ନୂଆଦିଲ୍ଲୀ: ରିଲାଏନ୍ସ ଜିଓ କିଛି ଦିନ ହେବ ଏକ ନୂତନ ପ୍ରିପେଡ୍ ପ୍ଲାନ ଆରମ୍ଭ କରିଛି। ଏହି ପ୍ଲାନର ବିଶେଷତା ହେଉଛି ଏହାର ବୈଧତା, କାରଣ ଏହା ଟ୍ରାଇର ଆଦେଶ ପରେ ଦିଆଯାଇଛି । ଏହି ନୂତନ ପ୍ଲାନର ମୂଲ୍ୟ ୨୫୯ ଟଙ୍କା ରହିଛି। ଏହା ଏକ ମାସର ବୈଧତା ସହିତ ଲଞ୍ଚ କରାଯାଇଛି | ଏଥିରେ ଆପଣଙ୍କୁ ଆହୁରି ଅନେକ ସୁବିଧା ଦିଆଯାଉଛି । ଆସନ୍ତୁ ଜାଣିବା ଟ୍ରାଇର କେଉଁ ଆଦେଶକୁ ଜିଓ ଦ୍ୱାରା ଗ୍ରହଣ କରାଯାଇଛି ଏବଂ ଏଥିରେ ଆପଣଙ୍କୁ ଅନ୍ୟ କ’ଣ ସୁବିଧା ଦିଆଯାଉଛି ..
Sambad is now on WhatsApp
Join and get latest news updates delivered to you via WhatsApp
ଚଳିତ ବର୍ଷ ଜାନୁଆରିରେ ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ ଅର୍ଥାତ୍ ଟ୍ରାଇ ଦ୍ବାରା ଏକ ନିର୍ଦ୍ଦେଶ ଜାରି କରାଯାଇଥିଲା। ଅପରେଟରମାନେ ଅତି କମରେ ଗୋଟିଏ ୩୦ ଦିନିଆ ପ୍ଲାନ ରଖନ୍ତୁ ବୋଲି ଟ୍ରାଇ ନିର୍ଦ୍ଦେଶ ଦେଇଥିଲା । ଏହାର ଅର୍ଥ ହେଉଛି ଗ୍ରାହକମାନେ ମାସର ଗୋଟିଏ ତାରିଖରେ ରିଚାର୍ଜ କରିପାରିବେ ।
ଟେଲିକମ ଅପରେଟରମାନେ ମୁଖ୍ୟତଃ ଏକ ମାସ ପାଇଁ ୨୮ ଦିନିଆ, ୨ ମାସ ପାଇଁ ୫୬ ଦିନିଆ ଓ ୩ ମାସ ପାଇଁ ୮୪ ଦିନିଆ ପ୍ୟାକ ରଖୁଥିଲେ । ଅର୍ଥାତ ଆପଣ ଯଦି ମାସର ଏକ ତାରିଖରେ ରିଚାର୍ଜ କରିଛନ୍ତି, ତେବେ ଆପଣଙ୍କୁ ୨୯ ତାରିଖରେ ରିଚାର୍ଜ କରିବାକୁ ପଡ଼ୁଥିଲା । କିନ୍ତୁ ନୂଆ ନିୟମ ଅନୁସାରେ ଆପଣ ଯଦି ୧ ତାରିଖରେ ରିଚାର୍ଜ କରିଛନ୍ତି ତେବେ ଆପଣଙ୍କୁ ପରବର୍ତ୍ତିମାସ ୧ ତାରିଖରେ ହିଁ ରିଚାର୍ଜ କରିବାକୁ ପଡ଼ିବ । ଏହି ନୂଆ ନିୟମଦ୍ବାରା ଗ୍ରାହକମାନେ ଉପକୃତ ହେବାର ସମ୍ଭାବନା ରହିଛି ।
ଟ୍ରାଇ ନିଜ ଆଦେଶରେ କହିଛନ୍ତି ଯେ, ପ୍ରତି ଟେଲିକମ ଅପରେଟର ୩୦ ଦିନିଆ ଭାଲିଡିଟି ଥିବା ଅତି କମରେ ଗୋଟିଏ ପ୍ଲାନ ଭାଉଚର, ଗୋଟିଏ ସ୍ପେଶାଲ ତାରିଫ ଭାଉଚର ଓ ଗୋଟିଏ କମ୍ବୋ ଭାଉଚର ଉପଲବ୍ଧ କରିବେ, ଯେପରିକି, ଏସବୁ ପ୍ୟାକ ଗୁଡ଼ିକ ମାସର ସମାନ ତାରିଖରେ ହିଁ ରିଚାର୍ଜ କରିହେବ ।
ଟ୍ରାଇର ନିର୍ଦ୍ଦେଶ ମାନି ଜିଓ ଏକ ନୂତନ ପ୍ଲାନ ଆରମ୍ଭ କରିଛି। ଯାହାର ମୂଲ୍ୟ ୨୫୯ ଟଙ୍କା ରହିଛି। ଜିଓର ଏହା ହେଉଛି ପ୍ରଥମ ପ୍ଲାନ, ଯାହା ୨୮ ଦିନ ନୁହେଁ ୩୦ ଦିନର ବୈଧତା ସହିତ ଆସୁଛି। ଏହି ଯୋଜନାରେ ଆପଣଙ୍କୁ ପ୍ରତିଦିନ ୧.୫ଜିବି ଡାଟା ଦିଆଯିବ। ଏହି ଡାଟା ସରିଗଲା ପରେ ଇଣ୍ଟରନେଟ୍ ସ୍ପିଡ୍ ୬୪କେବିପିଏସକୁ ହ୍ରାସ ପାଇବ । ଏଥିରେ ଆପଣ ପ୍ରତିଦିନ ୧୦୦ ଟି ଏସଏମଏସ ଏବଂ ଯେକୌଣସି ନେଟୱାର୍କରେ ଅସୀମିତ ଭଏସ୍ କଲିଂର ଲାଭ ମଧ୍ୟ ଉଠାଇ ପାରିବେ । ଏହି ଯୋଜନାରେ ସମସ୍ତ ଜିଓ ଆପ ବ୍ୟବହାର କରାଯାଇପାରିବ।