ଧନତେରସରେ ଲୋକେ ଘରକୁ ବୋହିନେଲେ ୨୫ ଟନ୍ ସୁନା, ୨୫୦ ଟନ୍ ରୁପା: ସିଏଆଇଟି ରିପୋର୍ଟ

ନୂଆଦିଲ୍ଲୀ: ବଜାରରେ ଭିଡ଼, ସାରା ଦେଶରେ ଜୋରଦାର କିଣାକିଣି ଜାରି ରହିଛି। ଧନତେରସରେ ବିକ୍ରି ହୋଇଥିବା ସୁନା ରୁପା ପରିମାଣ ପ୍ରକାଶ ପାଇଛି। ଚଳିତ ଥର ସବୁଠାରୁ ଅଧିକ ସୁନା ଓ ରୂପା ବିକ୍ରି ହୋଇଛି। ବାସ୍ତବରେ ଦେଶରେ ଧନତେରସରେ ଲୋକେ ସୁନା ଓ ରୂପା କିଣିଥାନ୍ତି । ଏଥର ପାଖାପାଖି ୨୫୦୦ କୋଟି ଟଙ୍କାର ରୂପା କିଣାଯାଇଥିଲା। ଗୋଟିଏ ଦିନରେ ୨୦ ହଜାର କୋଟି ଟଙ୍କାର ସୁନା କିଣାଯାଇଛି। 

କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) ଅନୁଯାୟୀ, ଚଳିତ ବର୍ଷ ଧନତେରସର ମୂଲ୍ୟ ପ୍ରାୟ ୬୦ ହଜାର କୋଟି ଟଙ୍କା ହେବ ବୋଲି ଆକଳନ କରାଯାଇଛି।  ଦୀପାବଳି ବେଳକୁ ଏହି ସଂଖ୍ୟା ୧ ଲକ୍ଷ କୋଟି ଟପିଯିବ ବୋଲି ଆକଳନ କରାଯାଇଛି। ଏହି ସମୟ ମଧ୍ୟରେ ସୁନା, ରୂପା ବ୍ୟତୀତ ପିତ୍ତଳ ବାସନ ମଧ୍ୟ ଜବରଦସ୍ତ କ୍ରୟ ହୋଇଛି।

ଏକ ଆକଳନ ଅନୁଯାୟୀ, କେବଳ ସୁନା ବିକ୍ରି ୨୦,୦୦୦ କୋଟି ଟଙ୍କା ଅତିକ୍ରମ କରିଛି। ବ୍ୟବସାୟୀମାନେ ଏହି ପାର୍ବଣ ଋତୁରେ ଆଗୁଆ ବିକ୍ରି ବଢିବ ବୋଲି ଆଶା କରୁଥିଲେ, ତେଣୁ ସେମାନେ ସେମାନଙ୍କର ସମସ୍ତ ପ୍ରସ୍ତୁତି କରିସାରିଥିଲେ । ଏକ ରିପୋର୍ଟରେ ଦାବି କରାଯାଇଛି ଯେ ଚୀନରେ ନିର୍ମିତ ସାମଗ୍ରୀର ଚାହିଦା ହ୍ରାସ ପାଇବା କାରଣରୁ ପ୍ରାୟ ଲକ୍ଷ ଲକ୍ଷ ଟଙ୍କାର କ୍ଷତି ସହିବାକୁ ପଡ଼ିବ ବୋଲି ଆକଳନ କରାଯାଇଛି।

ଲୋକମାନେ ସୁନା ଓ ରୂପା ଅଳଙ୍କାର, ବାସନ, ପୋଷାକ, ଇଲେକ୍ଟ୍ରୋନିକ୍ସ ଓ ଗାଡି କିଣିଥିବା ବେଳେ ପର୍ବପର୍ବାଣୀ ଋତୁରେ ସୁନା ଓ ରୂପା ବିକ୍ରି ମଧ୍ୟ ବୃଦ୍ଧି ପାଇଛି । ବ୍ୟୁରୋ ଅଫ୍ ଇଣ୍ଡିଆନ୍ ଷ୍ଟାଣ୍ଡାର୍ଡରେ ପ୍ରାୟ ୨ ଲକ୍ଷ ପଞ୍ଜୀକୃତ ଗହଣା ବ୍ୟବସାୟୀ ଅଛନ୍ତି, ଯେଉଁମାନେ ଧନତେରସରେ ପ୍ରାୟ ୨୫ ଟନ୍ ସୁନା ବିକ୍ରି କରିଛନ୍ତି, ଯାହାର ମୂଲ୍ୟ ପ୍ରାୟ ୨୦,୦୦୦ କୋଟି ଟଙ୍କା। ସେହିପରି ଧନତେରସରେ ସାରା ଦେଶରେ ୨୫୦ ଟନ୍ ରୁପା ବିକ୍ରି ହୋଇଥିବା ବେଳେ ଏହାର ମୂଲ୍ୟ ୨୫୦୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି।

ଗତ ଏକ ବର୍ଷ ମଧ୍ୟରେ ସୁନା ଦରରେ ମଧ୍ୟ ଜୋରଦାର ବୃଦ୍ଧି ଘଟିଥିବା ବେଳେ ୨୦୨୪ରେ ଏହା ୩୦ ପ୍ରତିଶତରୁ ଅଧିକ ବୃଦ୍ଧି ପାଇଛି। ଗତବର୍ଷ ଧନତରେସ ଅବସରରେ ସୁନା ଦର ୧୦ ଗ୍ରାମ ପିଛା ପ୍ରାୟ ୬୦ ହଜାର ଟଙ୍କା ଥିବା ବେଳେ ଏବେ ତାହା ୮୦ ହଜାରକୁ ବୃଦ୍ଧି ପାଇଛି। ସେହିପରି ଗତବର୍ଷ ରୁପା ମୂଲ୍ୟ ୭୦ ହଜାର ଟଙ୍କା ଥିବା ବେଳେ ଏବେ ଏହା ୧ ଲକ୍ଷ ଟଙ୍କା ପାଖାପାଖି ପହଞ୍ଚିଛି ।  

ସୂଚନାଯୋଗ୍ୟ, ଧନତେରସରେ ଆମ ଦେଶରେ ସପିଂ କରିବାର ପରମ୍ପରା ରହିଛି। ଏହି ଦିନ ସୁନା, ରୂପା, ବାସନ, ଯାନବାହନ, ମୋବାଇଲ, ପୋଷାକ ଓ ଆସବାବପତ୍ର ଭଳି ଜିନିଷ କିଣିବା ଶୁଭ ବୋଲି ବିବେଚନା କରାଯାଏ। ଲୋକମାନେ ବହୁ ସଂଖ୍ୟାରେ  ଝାଡୁ ମଧ୍ୟ କିଣୁଛନ୍ତି।