁ ୬ ପ୍ରତିଶତରେ ଅପରିବର୍ତ୍ତିତ ରଖିଛି । ୨୦୨୦ରେ ବିଶ୍ବ ଅର୍ଥନୈତିକ ଅଭିବୃଦ୍ଧି ୩.୨ ପ୍ରତିଶତ ଧୀମା ହୋଇଥିଲା ।
ରିପୋର୍ଟରେ ସତର୍କ କରିଦିଆଯାଇଛି ଯେ ଟିକା ଉପଲବ୍ଧତାକୁ ନେଇ ବିଶ୍ବର ବିକଶିତ ଓ ବିକାଶଶୀଳ ତଥା ଅନୁନ୍ନତ ଦେଶଙ୍କ ମଧ୍ୟରେ ତାରତମ୍ୟ ବଢୁଛି । ଅର୍ଥାତ ଉନ୍ନତ ଦେଶରେ ଟିକା ଉପଲବ୍ଧତା ଥିବାରୁ ସେଠାକାର ଅଭିବୃଦ୍ଧି ଦ୍ରୁତ ରହିବ । କିନ୍ତୁ ବିକାଶଶୀଳ ତଥା ଅନୁନ୍ନତ ଦେଶମାନେ ଟିକା ଅଭାବ ସମ୍ମୁଖୀନ ହେଉଥିବାରୁ ସେଠାରେ ସଂକ୍ରମଣ ବଢିବ ଓ ଅଭିବୃଦ୍ଧି ଧୀମା ରହିବ ।