ଭାରତରେ ଖାଇବା ତେଲ ସଂକଟ ଦେଖାଯାଇପାରେ ; ଇଣ୍ଡୋନେସିଆ ସରକାରଙ୍କୁ ମନାଇବାକୁ ଭାରତ ସରକାରଙ୍କୁ ଅନୁରୋଧ କଲା ଶିଳ୍ପସଂଘ
ନୂଆଦିଲ୍ଲୀ : ପାମ୍ ଅଏଲ ( ତାଳତେଲ) ରପ୍ତାନି ଉପରେ ଇଣ୍ଡୋନେସିଆ କଟକଣା ଲଗାଇବା ପରେ ସମଗ୍ର ବିଶ୍ବରେ ଖାଇବା ତେଲର ମୂଲ୍ୟ ବଢିବାର ଆଶଙ୍କା ରହିଛି । ଆମଦାନୀକାରୀ ଦେଶମାନେ ଏବେ ବିକଳ୍ପ ଉତ୍ସ ଭାବେ ମାଲେସିଆକୁ ଦେଖୁଛନ୍ତି । କିନ୍ତୁ ମାଲେସିଆ ଏକୁଟିଆ ଇଣ୍ଡୋନେସିଆ ପକ୍ଷରୁ ଲାଗୁ କଟକଣା ଯୋଗୁଁ ସୃଷ୍ଟି ହୋଇଥିବା ଅଭାବ ପୂରଣ କରିବାକୁ ସକ୍ଷମ ନୁହେଁ ବୋଲି ବିଶେଷଜ୍ଞମାନେ କହୁଛନ୍ତି । ଏଣୁ ଇଣ୍ଡୋନେସିଆ ନିଜ ନିଷ୍ପତ୍ତିର ପୁନର୍ବିଚାର କରୁ ବୋଲି ଆମଦାନୀକାରୀମାନେ ସରକାରଙ୍କୁ ଅନୁରୋଧ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଇଣ୍ଡୋନେସିଆ ସରକାରଙ୍କ ସହ ଭାରତ ସରକାର ସିଧାସଳଖ ଆଲୋଚନା କରନ୍ତୁ ବୋଲି ଭାରତରେ ଖାଇବା ତେଲ ଶିଳ୍ପର ଜାତୀୟ ସଂଘ ସୋଲଭେଣ୍ଟ ଏକ୍ସଟ୍ରାକ୍ଟର୍ସ ଆସୋସିଏସନ ପକ୍ଷରୁ ଦାବି କରାଯାଇଛି । ଏହି ସମସ୍ୟାର ସମାଧାନ ନହେଲେ ଖାଇବା ତେଲର ସଂକଟ ସୃଷ୍ଟି ହେବା ସହ ଦରବୃଦ୍ଧି ନିୟନ୍ତ୍ରଣ ବାହାରକୁ ଚାଲିଯିବାର ଆଶଙ୍କା ରହିଛି ।
ସୂଚନାଯୋଗ୍ୟ ଯେ ଏପ୍ରିଲ ୨୮ରୁ ପାମ ଅଏଲ ରପ୍ତାନି ଉପରେ ଇଣ୍ଡୋନେସିଆର କଟକଣା ଲାଗୁହେବ । ଇଣ୍ଡୋନେସିଆର ଏହି ନିଷ୍ପତ୍ତି ପରେ ଭାରତ ସମେତ ବିଶ୍ବରେ ପାମ ଅଏଲ ବା ପାମୋଲିନ ତେଲର ମୂଲ୍ୟ ବଢିବାର ଆଶଙ୍କା ରହିଛି । କାରଣ ବିଶ୍ବ ପାମ ଅଏଲ ଚାହିଦାର ୫୦ ପ୍ରତିଶତ ଇଣ୍ଡୋନେସିଆ ପୂରଣ କରିଥାଏ । ଭାରତ ଉଭୟ ମାଲେସିଆ ଓ ଇଣ୍ଡୋନେସିଆରୁ ପାମ ଅଏଲ ଆମଦାନୀ କରିଥାଏ । କିନ୍ତୁ କିଛି ବର୍ଷ ତଳେ ମାଲେସିଆ ସହ ବିବାଦ ପରେ ଭାରତ ଇଣ୍ଡୋନେସିଆରୁ ପାମ ଅଏଲ ଆମଦାନୀ ବଢାଇଥିଲା ।