ନୂଆଦିଲ୍ଲୀ: ଦେଶର ଏକ ପ୍ରମୁଖ ଘରୋଇ ବିମାନ କମ୍ପାନୀ ଭାବେ ପରିଚିତ ଜେଟ ଏୟାରୱେଜ୍ ଆକାଶରେ ପୁଣି ଥରେ ଉଡ଼ିବ। ବର୍ତ୍ତମାନ କମ୍ପାନୀକୁ ନୂତନ ମାଲିକ ମିଳିଛନ୍ତି | ଲଣ୍ଡନ ସ୍ଥିତ କେଲ୍ରକ୍ କ୍ୟାପିଟାଲ୍ ଏବଂ ୟୁଏଇର ବ୍ୟବସାୟୀ ମୁରାରୀ ଲାଲ ଜାଲାନଙ୍କ କନସୋର୍ଟିୟମ୍ (ଗ୍ରୁପ୍) ର ରିଜୋଲ୍ୟୁସନ୍ ଯୋଜନାକୁ ଋଣଦାତା କମିଟି ଅନୁମୋଦନ କରିଛି। ଗତ ବର୍ଷ ଏପ୍ରିଲରେ ଜେଟ ଏୟାରୱେଜ ଉଡାଣ ବନ୍ଦ କରି ଦେଇଥିଲା ଏବଂ ନ୍ୟାସନାଲ କମ୍ପାନୀ ଲ ’ଟ୍ରିବ୍ୟୁନାଲ (ଏନସିଏଲଟି) ରେ ଜେଟ ଏୟାରୱେଜର ମାମଲା ଚାଲିଛି।
Sambad is now on WhatsApp
Join and get latest news updates delivered to you via WhatsApp
ତେବେ ଏପର୍ଯ୍ୟନ୍ତ ଏନସିଏଲଟି ରୁ ଉଡାଣ ନେଇ ଅନୁମୋଦନ ମିଳିପାରିନାହିଁ |କନସୋର୍ଟିୟମ ଏହି ବିମାନ କମ୍ପାନୀର ଉଡାଣ ସମୟ ନିଜ ଅକ୍ତିଆରକୁ ନେବାକୁ ଯୋଜନା କରିଛି | ଯାହା ଅନ୍ୟ ବିମାନ କମ୍ପାନୀକୁ ଆବଣ୍ଟିତ ହୋଇଛି | ଜେଟ୍ ଏୟାରୱେଜ ଉଡାଣ ବନ୍ଦ ହେବା ପରେ ଏହାର ଉଡାଣ ସମୟକୁ ଅନ୍ୟ ବିମାନ କମ୍ପାନୀକୁ ଦିଆଯାଇଥିଲା | ଆଗାମୀ କିଛି ସପ୍ତାହ ମଧ୍ୟରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟରେ ଆବେଦନ କରିବାକୁ ଏହି କନସୋର୍ଟିୟମ୍ ଲକ୍ଷ୍ୟ ରଖିଛି।
ରିପୋର୍ଟ ଅନୁଯାୟୀ, ଜେଟ ଏୟାରୱେଜରେ ପୁଞ୍ଜିନିବେଶ କରିବା ଏବଂ ନୂତନ ବିମାନ କିଣିବା ପାଇଁ ପୁରୁଣା ବିମାନ ବିକ୍ରୟ କରିବା କନସୋର୍ଟିୟମ୍ ଲକ୍ଷ୍ୟ ରଖିଛି । ଏହା ସହ ଉଭୟ ଘରୋଇ ଓ ଅନ୍ତର୍ଜାତୀୟ ବିମାନ ଉଡାଣ ପାଇଁ ଯୋଜନା କରାଯାଇଛି | ସୂଚନା ଥାଉ କି ଋଣଦାତା କମିଟିରେ ଥିବା ଅଧିକାଂଶ ବ୍ୟାଙ୍କର ସଦସ୍ୟ ଏହି ନୂଆ ଅଧିଗ୍ରହଣକୁ ସମର୍ଥନ କରିଥିଲେ | କେବଳ ସରକାରୀ ବିମାନସେବା କମ୍ପାନୀ ଏୟାରଇଣ୍ଡିଆ ନୁହେଁ, ଘରୋଇ ଜେଟ ଏୟାରୱେଜ ମଧ୍ୟ ଗୁରୁତର ଆର୍ଥିକ ସଂକଟର ସମ୍ମୁଖୀନ ହୋଇଥିଲା | ଏହା ସହ ବ୍ୟାଙ୍କ ଋଣ ବୋଝ ଯୋଗୁଁ ଏହି କମ୍ପାନୀ ଗତବର୍ଷ ବିମାନ ଉଡାଣ ବନ୍ଦ କରିଦେଇଥିଲା |