ଚାଷୀଙ୍କୁ ଯାନ୍ତ୍ରିକ ଉପକରଣ ଯୋଗାଇବ ଜେଏସ୍ପିଏଲ୍ ଫାଉଣ୍ଡେସନ
ଭୁବନେଶ୍ବର : କୃଷି ଉତ୍ପାଦନ ଏବଂ କୃଷକଙ୍କ ଆୟ ବୃଦ୍ଧିରେ ସହାୟତା କରିବା ପାଇଁ ଜେଏସପିଏଲ ଫାଉଣ୍ଡେସନ ପକ୍ଷରୁ ଓଡିଶା ଏବଂ ଛତିଶଗଡରେ ଜିନ୍ଦଲ କୃଷି ବିକାଶ ସ୍ୱତନ୍ତ୍ର କାର୍ଯ୍ୟକ୍ରମ ଆରମ୍ଭ କରାଯାଇଛି। ଏହି କାର୍ଯ୍ୟକ୍ରମ ଅଧୀନରେ ଫାଉଣ୍ଡେସନ ପକ୍ଷରୁ କ୍ଷୁଦ୍ର ଓ ନାମମାତ୍ର ଚାଷୀମାନଙ୍କୁ ଯାନ୍ତ୍ରିକ କୃଷି ଉପକରଣ ସହାୟତା ପ୍ରଦାନ କରାଯିବ। ଫାଉଣ୍ଡେସନର ଅଧ୍ୟକ୍ଷା ଶାଲୁ ଜିନ୍ଦଲ କହିଛନ୍ତି ଯେ ଯାନ୍ତ୍ରିକ ଉପକରଣ ଦ୍ବାରା ଚାଷୀଙ୍କ ଶ୍ରମ କମ୍ ହେବ ଓ କୃଷି ପାଇଁ ଖର୍ଚ୍ଚ କମ୍ ହୋଇ ଉତ୍ପାଦନ ବଢ଼ିବ। ଏହି କାର୍ଯ୍ୟକ୍ରମ ଅଧୀନରେ ଜେଏସପିଏଲ ଫାଉଣ୍ଡେସନ୍ ଦ୍ବାରା ଯାନ୍ତ୍ରିକ କୃଷି ଉପକରଣ କ୍ରୟ କରାଯାଇ ଏବଂ ସ୍ଥାନୀୟ କୃଷକ ଉତ୍ପାଦକ ସଂଗଠନ (ଏଫପିଓ), ଏଗ୍ରୋ ସେବା କେନ୍ଦ୍ର, କୃଷକ କ୍ଲବ୍, କୃଷକ କ୍ଲବ୍ ଫେଡେରେସନ୍, ଡେରି ସୋସାଇଟି, ଗ୍ରାମ ଜଳଛାୟା କମିଟି (ଭିଡବ୍ଲୁସି) ଭଳି କୃଷକ ସଂଗଠନଗୁଡ଼ିକୁ ହସ୍ତାନ୍ତରିତ କରାଯିବ ।
ବଡ ଓ ମାଧ୍ୟମ ଚାଷୀମାନଙ୍କ ଅପେକ୍ଷା କ୍ଷୁଦ୍ର ଓ ନାମମାତ୍ର ଚାଷୀମାନଙ୍କୁ ଅଗ୍ରାଧିକାର ଦେବା ପାଇଁ କୃଷକ ସଂଗଠନ ମାନେ ଜେଏସପିଏଲ୍ ଫାଉଣ୍ଡେସନ ସହିତ ଏକ ଚୁକ୍ତିନାମା ସ୍ୱାକ୍ଷର କରିବେ । କ୍ଷୁଦ୍ର ଓ ନାମମାତ୍ର ଚାଷୀମାନେ ସ୍ଥାନୀୟ କୃଷକ ସଂଗଠନଗୁଡ଼ିକୁ ସ୍ୱଳ୍ପ ଦେୟ ଦେଇ ଏହି ଯାନ୍ତ୍ରିକ କୃଷି ଉପକରଣକୁ ବ୍ୟବହାର କରିପାରିବେ। ଚୟନ କରାଯାଇଥିବା ସ୍ଥାନୀୟ କୃଷକ ସଂଗଠନ ସରକାର ଦେଉଥିବା ସବସିଡିକୁ ବାଦ ଦେଇ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ଯାନ୍ତ୍ରିକ କୃଷି ଉପକରଣ ପାଇ ପାରିବେ। କୃଷି ପାଇଁ ବ୍ୟବହାର କରାଯାଉଥିବା ବିଭିନ୍ନ ଉପକରଣ ଯଥା ଟ୍ରାକ୍ଟର, ପାୱାର ଟିଲର, ରିପର୍, ପାୱାର ଚାଳିତ ସିଡ ଡ୍ରିଲ, ପାୱାର ୱିଡର, ପାୱାର ସ୍ପ୍ରେୟର, ପମ୍ପ ସେଟ -୨ (୫ କେଭି / ୩ କେଭି, ଟୁଲ କିଟ / ମେସିନାରି ରୁମ ଇତ୍ୟାଦି ଉପକରଣ ଯୋଗାଇ ଦିଆଯିବ।
