ଭାରତ ଅଭିବୃଦ୍ଧି ବିଶ୍ବରେ ସର୍ବାଧିକ, ୨୦୨୨-୨୩ରେ ଅଭିବୃଦ୍ଧି ୭.୨%
ନୂଆଦିଲ୍ଲୀ : ଭାରତ ବିଶ୍ବର ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଭାବେ ଉଭା ହୋଇଛି। ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ତଥ୍ୟ ଅନୁସାରେ ୨୦୨୨-୨୩ ଆର୍ଥିକ ବର୍ଷରେ ଭାରତର ଅଭିବୃଦ୍ଧି ୭.୨ ପ୍ରତିଶତ ରହିଛି ଯାହା ସାରା ବିଶ୍ବରେ ସର୍ବାଧିକ। ଅନ୍ୟ କୌଣସି ଦେଶର ଅଭିବୃଦ୍ଧି ଭାରତ ପାଖାପାଖି ନାହିଁ। ଦ୍ବିତୀୟ ସ୍ଥାନରେ ଥିବା ଇଣ୍ଡୋନେସିଆର ଅଭିବୃଦ୍ଧି ୫.୩ ପ୍ରତିଶତ ରହିଛି। ୨୦୨୧-୨୨ରେ ଭାରତର ଅଭିବୃଦ୍ଧି କିନ୍ତୁ ୯.୧ ପ୍ରତିଶତ ଭଳି ଉଚ୍ଚ ସ୍ତରରେ ଥିଲା।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ରିଜର୍ଭ ବ୍ୟାଙ୍କଠାରୁ ଆରମ୍ଭ କରି ବିଶ୍ବର ବିଭିନ୍ନ ସଂସ୍ଥା ୨୦୨୨-୨୩ରେ ଭାରତର ଅଭିବୃଦ୍ଧି ୭% ଭିତରେ ରହିବ ବୋଲି ଆକଳନ କରିଥିଲେ। କିନ୍ତୁ ବାସ୍ତବ ଅଭିବୃଦ୍ଧି ତା’ଠାରୁ ଅଧିକ ରହିଛି। ଭାରତ ୭% ସ୍ତର ଅତିକ୍ରମ କରିବାରେ ସଫଳ ହୋଇଛି ଯାହା ଅର୍ଥନୀତିର ଦୃଢ଼ତାକୁ ପ୍ରମାଣିତ କରୁଛି। ୨୦୨୨-୨୩ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଦେଶର ଅଭିବୃଦ୍ଧି ୧୩.୫%, ଦ୍ବିତୀୟ ତ୍ରୈମାସିକରେ ୬.୩ ପ୍ରତିଶତ, ତୃତୀୟ ତ୍ରୈମାସିକରେ ୪.୫ ପ୍ରତିଶତ ଓ ଚତୁର୍ଥ ତ୍ରୈମାସିକରେ ୬.୧ ପ୍ରତିଶତ ରହିଥିଲା। ଏନ୍ଏସ୍ଓ ତଥ୍ୟ ଅନୁସାରେ ୨୦୨୨-୨୩ରେ ଭାରତର ମୋଟ ଘରୋଇ ଉତ୍ପାଦ (ଜିଡିପି) ୧୬୦.୦୬ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି। ୨୦୨୧-୨୨ରେ ତାହା ୧୪୯.୨୬ ଲକ୍ଷ କୋଟି ଟଙ୍କା ଥିଲା।
ମାନୁଫାକ୍ଚରିଂ କ୍ଷେତ୍ରରେ ମୋଟ ମୂଲ୍ୟ ଯୋଗ (ଜିଭିଏ) ଅଭିବୃଦ୍ଧି ୪.୫ ପ୍ରତିଶତ ରହିଥିବା ବେଳେ ଖଣିରେ ୪.୩ ପ୍ରତିଶତ, ନିର୍ମାଣରେ ୧୦.୪ ପ୍ରତିଶତ ଓ କୃଷି କ୍ଷେତ୍ରରେ ୫.୫ ପ୍ରତିଶତ ରହିଛି। ବିଦ୍ୟୁତ, ଗ୍ୟାସ୍, ଜଳ ଯୋଗାଣ ଓ ଅନ୍ୟାନ୍ୟ ୟୁଟିଲିଟି ସେବା ଅଭିବୃଦ୍ଧି ୬.୯ ପ୍ରତିଶତ ରହିଥିବା ବେଳେ ସେବା କ୍ଷେତ୍ରର ଅଭିବୃଦ୍ଧି ୯.୧ ପ୍ରତିଶତ ରହିଛି। ଆର୍ଥିକ ସେବା, ରିଅଲ ଇଷ୍ଟେଟ୍ ଓ ସେପାଦାର ସେବା ଅଭିବୃଦ୍ଧି ୭.୧ ପ୍ରତିଶତ ହୋଇଛି। ସାଧାରଣ ପ୍ରଶାସନ, ପ୍ରତିରକ୍ଷା ଓ ଅନ୍ୟାନ୍ୟ ସେବା କ୍ଷେତ୍ରର ଅଭିବୃଦ୍ଧି ୩.୧ ପ୍ରତିଶତ ରହିଛି।
ଅର୍ଥନୀତିର ସ୍ଥିରତାକୁ ଦର୍ଶାଉଛି: ମୋଦୀ
ନୂଆଦିଲ୍ଲୀ : ଆର୍ଥିକ ବର୍ଷ ୨୦୨୨-୨୩ର ଅଭିବୃଦ୍ଧି ତଥ୍ୟକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଖୁସି ପ୍ରକଟ କରିଛନ୍ତି। ସେ କହିଛନ୍ତି ଯେ ବହୁ ପ୍ରକାର ଆହ୍ବାନ ସତ୍ତ୍ବେ ଏହା ଭାରତୀୟ ଅର୍ଥନୀତିର ସ୍ଥିରତାକୁ ଦର୍ଶାଉଛି। ଏହି ଦୃଢ଼ ପ୍ରଦର୍ଶନ ଓ ମୋଟ ଉପରେ ରହିଥିବା ଆଶା ଆମ ଅର୍ଥନୀତି ସଠିକ୍ ପଥରେ ଥିବା ଏବଂ ଆମ ଲୋକମାନଙ୍କ ଦୃଢ଼ତାର ପ୍ରତିଫଳନ ବୋଲି ସେ କହିଛନ୍ତି।ଖୁସି ହେବାର କିଛି କାରଣ ନାହିଁ: କଂଗ୍ରେସ
ନୂଆଦିଲ୍ଲୀ : ଅଭିବୃଦ୍ଧି ତଥ୍ୟକୁ ନେଇ ଖୁସି ହେବାର କୌଣସି କାରଣ ନାହିଁ। ଅର୍ଥନୀତି ‘ତ୍ରୈମାସିକରୁ ତ୍ରୈମାସିକ ପର୍ଯ୍ୟନ୍ତ’ର ସିନେମା ଭଳି ନୁହେଁ। ଅର୍ଥନୀତିରେ ଦୁଇଟି ବଡ଼ ସମସ୍ୟା ରହିଛି। ତାହା ହେଉଛି ନିବେଶ ଓ ଉପଯୋଗିତା। ଭାରତ ଯଥେଷ୍ଟ ପରିମାଣର ଉତ୍ପାଦନ କରୁନି କି ଯଥେଷ୍ଟ ପରିମାଣର ବ୍ୟବହାର ବି କରୁନି ବୋଲି କଂଗ୍ରେସ ନେତା ଜୟରାମ ରମେଶ କହିଛନ୍ତି।
