ମେ ମାସରେ ୧.୪୧ ଲକ୍ଷ କୋଟିର ଜିଏସଟି ରାଜସ୍ବ ସଂଗ୍ରହ, ଓଡ଼ିଶାରୁ ୩୯୫୬ କୋଟି
ନୂଆଦିଲ୍ଲୀ : ନିକଟରେ ସମାପ୍ତ ମେ ମାସରେ ଦେଶର ଜିଏସଟି ରାଜସ୍ବ ସଂଗ୍ରହ ୧୪୦,୮୮୫ କୋଟିରେ ପହଞ୍ଚିଛି । ଏହା ମେ ୨୦୨୧ ତୁଳନାରେ ୪୪ ପ୍ରତିଶତ ଅଧିକ ହୋଇଥିବା ବେଳେ ଏପ୍ରିଲ ୨୦୨୨ର ରେକର୍ଡ ୧.୬୮ ଲକ୍ଷ କୋଟିର ଜିଏସଟି ରାଜସ୍ବଠାରୁ ୧୬ ପ୍ରତିଶତ କମ ।
Sambad is now on WhatsApp
Join and get latest news updates delivered to you via WhatsApp
ମେରେ ସଂଗ୍ରହ ହୋଇଥିବା ୧୪୦,୮୮୬ କୋଟିର ଜିଏସଟି ମଧ୍ୟରୁ କେନ୍ଦ୍ରୀୟ ଜିଏସଟି ଟ. ୨୫,୦୩୬ କୋଟି, ରାଜ୍ୟ ଜିଏସଟି ଟ.୩୨,୦୦୧ କୋଟି, ଇଣ୍ଟିଗ୍ରେଟେଡ ଜିଏସଟି ୭୩,୩୪୫ କୋଟି ଟଙ୍କା ଓ ସେସ ୧୦,୫୦୨ କୋଟି ଟଙ୍କା ଅନ୍ତର୍ଭୁକ୍ତ ବୋଲି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
ମେ ମାସରେ ଓଡ଼ିଶାରୁ ୩୯୫୬ କୋଟି ଟଙ୍କାର ଜିଏସଟି ସଂଗ୍ରହ କରାଯାଇଛି, ଯାହାକି ମେ ୨୦୨୧ରେ ସଂଗ୍ରହ କରାଯାଇଥିବା ୩୧୯୭ କୋଟି ଠାରୁ ୨୪ ପ୍ରତିଶତ ଅଧିକ ।
ଗତ କାଲି କେନ୍ଦ୍ର ଅର୍ଥମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ ରାଜ୍ୟମାନଙ୍କ ଚଳିତ ବର୍ଷ ମେ ମାସ ପର୍ଯ୍ୟନ୍ତ ଜିଏସଟି କ୍ଷତିପୂରଣ ପ୍ରଦାନ କରାଯାଇଛି । କେବଳ ଜୁନ ମାସର କ୍ଷତିପୂରଣ ଦେବା ବାକି ରହିଛି । ଏହା ପରେ ରାଜ୍ୟମାନଙ୍କୁ ଆଉ କ୍ଷତିପୂରଣ ପ୍ରଦାନ କରାଯିବ ନାହିଁ । ଗତ ୨୦୧୭ରେ ଦେଶରେ ଜିଏସଟି ଲାଗୁ କରାଯାଇଥିଲା । ଜିଏସଟି ଆଇନ ଅନୁସାରେ ସରକାର ୫ ବର୍ଷ ପାଇଁ କ୍ଷତିପୂରଣ ଦେବାର ଥିଲା । ଏହି ୫ ବର୍ଷ ଚଳିତ ଜୁନ ମାସରେ ସମାପ୍ତ ହେଉଛି ।