ନୂଆଦିଲ୍ଲୀ : ଭାରତ ସବୁଠାରୁ ଧନୀ ବ୍ୟକ୍ତି କହିଲେ, ଆମ ମନକୁ ଆସେ ମୁକେଶ ଅମ୍ବାନୀ, ଗୌତମ ଅଦାନୀ ଆଦି ଶିଳ୍ପପତିଙ୍କ ନାମ । କିନ୍ତୁ ଭାରତର ସବୁଠାରୁ ଧନୀ ମହିଳା କିଏ ? ଏହାର ଉତ୍ତର ହେବ ସାବିତ୍ରୀ ଜିନ୍ଦଲ । ସେ ହେଉଛନ୍ତି ଓ.ପି.ଜିନ୍ଦଲ ଗ୍ରୁପର ଅଧ୍ୟକ୍ଷା । ଏହି ଗ୍ରୁପ୍ ଅଧିନରେ ହିଁ ଜେଏସଡବ୍ଲୁ, ଜେଏସପିଏଲ, ଜେଏସଏଲ ଆଦି କମ୍ପାନି ଆସୁଛି ।
Sambad is now on WhatsApp
Join and get latest news updates delivered to you via WhatsApp
୭୨ ବର୍ଷୀୟା ଭାରତର ସବୁଠାରୁ ଧନୀ ମହିଳା ହୋଇଥିବାବେଳେ ଦେଶର ସବୁଠାରୁ ଧନୀ ଲୋତଙ୍କ ମଧ୍ୟରେ ୭ମ ସ୍ଥାନରେ ରହିଛନ୍ତି । ଗତ ୩ ବର୍ଷରେ ତାଙ୍କର ମୋଟ ସମ୍ପତ୍ତି ପରିମାଣ ୩ ଗୁଣ ବୃଦ୍ଧି ପାଇଛି । ୨୦୨୦ରେ ତାଙ୍କର ମୋଟ ସମ୍ପତ୍ତି ପରିମାଣ ୪.୮ ବିଲିୟନ ଡଲାର ଥିବାବେଳେ ୨୦୨୨ରେ ତାହା ୧୭.୭ ବିଲିୟନ ଡଲାରକୁ ବୃଦ୍ଧି ପାଇଛି ।
ଆସାମର ତିନସୁକିଆଠାରେ ମାର୍ଚ୍ଚ ୨୦, ୧୯୫୦ରେ ଜନ୍ମିତ ସାବିତ୍ରୀ ଜିନ୍ଦଲ ହେଉଛନ୍ତି ବିଶିଷ୍ଟ ଶିଳ୍ପପତି ସ୍ବର୍ଗତଃ ଓ.ପି.ଜିନ୍ଦଲଙ୍କ ପତ୍ନୀ ତଥା ପୃଥ୍ବୀ, ସଜ୍ଜନ, ନବୀନ ଓ ରତନ ଜିନ୍ଦଲଙ୍କ ମା । ଏହି ଚାରି ପୁଅ ଏବେ ଜିନ୍ଦଲ ଗ୍ରୁପର ବିଭିନ୍ନ କମ୍ପାନିର ପରିଚାଳନା କରୁଛନ୍ତି । ପୁଣି ପ୍ରତି କମ୍ପାନିରେ ସବୁ ଭାଇଙ୍କର ଅଂଶଧନ ରହିଛି । ପୁଣି ପ୍ରତି କମ୍ପାନିରେ ଓପି ଜିନ୍ଦଲଙ୍କ ଥିବା ଅଂଶଧନର ସ୍ବତ୍ତ୍ବ ଏବେ ସାବିତ୍ରୀଙ୍କ ମାଲିକାନାରେ ରହିଛି । ଏଣୁ ପ୍ରତି କମ୍ପାନିର ସଂପତ୍ତି ବଢିବା ସହ ତାଙ୍କର ସମ୍ପତ୍ତି ବଢିଚାଲିଛି ।