ନୂଆଦିଲ୍ଲୀ : ଗତ ଜୁନ ମାସରେ ଦେଶର ଜିଏସଟି ରାଜସ୍ବ ସଂଗ୍ରହ ୧୪୪,୬୧୬ କୋଟିରେ ପହଞ୍ଚିଛି । ଏହା ଜୁନ ୨୦୨୧ ତୁଳନାରେ ୫୬ ପ୍ରତିଶତ ଅଧିକ ହୋଇଥିବା ବେଳେ ମେ ୨୦୨୨ର ରେକର୍ଡ ୧୪୦,୮୮୫ କୋଟିର ଜିଏସଟି ରାଜସ୍ବଠାରୁ ୩ ପ୍ରତିଶତ ଅଧିକ ।
Sambad is now on WhatsApp
Join and get latest news updates delivered to you via WhatsApp
ଜୁନ ମାସରେ ସଂଗ୍ରହ ହୋଇଥିବା ୧୪୦,୮୮୫ କୋଟିର ଜିଏସଟି ମଧ୍ୟରୁ କେନ୍ଦ୍ରୀୟ ଜିଏସଟି ଟ. ୨୫,୩୦୬ କୋଟି, ରାଜ୍ୟ ଜିଏସଟି ଟ.୩୨,୪୦୬ କୋଟି, ଇଣ୍ଟିଗ୍ରେଟେଡ ଜିଏସଟି ୭୫୮୮୭ କୋଟି ଟଙ୍କା ଓ ସେସ ୧୧୦୧୮ କୋଟି ଟଙ୍କା ଅନ୍ତର୍ଭୁକ୍ତ ବୋଲି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
ଜୁନ ମାସରେ ଓଡ଼ିଶାରୁ ୩୯୬୫ କୋଟି ଟଙ୍କାର ଜିଏସଟି ସଂଗ୍ରହ କରାଯାଇଛି, ଯାହାକି ଜୁନ ୨୦୨୧ରେ ସଂଗ୍ରହ କରାଯାଇଥିବା ୩୦୦୦ କୋଟି ଠାରୁ ୩୨ ପ୍ରତିଶତ ଅଧିକ ।
ସୂଚନାଯୋଗ୍ୟ ଯେ ଚଳିତ ମାସରେ ଦେଶରେ ଜିଏସଟି ଲାଗୁ ହେବାକୁ ୫ ବର୍ଷ ପୂରଣ ହୋଇଛି । ୨୦୧୭ ଜୁଲାଇ ୧ରେ ସାରା ଦେଶରେ ଜିଏସଟି ଲାଗୁ ହୋଇଥିଲା । ଗତ ଜୁନ ମାସ ପର୍ଯ୍ୟନ୍ତ କେନ୍ଦ୍ର ସରକାର ରାଜ୍ୟମାନଙ୍କୁ ଜିଏସଟି କ୍ଷତିପୂରଣ ପ୍ରଦାନ କରିଥିଲେ । ତେବେ ଆଉ ୫ ବର୍ଷ ପାଇଁ କ୍ଷତିପୂରଣ ପ୍ରଦାନ କରିବାକୁ ରାଜ୍ୟମାନେ ଦାବି କରୁଛନ୍ତି । ଏ ନେଇ କେନ୍ଦ୍ର ସରକାର ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନେଇ ନାହାନ୍ତି ।