କରୋନା ପରିସ୍ଥିତି ଯୋଗୁଁ ଓଡ଼ିଶାରେ ଥିବା ଜିଏମଆର-କମଳାଙ୍ଗ ପ୍ଲାଣ୍ଟର ଅଧିଗ୍ରହଣକୁ ସ୍ଥଗିତ ରଖିଲା ଜେଏସଡବ୍ଲୁ

ନୂଆଦିଲ୍ଲୀ : କରୋନା ଭାଇରସ ମହାମାରୀ ଓ ଲକଡାଉନ ଯୋଗୁଁ ବିଭିନ୍ନ ଶିଳ୍ପସଂସ୍ଥା ନିଜ ନିଜର ବ୍ୟବସାୟିକ ଯୋଜନାକୁ ସ୍ଥଗିତ ରଖୁଛନ୍ତି । ଜେଏସଜଡବ୍ଲୁ ଷ୍ଟିଲ ପକ୍ଷରୁ ଓଡ଼ିଶାରେ ଥିବା ଜିଏମଆର କମଳାଙ୍ଗ ପ୍ଲାଣ୍ଟର ଅଧିଗ୍ରହଣକୁ ସ୍ଥଗିତ ରଖାଯାଇଛି । ଫଳରେ କ୍ଷତିରେ ଚାଲୁଥିବା ଜିଏମଆର ପ୍ଲାଣ୍ଟର ପୁନରୁଦ୍ଧାର ଯୋଜନା ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି ।
ଢେଙ୍କାନାଳ ଜିଲ୍ଲାରେ ଥିବା ୧୦୫୦ ମେଗାଓ୍ୱାଟ କ୍ଷମତା ସଂପନ୍ନ ଜିଏମଆର କମଳାଙ୍ଗ ତାପଜ ବିଦ୍ୟୁତ ପ୍ରକଳ୍ପକୁ ୫୩୨୧ କୋଟି ଟଙ୍କା ବିନିମୟରେ ଅଧିଗ୍ରହଣ କରିବା ସଂପର୍କରେ ଗତ ଫେବ୍ରୁଆରି ମାସରେ ଜେଏସଡବ୍ଲୁ ଏନର୍ଜି ଘୋଷଣା କରିଥିଲା । ଏହି ଅଧିଗ୍ରହଣ ସଂପୂର୍ଣ ହୋଇଥିଲେ ଜିଏମଆର ନିଜର ଋଣ ହ୍ରାସ କରିପାରିଥାନ୍ତା ଓ ଜେଏସଡବ୍ଲୁ ମଧ୍ୟ ଓଡ଼ିଶାରେ ନିଜସ୍ଥିତିକୁ ସୁଦୃଢ କରିପାରିଥାନ୍ତା ।

ବର୍ତ୍ତମାନ ବଜାରରେ ଅନିଶ୍ଚିତତା ଲାଗି ରହିଥିବାରୁ ଏହି ଅଧିଗ୍ରହଣ ପ୍ରକ୍ରିୟାକୁ ସ୍ଥଗିତ ରଖାଯାଇଛି ବୋଲି ଜେଏସଡବ୍ଲୁ ଏନର୍ଜି ସିଇଓ ପ୍ରଶାନ୍ତ ଜୈନ କହିଛନ୍ତି । କରୋନା ଭାଇରସ ଓ ଲକଡାଉନ ପରିସ୍ଥିତି ଯୋଗୁଁ ଏବେ ବଜାରରୁ ଅର୍ଥ ଉଠାଇବା ସମ୍ଭବ ନୁହେଁ । ଏଣୁ ଅଧିଗ୍ରହଣ ପାଇଁ ଅର୍ଥ ଯୋଗାଡ଼ କଷ୍ଟକର ହୋଇପଡ଼ିବ ।
କେବଳ ଜିଏମଆର-କମଳାଙ୍ଗ ନୁହେଁ, ଓଡ଼ିଶାରେ ଥିବା ଆଉ ଏକ ତାପଜ ବିଦ୍ୟୁତ ପ୍ରକଳ୍ପ ଇଣ୍ଡ ବାରାଥ୍ ଏନର୍ଜି (ଉତ୍କଳ)କୁ ଖରିଦ କରିବା ଲାଗି ଜେଏସଡବ୍ଲୁ ଏବେ କମ୍ପାନି ଲ ଟ୍ରିବୁନାଲର ମଂଜୁରୀ ଅପେକ୍ଷାରେ ରହିଛି ।

ସମ୍ବନ୍ଧିତ ଖବର

Comments are closed.