ପୁଣି ବିକ୍ରି ହେବ ଜିଓ ୪-ଜି ଫିଚର ଫୋନ! ପଞ୍ଜିକୃତ ଗ୍ରାହକଙ୍କୁ ମିଳିବ ଅଗ୍ରାଧିକାର
ମୁମ୍ବାଇ: ରିଲାଏନ୍ସ ଜିଓର ଶସ୍ତା ୪-ଜି ଫିଚର ଫୋନ ପାଇନଥିବା ଗ୍ରାହକଙ୍କ ଲାଗି ଖୁସି ଖବର । ପୁଣି ଥରେ ଏହି ଅଫର ଆରମ୍ଭ ହେବାର ସମ୍ଭାବନା ରହିଛି । ଗତ ଥର କମ୍ପାନି ପ୍ରାୟ ୬ ନିୟୁତ ଶସ୍ତା ୪-ଜି ଫିଚର ଫୋନ ବିକ୍ରି କରିଥିଲା । କିନ୍ତୁ ଏହି ଫୋନର ଚାହିଦା ଏତେ ପ୍ରବଳ ହୋଇଥିଲା ଯେ ଅନେକ ଗ୍ରାହକ ଏହି ଫୋନ ପାଇପାରି ନଥିଲେ । ଏଥର ସେମାନଙ୍କ ଆଶା ପୂରଣ ହେବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ଗତ ଥର ଅତି ଶୀଘ୍ର ଷ୍ଟକ ଶେଷ ହୋଇଯାଇଥିବାରୁ ଏଥର ପ୍ରାୟ ୧୦ ନିୟୁତ ଫୋନ ବିକ୍ରି କରିବାର ଟାର୍ଗେଟ୍ ରଖିଛି କମ୍ପାନି । ଷ୍ଟକ ଶେଷ ହେବାପରେ ମଧ୍ୟ ଯେଉଁ ଗ୍ରାହକମାନେ ପଞ୍ଜୀକରଣ କରିଥିଲେ କମ୍ପାନି ଏବେ ସେମାନଙ୍କ ଉପରେ ଅଗ୍ରାଧିକାର ଦେଉଛି । ଏସବୁ ଗ୍ରାହକମାନଙ୍କୁ କମ୍ପାନି ପକ୍ଷରୁ ଏକ ମେସେଜ୍ ପଠାଯାଉଛି, ଯେଉଁଥିରେ ଲେଖାରହିଛି, “ଜିଓଫୋନକୁ ନେଇ ଆଗ୍ରହ ଦେଖାଇଥିବାରୁ ଧନ୍ୟବାଦ । ଜିଓଫୋନ ପୁଣି ଉପଲବ୍ଧ ହେଲେ ଆମେ ଆପଣଙ୍କୁ ଆଗୁଆ ଜଣାଇବୁ-ଟିମ୍ ଜିଓ” । କିନ୍ତୁ ଆନୁଷ୍ଠାନିକ ଭାବେ ଜିଓ ପକ୍ଷରୁ ଏ ନେଇ ଘୋଷଣା କରାଯିବା ବାକି ଅଛି ।
ଗତ ଅଗଷ୍ଟମାସରେ ଜିଓ ଆପାତତଃ ମାଗଣାରେ ୪-ଜି ଫିଚର ଫୋନ ବିକ୍ରି କରି ସାରା ଟେଲିକମ ଜଗତରେ ଚହଳ ସୃଷ୍ଟି କରିଥିଲା । ଅଗଷ୍ଟ ୨୪ରେ ଏହାର ପଂଜୀକରଣ ଆରମ୍ଭ ହୋଇ ଅଗଷ୍ଟ ୨୬ରେ ବନ୍ଦ ହୋଇଯାଇଥିଲା । ପୂର୍ବରୁ ପଂଜୀକରଣ କରିଥିବା ଗ୍ରାହକମାନେ ମାତ୍ର ୧୫୦୦ ଟଙ୍କା ଦେଇ ଏହି ଫୋନ ପାଇଥିଲେ । କମ୍ପାନି ତରଫରୁ ପରେ ଏହି ରାଶି ଫେରାଇ ଦିଆଯିବ ।
ଜିଓ ପରେ ଏୟାରଟେଲ୍ ଓ ଭୋଡାଫୋନ ମଧ୍ୟ ଶସ୍ତାରେ ୪-ଜି ଫୋନ ପ୍ରଦାନ କରିବା ଆରମ୍ଭ କରିଛନ୍ତି । ଫଳରେ ଟେଲିକମ ଜଗତରେ ୪-ଜି ହାଣ୍ଡସେଟ୍କୁ ନେଇ ଏକ ପ୍ରାଇସ୍ ଓ୍ଵାର ଆରମ୍ଭ ହୋଇଯାଇଛି । ଏବେ ଜିଓ ପକ୍ଷରୁ ପୁଣି ଥରେ ପୂର୍ବର ଅଫର ଆରମ୍ଭ ହେବାକୁ ଯାଉଥିବାରୁ ଏହି ଯୁଦ୍ଧ ଆହୁରି ତୀବ୍ର ହେବା ସମ୍ଭାବନା ରହିଛି ।