ମୃତ୍ୟୁ ପୂର୍ବରୁ ୮ଜଣଙ୍କୁ ନୂଆ ଜୀବନ ଦେଇ ଗଲେ ଏହି କେରଳ ଯୁବକ

କୋଚି: କେରଳର ଜଣେ ଯୁବକ କରିଥିବା କାମ ଏବେ ଚାରିଆଡ଼େ ଚର୍ଚ୍ଚାର ବିଷୟ ପାଲଟିଛି। ସେ ଆଜି ଦୁନିଆରେ ନଥିଲେ ମଧ୍ୟ ୮ଜଣଙ୍କ ମଧ୍ୟରେ ସେ ଜୀବିତ ଅଛନ୍ତି। ମୃତ୍ୟୁ ପ‌ରେ ମଧ୍ୟ ଅଙ୍ଗଦାନ ଭଳି ବଡ଼ କାମ କରି ଯାଇଛନ୍ତି କେରଳର ୩୯ବର୍ଷୀୟ କେଲଭିନ ଜୋଏ। ଆଜି ତାଙ୍କର ଅଙ୍ଗଦାନ କରିବାର ନିଷ୍ପତ୍ତି  ପାଇଁ ୮ଜଣ ନୂଆ ଜୀବନ ପାଇଛନ୍ତି।

ସୂଚନା ମୁତାବକ, ଏକ ଦୁର୍ଘଟଣାର ସମ୍ମୁଖୀନ ହୋଇଥିବା କେଲଭିନଙ୍କୁ ବୁଧବାର ଅମୃତା ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସରେ ଭର୍ତ୍ତି କରାଯାଇଥିଲା। ଶନିବାର ଦିନ ସେ ବ୍ରେନ ଡେ‌ଡ୍ ବୋଲି ଘୋଷଣା କରିଥିଲେ ଡ଼ାକ୍ତର।  ଏହା ପରେ ପରିବାର ଲୋକଙ୍କ ସହମତିରେ ମୃତସଞ୍ଜିବୀ ମାଧ୍ୟମରେ – ରାଜ୍ୟ ସରକାରଙ୍କ ମୃତ ଦାତା ଅଙ୍ଗ ଦାନ କାର୍ଯ୍ୟକ୍ରମ ମାଧ୍ୟମରେ ତାଙ୍କ ଅଙ୍ଗ ଦାନ କରାଯାଇଥିଲା। ଉତ୍ତର ପାରଭୋରରୁ ଆସିଥିବା କେଲଭିନ, ଭି ଆର ଆନନ୍ଦ ଏବଂ ମାରଗ୍ରେଟ ଆନନ୍ଦଙ୍କ ପୁତ୍ର | ତାଙ୍କର ହୃଦପିଣ୍ଡ, କ୍ଷୁଦ୍ର ଅନ୍ତନଳୀ, ଯକୃତ, ହାତ, କିଡନୀ ଏବଂ କର୍ଣ୍ଣିଆ ଦାନ କରାଯାଇଥିବା ଜଣା ପଡ଼ିଛି |

ତାଙ୍କର ଦୁଇ ହାତ ଜଣେ ରୋଗୀଙ୍କୁ ଦାନ କରାଯାଇଥିବାବେଳେ ଅନ୍ୟ ପାଞ୍ଚଜଣ ତାଙ୍କ ହୃଦପିଣ୍ଡ, କ୍ଷୁଦ୍ର ଅନ୍ତନଳୀ, ଯକୃତ ଏବଂ କର୍ଣ୍ଣିଆ ଗ୍ରହଣ କରିଥିଲେ। କୋଚି ଏବଂ କୋଜିକୋଡେ ସରକାରୀ ମେଡିକାଲ କଲେଜରେ ଥିବା ଲୋର୍ଡସ୍ ହସପିଟାଲରେ ଦୁଇଜଣ ରୋଗୀଙ୍କୁ ତାଙ୍କ କିଡନୀ ଦାନ କରାଯାଇଥିଲା।

ଲକଡାଉନ୍ ପ୍ରତିବନ୍ଧକରୁ ମୁକ୍ତି ପାଇବା ପାଇଁ ସ୍ୱାସ୍ଥ୍ୟମନ୍ତ୍ରୀ କେ.କେ ଶୈଲଜା ଏଥିରେ ହସ୍ତକ୍ଷେପ କରି ଅଙ୍ଗଗୁଡ଼ିକୁ ବିଭିନ୍ନ ଡ଼ାକ୍ତରଖାନାକୁ ନେବା ପାଇଁ ଅନୁମତି ଦେଇଥିଲେ। ଜଣେ ସ୍ୱାସ୍ଥ୍ୟ ଅଧିକାରୀ କହିଛନ୍ତି, “ପୂର୍ବରୁ ଏପରି ଘଟଣା ଘଟିଥିଲା ଯେତେବେଳେ ଜଣେ ବ୍ୟକ୍ତି ୬ଜଣଙ୍କୁ ଅଙ୍ଗ ଦାନ କରିଥିଲେ। କିନ୍ତୁ ଜଣେ ବ୍ୟକ୍ତି ଏକା ସାଙ୍ଗରେ ୮ଜଣଙ୍କୁ ଅଙ୍ଗଦାନ କରିବା ଘଟଣା ପ୍ରଥମ ।

ସମ୍ବନ୍ଧିତ ଖବର