ନୂଆଦିଲ୍ଲୀ : ଭାରତର ଅର୍ଥନୀତି ପୁଣି ଥରେ ଅଭିବୃଦ୍ଧି ପଥକୁ ଫେରିବ, କାରଣ ସଂକଟର ସମ୍ମୁଖୀନ ହେବା ପାଇଁ ଭାରତୀୟଙ୍କ ଦକ୍ଷତା ଉପରେ ତାଙ୍କର ପୂର୍ଣ୍ଣ ଭରସା ରହିଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଭାରତୀୟ ଶିଳ୍ପ ମହାସଂଘ (ସିଆଇଆଇ)ର ବାର୍ଷିକ ଅଧିବେଶନକୁ ସଂମ୍ବୋଧିତ କରି ସେ କହିଛନ୍ତି ଯେ ଭାରତରେ ଲକଡାଉନ ଶେଷ, ହେବାକୁ ଯାଉଛି ଓ ଅନଲକ-୧ ଆରମ୍ଭ ହୋଇଛି । ଜୁନ ୮ ପରେ ଆହୁରି ଅନେକ କିଛି ଖୋଲିଯିବ । ଭାରତ ପୁଣି ଥରେ ନିଜର ଅଭିବୃଦ୍ଧିକୁ ହାସଲ କରିନେବ ବୋଲି ତାଙ୍କର ବିଶ୍ବାସ ରହିଛି । କାରଣ ଭାରତୀୟ ଚାଷୀ, ଭାରତୀୟ ଶିଳ୍ପଜଗତ, ଏମଏସଏମଇ କ୍ଷେତ୍ରର ଦକ୍ଷତା ଉପରେ ତାଙ୍କର ପୂର୍ଣ୍ଣ ଭରସା ରହିଛି ।
ସେ କହିଛନ୍ତି ଯେ କରୋନା ପରେ ଦେଶର ଅର୍ଥନୀତିକୁ ସୁଦୃଢ କରିବା ଉପରେ ସରକାର ଅଗ୍ରାଧିକାର ଦେଉଛନ୍ତି । ଏଥିପାଇଁ ସରକାର କେତେକ ସ୍ବଳ୍ପ ମିଆଦୀ ଓ ଦୀର୍ଘ ମିଆଦୀ ପଦକ୍ଷେପ ନେଇଛନ୍ତି । ସେହିପରି କୃଷି କ୍ଷେତ୍ରରେ ସଂସ୍କାର ଅଣାଯାଇ ଚାଷୀଙ୍କୁ ଅଧିକ ସଶକ୍ତ କରିବାକୁ ପଦକ୍ଷେପ ନିଆଯାଇଛି ।
ସେ କହିଛନ୍ତି ଯେ ଭାରତକୁ ଆତ୍ମନିର୍ଭରଶୀଳ କରିବାକୁ ହେଲେ ଶିଳ୍ପଜଗତର ଗୁରୁ ଭୂମିକା ରହିଛି । ଏଥିପାଇଁ ଭାରତୀୟ ଶିଳ୍ପ ଜଗତ ସହ ସେ ଛିଡ଼ା ହୋଇଛନ୍ତି । ଶିଳ୍ପ ଜଗତ ଏକ ପାଦ ଚାଲିଲେ ସରକାର ଚାରିପାଦ ଚାଲିବେ ।
ଶିଳ୍ପପତିମାନଙ୍କୁ ସେ କହିଛନ୍ତି ଯେ ଭାରତ ନିଜର ସ୍ଥାନୀୟ ସପ୍ଲାଇଚେନ ଓ ଦେଶୀ ଶିଳ୍ପସଂସ୍ଥା ଗୁଡ଼ିକୁ ସୁଦୃଢ କରିବା ଆବଶ୍ୟକ । ଭାରତକୁ ଆତ୍ମନିର୍ଭର ହେବାକୁ ହେଲେ ଆମଦାନୀ ଉପରେ ନିର୍ଭରଶୀଳତା କମାଇ ସ୍ୱଦେଶୀ ବଜାର ଉପରେ ଗୁରୁତ୍ବ ଦେବାକୁ ହେବ ।